வைத்தியசாலைகள் அருகே முன்னெடுக்கப்பட்டு வந்த ‘ஜனபோஷ’ இலவச உணவுத் திட்டம் இடைநிறுத்தம்
கருத்தடை மாத்திரைகளை கலப்பதாக வெளியான செய்தியை தொடர்ந்து நடவடிக்கை; தான் அவ்வாறு கூறவில்லை என்கிறார் காமினி லொக்குகே
வைத்தியசாலைகளுக்கு வருகை தரும் ஏழை மக்களுக்காக முஸ்லிம் தனவந்தர் ஒருவரின் பங்களிப்புடன் முன்னெடுக் கப்பட்டு வந்த ‘ஜனபோஷ’ எனும் பெயரிலான இலவச உணவு வழங்கும் திட்டத்தை நேற்று முதல் இடைநிறுத்தியுள்ளதாக அதனை முன்னெடுத்து வந்த ‘ஜனபோஷ பவுண்டேசன்’ தெரிவித்துள்ளது.
குறித்த உணவில் கருத்தடை மாத்திரைகளை கலந்து பொதுமக்களுக்கு வழங்குவதாக பொதுஜன பெரமுனவின் முக்கியஸ்தரும் முன்னாள் அமைச்சருமான காமினி லொகுகே தெரிவித்ததாகக் கூறி சிங்களப் பத்திரிகையொன்று செய்தி வெளியிட்டதைத் தொடர்ந்தே இத்திட்டத்தை இடைநிறுத்த வேண்டிய ஏற்பட்டதாக அறிய வருகிறது.
கொழும்பு தேசிய வைத்தியசாலை, மஹரகம அபேக் ஷா (புற்றுநோய்) வைத்தியசாலை மற்றும் களுபோவில வைத்தியசாலை ஆகியவற்றுக்கு சிகிச்சை பெற வரும் நோயாளிகள் மற்றும் அவர்களைப் பார்வையிட வரும் உறவினர்களில் தேவையுடையோருக்கு காலை மற்றும் பகல் உணவுகள் இலவசமாக வழங்கப்பட்டு வந்தன.
‘ஜனபோஷ’ எனும் பெயரில் 2012 ஆம் ஆண்டு முதல் முன்னெடுக்கப்பட்டு வந்த இந்தத் திட்டத்தினால் மூன்று வைத்தியசாலைகளிலும் தினமும் சுமார் 1500 பொது மக்கள் இலவசமாக உணவுகளைப் பெற்று வந்தனர்.
மிகவும் தரமான முறையில் சுகாதார ஒழுங்குகளைப் பேணி முன்னெடுக்கப்பட்டு வந்த இந்தத் திட்டத்திற்கு அரசாங்கத்தின் பூரண அனுமதி கிடைக்கப் பெற்றுள்ளதுடன் சுகாதாரப் பரிசோதகர்களின் சான்றிதழ்களும் வழங்கப்பட்டுள்ளன.
இந்நிலையில் குறித்த அரசியல்வாதியை மேற்கோள்காட்டி வெளியிடப்பட்ட பத்திரிகை செய்தியைத் தொடர்ந்து, தமது ஜனபோஷ நிலையத்தின் மீதும் அங்கு பணிபுரிவோர் மீதும் தாக்குதல்கள் நடத்தப்படலாம் என்ற அச்சத்தில் இத்திட்டத்தை இடைநிறுத்த வேண்டி ஏற்பட்டுள்ளதாக ஜனபோஷ பவுண்டேசனின் ஊடக அறிக்கையில் மேலும் தெரிவிக்கப்பட்டுள்ளது.
இதற்கிடையில் தான் அவ்வாறானதொரு கருத்தை வெளியிடவில்லை என்றும் குறித்த சிங்கள பத்திரிகை உண்மைக்குப் புறம்பான செய்தியை வெளியிட்டுள்ளதாகவும் முன்னாள் அமைச்சர் காமினி லொகுகே தெரிவித்துள்ளார்.
தற்போது சிங்கப்பூரில் தங்கியுள்ள அவர் விடுத்துள்ள விசேட அறிவித்தல் ஒன்றில், ”திவய்ன பத்திரிகையில் இவ்வாறான ஒரு செய்தி வெளியிடப்பட்டுள்ளமை குறித்து எனது நண்பரான முன்னாள் ஆளுநர் அலவி மெளலானாவின் மகன் என்னைத் தொடர்புகொண்டு கேட்டார். அத்துடன் தற்போதைய மேல் மாகாண ஆளுநர் முஸம்மிலும் என்னுடன் உரையாடினார். நான் அவ்வாறான ஒரு கருத்தை பொது இடம் ஒன்றிலோ அல்லது தனி நபர்கள் எவரிடமோ கூறவில்லை. அந்த செய்தியில் குறிப்பிடப்பட்ட விடயங்களை நான் முற்றாக மறுக்கிறேன்” என அவர் அதில் தெரிவித்துள்ளார்.
இதேவேளை, ‘ஜனபோஷ பவுண்டேசன்’ விடுத்துள்ள ஊடக அறிக்கையில் தெரிவிக்கப்பட்டுள்ளதாவது, ”ஆழ்ந்த கவலையுடனும் கனத்த இதயத்துடனும் இன்று முதல் (25.06.2019) வைத்தியசாலைகளில் இலவச உணவு வழங்கும் எமது திட்டத்தை இடைநிறுத்திக் கொள்கிறோம். 2012 ஆம் ஆண்டு முதல் கொழும்பு தேசிய வைத்தியசாலையில் எமது சேவை ஆரம்பிக்கப்பட்டது. பின்னர் 2016 இல் களுபோவில வைத்தியசாலையிலும் 2017 இல் மஹரகம புற்றுநோய் வைத்தியசாலையிலும் எமது சேவைகளை விஸ்தரித்தோம். இதன் மூலமாக இன, மத வேறுபாடுகளுக்கப்பால் வருடாந்தம் சுமார் 5 இலட்சம் ஏழை மக்களுக்கு உணவளித்து வந்தோம். எனினும் ஏழைகளுக்கும் ஆதரவற்றோருக்கும் உதவும் எமது உன்னத நோக்கத்திற்கு களங்கம் ஏற்படுத்தும் வகையில் தவறான தகவல்கள் பரப்பப்படுவது பற்றி எமக்கு அறியக் கிடைத்துள்ளது. இந்நிலையில் வேறு வழியின்றி எமது சேவையை மேற்படி மூன்று வைத்தியசாலைகளிலும் இடைநிறுத்திக் கொள்ள வேண்டிய நிர்ப்பந்தம் ஏற்பட்டுள்ளது.
ந்தப் பணிக்காகத் தம்மை அர்ப்பணித்துச் சேவையாற்றி வந்த எமது பணியாளர்களின் பாதுகாப்பு குறித்து நாம் கவனம் செலுத்த வேண்டியுள்ளது. ஏதேனும் இன வன்முறைகள் மூலமாக எமது பணியாளர்கள் பாதிக்கப்பட்டுவிடக் கூடாது என்பதை நாம் உறுதிப்படுத்த வேண்டியுள்ளது. எமது இந்த சேவைக்கு பங்களிப்பு செய்த அனைவருக்கும் இத் தருணத்தில் நன்றி கூறுகிறோம்” என குறித்த ‘ஜனபோஷ பவுண்டேசன்’ விடுத்துள்ள ஊடக அறிக்கையில் சுட்டிக்காட்டப்பட்டுள்ளது.
vidivelli