குருநாகல் போதனா வைத்தியசாலையின் பிரசவ மற்றும் மகப்பேற்று பிரிவின் வைத்தியர் சேகு ஷியாப்தீன் மொஹமட் ஷாபிக்கு எதிராக முன்வைக்கப்பட்டுள்ள கருத்தடை விவகாரம் தொடர்பிலான குற்றச்சாட்டு குறித்து இது வரை சாட்சிகள் வெளிப்படுத்தப்படவில்லை என்று சாட்சி சுருக்கங்கள் அடங்கிய அறிக்கை ஊடாக குற்றப்புலனாய்வுப் பிரிவு நேற்று குற்றவியல் நீதீமன்ற நீதிபதிக்கு அறிவித்தது.
அத்துடன் வைத்தியர் ஷாபிக்கு எதிராக முன்வைக்கப்பட்ட பயங்கரவாத, அடிப்படைவாத அமைப்புக்களுடன் தொடர்புகளைப் பேணியதாக தெரிவிக்கப்பட்ட விடயமும் உண்மைக்குப் புறம்பானது என விசாரணைகளில் உறுதியாகியுள்ளதாக சீ.ஐ.டி நீதிமன்றுக்கு அறிவித்தது.
வருமானத்தை மீறி சொத்து சேர்த்தமை தொடர்பிலும் விசாரணைகள் முன்னெடுக்கப்பட்டு வரும் நிலையில் அரச சார்பற்ற நிறுவனமொன்றின் ஊடாக நிதி பெற்றமை தொடர்பில் மேலதிக விசாரணைகளுக்காக இரு தனியார் வங்கிகளில் விரிவான அறிக்கையை பெற்றுக் கொள்ளவும் சி.ஐ.டி நீதிமன்ற உத்தரவை பெற்றுக் கொண்டது.
வைத்தியர் மொஹமட் ஷாபியின் விவகாரம் தொடர்பான விசாரணைகள் நேற்று குருநாகல் பிரதான நீதவான் சம்பத் காரியவசம் முன்னிலையில் விசாரணைக்கு எடுத்துக் கொள்ளப்பட்டது. இதன் போது வைத்தியர் ஷாபிக்கு எதிரான குற்றச்சாட்டுக்கள் தொடர்பில் சி.ஐ.டியில் சமூக கொள்ளை தொடர்பிலான விசாரணைப்பிரிவின் உதவி பொலிஸ் அத்தியட்சகர் பி.எஸ்.திசேராவின் கீழ் அப்பிரிவின் பொறுப்பதிகாரி பொலிஸ் பரிசோதகர் நிஷாந்த சில்வாவின் ஆலோசனைக்கு அமைய பொலிஸ் பரிசோதகர் இலங்க சிங்க உள்ளிட்ட குழுவினர் முன்னெடுக்கும் விசாhரணைகளில் வெளிப்படுத்தப்பட்டுள்ள சாட்சியங்களின் சுருக்கம் பி அறிக்கையாக மன்றுக்கு சமர்ப்பிக்கப்பட்டது.
சி.ஐ.டி பொலிஸ் அத்தியட்சகர் அசங்க தலைமையில் உதவி பொலிஸ் அத்தியட்சகர் திசேரா, பொலிஸ் பரிசோதகர் இலங்க சிங்க, சாஜன்
ராஜபக் ஷ, கானஸ்டபில் சில்வா ஆகிய குழுவினர் மன்றில் நேரில் ஆஜராகி இவ்வறிக்கையை சமர்பித்து விசாரணைகளை விளக்கினர்.
