ஹஜ் யாத்திரையை மேற்கொள்ளவுள்ள பயணிகள் ஏதும் நோய்களுக்கு மருந்து வகைகள் உட்கொள்பவர்களாக இருந்தால் அவர்கள் அவசியம் ஒரு மாத காலத்துக்குத் தேவையான மருந்து வகைகளை தம்முடன் எடுத்துச் செல்லுமாறு அரச ஹஜ் குழு அறிவுரை வழங்கியுள்ளது.
ஹஜ் யாத்திரிகர்களின் மருத்துவ சேவைகள் குறித்து அரச ஹஜ் குழுவின் தலைவர் கலாநிதி எம்.ரி. சியாத் விளக்கமளிக்கையில்;
“சவூதி மக்காவில் ஹரம் ஷரீப் எல்லைக்குள் மருத்துவ சேவைகளுக்கு சவூதி ஹஜ் ஏற்பாடுகளுக்கான அமைச்சு சில கட்டுப்பாடுகள் விதித்துள்ளதால் இலங்கை ஹஜ் குழுவின் மருத்துவ முகாம்கள் இந்த எல்லைக்கு வெளியிலேயே இம்முறை நடத்தப்படும்.
மருத்துவ முகாம்களில் கடமையாற்றுவதற்காக இலங்கையிலிருந்து ஒரு பெண் டாக்டர் உட்பட 5 டாக்டர்கள் அங்கு செல்லவுள்ளனர். இலங்கை ஹஜ்ஜாஜிகள் இந்த மருத்துவ முகாம்களில் சிகிச்சைகளைப் பெற்றுக் கொள்ளலாம் மருந்து வகைகளையும் பெற்றுக்கொள்ள முடியும்.
அத்தோடு சவூதி அரசாங்கத்தின் வைத்தியசாலைகளிலும் சிகிச்சைகளைப் பெற்றுக் கொள்ளலாம். அசௌகரியங்களைத் தவிர்ப்பதற்காக ஹஜ் யாத்திரிகர்கள் தம்முடன் தமக்குத் தேவையான மருந்து வகைகளைக் கொண்டு செல்வதே நன்மை பயக்கும்.
இலங்கையிலிருந்து முதலாவது ஹஜ் விமானம் எதிர்வரும் 15 ஆம் திகதி புறப்பட்டுச் செல்லவுள்ளது. இவ்விமானத்தில் 180 ஹஜ் பயணிகள் பயணிக்கவுள்ளனர். மேலதிக கோட்டா 500 க்கான பயணிகள் தெரிவுகள் இவ்வாரம் பூர்த்தி செய்யப்படவுள்ளன என்றார்.
vidivelli