ஜூன் மாதத்தின் இறுதிநாள் ஆரம்பமாகிறது. நான்கு பேரின் வாழ்வும் அன்றை தினம் அதிகாலையிலேயே பரிதாபமாக முடிவடையுமென்று யாரும் நினைத்துக்கூட பார்க்கவில்லை……
மத்தியகிழக்கில் சாரதியாகத் தொழில்புரிந்து மூன்று மாதங்களுக்கு முன்னர் நாடுதிரும்பிய இம்ரான் இரண்டு மாதங்களுக்கு முன்னர் வாகன விபத்தொன்றில் சிக்கிப் படுகாயமடைந்தார். கால்கள் முறிந்தநிலையில் சிகிச்சை பெற்றுவரும் நிலையில், இம்ரானின் மனைவியான நிறைமாதக் கர்ப்பிணி சஹர் நிஸாவுக்கு நள்ளிரவில் பிரசவ வலி ஏற்படுகிறது.
ஜூன் 30 அதிகாலை 3 மணியிருக்கும், இம்ரானின் பெரியம்மாவின் மகனான சிபான், தனது ஒன்றுவிட்ட சகோதரனான ரிஷாபிக்கு அழைப்பை எடுத்து, “இம்ரானின் மனைவிக்கு கடும் வருத்தமாக இருக்கிறது. ஆஸ்பத்திரிக்கு போக வேண்டும். வேனை எடுத்துக்கொள்ளட்டுமா?” என கேட்டிருக்கிறார். ரிஷாபியும் சரியெனக் கூற அதிகாலை மூன்றரை மணி கடந்து வாகனத்தில் 23 வயதான நிறைமாதக் கர்ப்பிணி சஹர்நிஸாவுடன் அவரது மாமி அதாவது, கணவன் இம்ரானின் தாய் மௌஸியா சுல்தான் (வயது 62), சிபானின் மனைவி நஸ்மியா (வயது 32), மௌஸியாவின் சகோதரர் நவாஸ் மற்றும் இளைய மகனான இஹ்லான் (வயது 21) ஆகியோரையும் ஏற்றிக்கொண்டு இபலோகம அழகப்பெருமாகம பிரதேசத்திலுள்ள வீட்டிலிருந்து கல்னேவ வைத்தியசாலைக்கு செல்கின்றனர்.
பிரசவ வேதனையில் சஹர்நிஸா துடித்துக்கொண்டிருக்கிறாள். கல்னேவ வைத்தியசாலைக்கு சென்று பார்க்கும்போது அங்கு யாரும் இல்லை. அங்கு சிகிச்சைபெற முடியாது என்ற நிலையில், அங்கிருந்து மிகவும் பதற்றத்துடன் உடனடியாக அனுராதபுரம் வைத்தியசாலைக்குச் செல்லத் தீர்மானிக்கின்றனர். வேனை திருப்பிக்கொண்டு அனுராதபுரம் நோக்கிச் செல்கையிலேயே சுமார் 25 கிலோமீற்றர்கள் தொலைவிலுள்ள மொறகொட பகுதியில் அந்த கோர விபத்தேற்பட்டது.
அதிகாலை 3.50 மணியிருக்கும். கோழிப் பண்ணையொன்றுக்கு தவிடு உள்ளிட்ட உணவுப்பொருட்களை ஏற்றிக்கொண்டு கஹடகஸ்திகிலியவிலிருந்து குளியாபிட்டி நோக்கிச்சென்ற லொறியொன்றுடன் நேருக்கு நேர் மோதுண்டு இவ்விபத்து ஏற்பட்டது. ஸ்தலத்திலேயே நிறைமாதக் கர்ப்பிணி சஹர்நிஸா, மௌஸியா சுல்தான், நஸ்மியா சிபான் ஆகியோர் பலியாகினர். முன் ஆசனத்தில் அமர்ந்திருந்த நவாஸின் நெஞ்சுப்பகுதி பலமாக அடிபட்டுள்ளதுடன், கால்கள் முறிவடைந்து பலத்த காயமடைந்தார். அத்துடன் வாகனத்தை செலுத்திய சிபானுக்கு தோள் பகுதியில் பலத்த காயமேற்பட்டதுடன் எலும்பு முறிவு ஏற்பட்டுள்ளது. இதுதவிர இஹ்லானின் தலையில் அடிபட்டுள்ளது. சம்பவம் நடந்து குறுகிய நேரத்திற்குள் தலாவ பொலிஸார் ஸ்தலத்திற்கு விரைந்ததுடன் உயிரிழந்த மற்றும் படுகாயமடைந்தோரை உடனடியாக அம்பியூலன்ஸ் ஊடாக அனுராதபுரம் வைத்தியசாலைக்கு அனுப்பி வைத்துள்ளனர்.