வைத்தியர் ஷாபி தற்போது பயங்கரவாத தடைச்சட்டத்தின் கீழ் சி.ஐ.டியில் தடுத்து வைக்கப்பட்டுள்ள நிலையில் நேற்று அவர் மன்றில் ஆஜர் செய்யப்படவில்லை. எனினும் அவர் சார்பில் சிரேஷ்ட சட்டத்தரணி சிராஸ் நூர்தீனின் கீழ் சட்டத்தரணி ஹிஜாஸ் ஹிஸ்புல்லா, பிரேமரத்ன தென்னகோன் , எரந்த குணவர்தன , சைனாஸ் மொஹமட், சிபான் மஹ்ரூப் உள்ளிட்ட சட்டத்தரணிகள் குழு ஆஜரானது.
சட்ட விரோத கருத்தடை காரணமாக பாதிக்கப்பட்டதாகக் கூறப்படும் தாய்மார் சார்பில் சட்டத்தரணி டெனி பெர்னான்டோ , சானக அபேவிக்கிரம , பிரியங்க டயஸ் நிலூசி உள்ளிட்ட குழுவினர் ஆஜராகினர். பிற்பகல் 12.15 கடந்து ஆரம்பிக்கப்பட்ட விசாரணைகளில் சி.ஐ.டி பொலிஸ் அத்தியட்சகர் அசங்க , உதவி பொலிஸ் அத்தியட்சகர் பி.எஸ்.திசேரா ஆகியோர் கருத்துக்களை முன்வைத்தனர். கடந்த மே 24 ஆம் திகதி குறித்த பொலிஸ் அத்தியட்சகர் கீழான விஷேட விசாரணை குழுவால் வைத்தியர் ஷாபி கைது செய்யப்பட்ட நிலையில் மே 24 ஆம் திகதி பதில் பொலிஸ் மா அதிபர் விடுத்த உத்தரவிற்கமைய அது தொடர்பிலான மேலதிக விசாரணைகள் சி.ஐ.டியால் பொறுப்பேற்கப்பட்டதாக பொலிஸ் அத்தியட்சகர் சட்டத்தரணி அசங்க மன்றுக்கு அறிவித்தார். இதன்படி இது வரை 500 க்கும் அதிகமான வாக்கு மூலங்களை பதிவு செய்துள்ளதாகவும் அவர் குறிப்பிட்டார்.
இதனையடுத்து விசாரணை மேற்பார்வை அதிகாரி என்ற ரீதியில் உதவி பொலிஸ் அத்தியட்சகர் பி.எஸ்.திசேரா விசாரணைகளில் வெளிப்படுத்தப்பட்ட விடயங்களை நீதவானுக்கு விளக்கினார். சுமார் இரண்டரை மணித்தியாலம் விளக்கம் நீடித்தது. முதலில் கடந்த மே 23 ஆம் திகதி திவயின தேசிய பத்திரிகையில் வெளியிடப்பட்ட பிரதான தலைப்புச் செய்தியை அடிப்படையாகக் கொண்டு அந்த செய்தி தொடர்பில் பதில் பொலிஸ் மா அதிபரின் உத்தரவுக்கு அமைய விசாரணைகளை ஆரம்பித்ததாகவும் அதன் பின்னர் குருநாகல் பொலிஸார் வைத்தியர் ஷாபியை கைது செய்த நிலையில் அவரையும் பொலிஸ் மா அதிபரின் உத்தரவுக்கமைய அவரையும் பொறுப்பேற்று மேலதிக விசாரணைகளையும் முன்னெடுப்பதாக திசேரா சுட்டிக்காட்டினார்.
இதன் போது உதவி பொலிஸ் அத்தியட்சகர் திசேரா முன்வைத்த விடயங்கள் வருமாறு:
குருநால் பொலிஸாரால் வைத்தியர் ஷாபி பயங்கரவாதத் தடைச்சட்டத்தின் 6 (1) ஆம் பிரிவின் கீழ் கைது செய்யப்பட்டிருந்தார். அப்பிரிவின் கீழ் அவரை 72 மணி நேரம் தடுத்து வைத்து விசாரிக்க அப்போது குருநாகல் பொலிஸ் அத்தியட்சகர் அனுமதி பெற்றிருந்தார். அப்பின்னணியின் கீழ் நாம் அவரைப் பொறுப்பேற்றோம். அதன்படி அவரை விசாரிக்க பயங்கரவாதத் தடைச்சட்டத்தின் 9(1) ஆம் பிரிவின் கீழ் பாதுகாப்பு செயலாளரிடம் 90 நாள் தடுப்புக்காவல் உத்தரவை பெற்றுக் கொண்டோம். இது தொடர்பில் குறுகிய காலத்தில் விரிவான விசாரணையினையும் நடத்தியுள்ளோம்.
குறிப்பாக திவயின பத்திரிகையில் வெளியிடப்பட்ட சர்ச்சைக்குரிய செய்தி தொடர்பில் அச்செய்தியினை எழுதிய ஊடகவியலாளர் ஹேமந்த ரந்துனுவிடமும் அத் தகவலை வழங்கியதாக கூறப்பட்ட குருநாகல் பிரதி பொலிஸ் மா அதிபர் கித்சிறி ஜயலத்திடமும் விசாரணைகள் நடத்தப்பட்டன. இதன் போது குறித்த ஊடகவியலாளர், குறித்த வைத்தியருக்கு எதிரான கருத்தடை குற்றச்சாட்டு தொடர்பில் தன்னிடம் கேட்டதாகவும் அதற்கு அவ்வாறான ஒரு வதந்தி உலா வருவதாக, தான் பதிலளித்ததாகவும் பிரதி பொலிஸ் மா அதிபர் எமக்கு வாக்குமூலம் அளித்துள்ளார். இந்நிலையில் ஊடகவியலாளர் ஹேமந்த ரந்துனு பிரிதி பொலிஸ் மா அதிபர் தெரிவித்த அந்த விடயத்தையும் பேஸ் புக் சமூக வலைத்தளத்தில் உள்ள பதிவொன்றையும் மையப்படுத்தி அந்த செய்தியை எழுதியுள்ளமை தெரியவந்துள்ளது.
அத்துடன் கருத்தடை விவகாரம் தொடர்பில் சீ.ஐ.டி க்கு 615 முறைப்பாடுகள் கிடைக்கப்பெற்றன. அதில் 468 முறைப்பாடுகள் திவயின பத்திரிகை செய்தியை அடுத்து ஏற்பட்ட சந்தேகத்தின் அடிப்படையில் வழங்கப்பட்டுள்ளன. 147 முறைப்பாடுகள் சிசேரியன் சிகிச்சைகளின் பின்னர் குழந்தை பாக்கியம் தடைப்படுவதை மையப்படுத்தி அளிக்கப்பட்டுள்ளது. அத்துடன் வைத்தியர் சாபி செய்த சிசேரியன் சத்திர சிகிச்சைகளின் பின்னர் வைத்தியர் சாபி நேரடியாக தொடர்புபட்டதாக கூறி குருநாகல் வைத்தியசாலைக்கு அளிக்கப்பட்ட 11 விசேட முறைப்பாடுகள் தொடர்பாக விசேடமாக நாம் கவனம் செலுத்தினோம்.
கருப்பை அகற்றப்பட்டமை , பிள்ளை ஒன்றை சட்ட விரோதமாக வேறொரு தரப்புக்கு வழங்கியமை, தனியாக சிசேரியன் சத்திர சிகிச்சை செய்தமை,கருப்பைக்குள் துவாய் ஒன்றை இட்டு துடைத்தமை, பலாத்காரமான எல்.ஆர்.டி சிகிச்சை போன்ற 11 குற்றச்சாட்டுகள் தொடர்பில் நாம் இந்த விசேட அவதானத்தை செலுத்தினோம். இதைத் தொடர்ந்து அவ்வந்த சத்திர சிகிச்சைகளின் போது தொடர்புபட்ட விசேட வைத்திய நிபுணர்கள் சிரேஷ்ட வைத்தியர்கள், உதவி வைத்தியர்கள், தாதியர்கள், உதவியாளர்கள், வேறு விசேட வைத்திய நிபுணர்கள் ஏராளமானவர்களின் சாட்சியங்கள் இதன்போது பதிவு செய்யப்பட்டன. அதன்போது அவற்றில் 9 முறைப்பாடுகள் எவ்வித அடிப்படையும் அற்றவை என்பது தெளிவானது. பிள்ளை ஒன்றை சட்ட விரோதமாக வேறொரு தரப்புக்கு வழங்க முற்பட்டமை உள்ளிட்ட 2 விடயங்கள் தொடர்பில் மட்டும் விசாரணைகளை முன்னெடுக்க முடியுமான சில காரணிகள் முறைப்பாட்டில் அடங்கியுள்ளன.