அனுராதபுரம் வைத்தியசாலைக்கு சென்ற பின்னர் உயிரிழந்த கர்ப்பிணிப் பெண்ணின் வயிற்றிலுள்ள குழந்தையைக் காப்பாற்றும் முயற்சியில் மருத்துவர்கள் சத்திரசிகிச்சை மேற்கொண்டு குழந்தையை வெளியில் எடுத்தபோது அந்த சிசுவும் உயிரிழந்தநிலையில் இருந்தது. உயிரிழந்த நால்வரின் ஜனாஸாக்களும் பிரேத பரிசோதனையின் பின்னர் அன்றைய தினமே குடும்பத்தாரிடம் கையளிக்கப்பட்டன. பின்னர் அன்று மாலை அழகப்பெருமகம மொஹிதீன் ஜும்ஆப் பள்ளிவாசல் மையவாடியில் நால்வரினது ஜனாஸாக்களும் நல்லடக்கம் செய்யப்பட்டன. ஜனாஸாவில் பெருந்திரளான மக்கள் பங்கேற்றனர்.
இது தவிர காயமடைந்தவர்கள் வைத்தியசாலையில் தொடர்ந்தும் சிகிச்சை பெற்று வருகின்றனர். வாகனத்தை செலுத்திய சிபான் கைது செய்யப்பட்டநிலையில் பொலிஸ் கண்காணிப்பில் சிகிச்சைபெற்று வருகின்றார்.
இந்தக் கோரவிபத்தை வெறுமனே ஒரு சம்பவமாக மட்டும் எடுத்துக்கொள்ள முடியாது. ஏனெனில், 4 உயிர்களை காவுகொண்ட இந்த விபத்திற்கு பல்வேறு காரணிகளும் இருக்கின்றன.
பிரதானமாக கல்நேவ பிரதேசத்திலுள்ள வைத்தியசாலையின் தரம் குறித்தும் அங்கு வழங்கப்படும் சேவையிலும் பல்வேறு குறைபாடுகள் நிலவுகின்றன. நள்ளிரவில் பிரசவ வேதனையில் தவிக்கின்ற ஒரு தாய்க்கு ஆரம்பநிலை சிகிச்சையளிக்கக்கூடிய வசதி அந்த வைத்தியசாலையில் இருந்ததாகத் தெரியவில்லை. அடுத்தபடியாக 24 மணிநேரமும் சேவை வழங்கவேண்டிய அந்த வைத்தியசாலையில் குறித்த நேரத்தில் யாரும் இல்லாதநிலை காணப்பட்டமை வருந்தத்தக்கதொன்றாகும். இது குறித்து கவனம் செலுத்தப்பட வேண்டும். அத்தோடு குறித்த வைத்தியசாலை அமைந்திருக்கும் தேர்தல் தொகுதியிலிருந்து தெரிவாகியிருக்கும் பாராளுமன்ற உறுப்பினர் இவ்விடயம் குறித்து அதிகூடுதல் கவனம் செலுத்த வேண்டும். குறித்த வைத்தியசாலையில் அம்பியுலன்ஸ் வசதிகள் இல்லை என சுட்டிக்காட்டப்படுகின்றது. அப்படியாயின் தற்போது அரசாங்கத்தால் முன்னெடுக்கப்படும் கம்பெரலிய திட்டத்தினூடாக அவ்வைத்தியசாலைக்கு ஒரு அம்பியுலன்ஸையாவது பெற்றுக்கொடுக்க முன்வர வேண்டும்.
இது தவிர பதற்றமான சூழ்நிலையில் வாகனம் செலுத்துவது கடினமானதே. எனவே, இதற்கான மாற்றுவழிகளை கையாள வேண்டும். குறிப்பாக இந்திய அரசாங்கத்தின் உதவியுடன் நாடுமுழுவதும் ஆரம்பிக்கப்பட்ட 1990 எனும் அவசர இலக்கமுடைய இலவச அம்பியுலன்ஸின் சேவையை பெற்றிருக்க முடியும். இப்படியான சேவைகள் குறித்து நாம் அவதானம் செலுத்துவதினூடாக எதிர்காலங்களில் இவ்வாறான விபத்துகளை தவிர்த்துக்கொள்ள முடியும்.
ஏற்கனவே விபத்துக்குள்ளாகி சிகிச்சை பெற்றுவரும் இம்ரான் ஒரு சாதாரண குடும்பத்தை சேர்ந்தவர். அவரது தந்தை கூலித் தொழிலில் ஈடுபட்டு வருகின்றார். மனைவி, பிள்ளை, தாயின் இழப்பு மட்டுமன்றி சகோதரன் படுகாயமடைந்தது என குடும்பமே ஒரு இக்கட்டான நிலைக்கு தள்ளப்பட்டிருக்கிறது. இவ்வாறானதொரு நிலையில் குறித்த குடும்பத்தினருக்கு குறிப்பிட்டதொரு காலத்திற்கு சமூகத்தின் உதவி தேவைப்படலாம். எனவே, இது குறித்து சமூக தலைமைத்துவங்கள், தொண்டு நிறுவனங்கள், பிரதேச பள்ளிவாசல்களின் நிர்வாகங்கள் பொறுப்புடன் செயற்பட வேண்டும் என்பதே எமது எதிர்பார்ப்பாகும்.
எஸ்.என்.எம்.ஸுஹைல்
vidivelli