இதேவேளை வைத்தியர் சாபிக்கு எதிராக பயங்கரவாதிகள் மற்றும் தௌஹீத் ஜமாஅத் அமைப்புடன் தொடர்பு உள்ளதாக குற்றச்சாட்டு முன்வைக்கப்பட்டிருந்து. அது தொடர்பில் நாம் விரிவாக விசாரித்தோம். அவ்வாறான தொடர்புகள் வைத்தியர் சாபிக்கு உள்ளதா என்பது குறித்து தேசிய உளவுத்துறை , பயங்கரவாத புலனாய்வு பிரிவு , முப்படை, அதிரடிப்படை உள்ளிட்ட பயங்கரவாதிகள் தொடர்பாக ஆராயும் நிறுவனங்களிடம் அறிக்கை கோரினோம். அவர்கள் அனைவரும் வைத்தியர் சாபிக்கு அவ்வாறான எந்த தொடர்பும் இல்லை என அறிக்கை அளித்துள்ளனர். குருநாகல் பொலிசார் இந்த விடயத்தில் சரிவர விசாரணைகளை செய்யவில்லை என்பதும் அவர்களது விசாரணைகளில் குளறுபடிகள் உள்ளதையும் அது சார்ந்த எமது விசாரணைகளில் வெளிப்படுத்தப்படுள்ளது.
இதேநேரம் வைத்தியர் சாபி சட்டவிரோதமாக சொத்து சேர்த்தமை தொடர்பில் உள்ள குற்றச்சாட்டு குறித்து விரிவான விசாரணைகள் முன்னெடுக்கப்பட்டு வருகின்றன. வைத்தியர் சாபிக்கு 14 அசையா சொத்துக்கள் உள்ளன.
வற்றின் மொத்த பெறுமதி 5 கோடியே 30 இலட்சத்திற்கும் அதிகமாகும். அவரது மொத்த மாத வருமானம் 19 இலட்சத்து 33 ஆயிரத்திற்கும் அதிகமாகும். வைத்தியர் சாபி 37 மில்லியன் ரூபா பெறுமதியான முதலீடுகளையும் செய்துள்ளார். வைத்தியர் என்ற ரீதியில் தனக்கு கிடைத்த வாகன இறக்குமதி அனுமதிப் பத்திரங்கள் இரண்டை 12 மில்லியன் ரூபாவிற்கு விற்பனை செய்ததாக அவர் கூறுகிறார். தனது சொத்துக்கள், அவற்றை உழைத்த விதம் தொடர்பில் விரிவாக வாக்கு மூலம் தந்துள்ளார். இவற்றில் சந்தேகத்திற்கு இடமான விடயங்கள் இதுவரையில் கண்டறியப்படவில்லை. எனினும் இந்திய அரேபியர் ஒருவருடன் தொடர்புப்பட்டு அரச சார்பற்ற நிறுவனமொன்றினூடாக பணம் பெற்றமை தொடர்பிலான விடயம் தொடர்பில் தொடர்ந்து விசாரணைகள் நடக்கின்றன. அதற்காக அந்த அரச சார்பற்ற நிறுவனத்தின் சார்பில் அமானா, கொமர்ஷியல் வங்கிகளில் உள்ள இரண்டு வங்கிக் கணக்குகள் தொடர்பில் முழுமையான அறிக்கையினை சமர்ப்பிக்க அவ்வங்கிகளுக்கு உத்தரவிடுமாறு வேண்டுகின்றோம். (உத்தரவு பிறப்பிக்கப்பட்டது)
இந்நிலையில் இது வரையான விசாரணைகளின் அடிப்படையில் வைத்தியர் ஷாபியை தொடர்ந்தும் பயங்கரவாத தடைச்சட்டத்தின் கீழ் தடுத்து வைப்பது நியாயமானதாகத் தெரியவில்லை. எனவே அது தொடர்பில் நாம் பாதுகாப்புச் செயலாளரை தெளிவுபடுத்தவுள்ளோம் என்றார். இதனைத் தொடர்ந்து வைத்தியர் ஷாபி சார்பில் அவரது சட்டத்தரணி ஷிராஸ் நூர்தீன் மன்றுக்கு கருத்துக்களை முன்வைத்தார்.
வைத்தியர் ஷாபி அடிப்படையற்ற குற்றச்சாட்டுக்களுக்காக சாட்சிகளின்றி கைது செய்யப்பட்டுள்ளதாக அவர் இதன் போது சுட்டிக்காட்டினார். இதன் போது பாதிக்கப்பட்டதாகக் கூறப்படும் தாய்மார் சார்பில் வாதங்களை முன்வைத்த சட்டத்தரணி பெர்னாண்டோ சி.ஐ.டியின் விசாரணைகள் பக்கச்சார்பாக இடம்பெறுவதாகக் சுட்டிக்காட்டினார். அத்துடன் ஏற்கனவே நீதிமன்றில் உத்தரவிட்டுள்ள முறைப்பாடளித்த பெண்களை கொழும்பில் பரிசோதனைக்கு உட்படுத்துவதற்கான உத்தரவை ரத்துச் செய்யுமாறும் அவர் கூறினார். அந்த பரிசோதனைகள் ஊடாக தாய்மார் மலட்டுத்தன்மைக்கு உட்படுவதற்கான வாய்ப்புக்கள் இருப்பதாகவும், புற்று நோய் போன்ற வேறு சில அபாயகரமான விளைவுகள் அப்பரிசோதனைகளைத் தொடர்ந்து ஏற்பட வாய்ப்புள்ளதால் அதனை எதிர்ப்பதாகவும் அவர் வாதிட்டார். இதனையடுத்து கொழும்பில் மருத்துவ பரிசோதனை செய்வதற்கான நீதிமன்ற உத்தரவை பிரதான நீதவான் சம்பத் காரியவசம் ரத்து செய்ததுடன் மருத்துவ சபையுடன் கலந்தாலோசித்து பொருத்தமான சோதனை முறைமையொன்றை இரு வாரங்களுக்குள் மன்றுக்குத் தெரியப்படுத்துமாறும் கட்டளையிட்டார். இதனையடுத்து இந்த விவகாரம் குறித்த விசாரணைகள் ஜூலை 11 ஆம் திகதிக்கு ஒத்திவைக்கப்பட்டது.
நேற்றைய வழக்கு விசாரணைகளின் போது கருத்தடை விவகாரம் குறித்து தொடர்ந்து பேசி வரும் பாராளுமன்ற உறுப்பினர் அத்துரலியே ரத்ன தேரர், குருநாகல் போதனா வைத்தியசாலையின் பணிப்பாளர், உதவி பணிப்பாளர் உள்ளிட்டோரும் பாதிக்கப்பட்டதாகக் கூறப்படும் தாய்மார் சிலரும் மன்றில் ஆஜராகியிருந்தமை குறிப்பிடத்தக்கது.
(குருநாகல் நீதிமன்றிலிருந்து எம்.எப்.எம்.பஸீர், யூ.எல். முஸம்மில்)