அவிசாவளை–புவக்பிட்டிய தமிழ் மகா வித்தியாலயத்தில் கடமையாற்றிய முஸ்லிம் ஆசிரியைகள் அபாயா அணிந்து வருவதற்கு எதிர்ப்புத் தெரிவித்து தடைவிதிக்கப்பட்டதனையடுத்து தற்காலிக இடமாற்றம் பெற்றிருந்த ஆசிரியைகள் மீண்டும் அப்பாடசாலைக்குச் செல்வதற்கு பழைய மாணவர்களாலும், பெற்றோர்களாலும் தொடர்ந்தும் எதிர்ப்புத் தெரிவிக்கப்பட்டது.
கடந்த 17 ஆம் திகதி புவக்பிட்டிய தமிழ் மகா வித்தியாலயத்திற்கு கடமைக்குச் செல்லவிருந்த குறிப்பிட்ட ஆசிரியைகள் தொடர்ந்து எதிர்ப்பு வெளியிடப்பட்டதையடுத்து கடமைக்குச் செல்லாது மேல் மாகாண ஆளுநர் எம்.ஜே.எம்.முஸம்மிலைச் சந்தித்து முறைப்பாடு செய்தனர்.
புவக்பிட்டிய தமிழ் மகா வித்தியாலய முஸ்லிம் ஆசிரியைகளுக்குத் தொடர்ந்து பாதுகாப்பு வழங்கமுடியாதெனவும், ஒரு நாள் மாத்திரமே பாதுகாப்புத் தரலாம் என அவிசாவளைப் பொலிஸார் தெரிவித்தனர். மேல் மாகாண கல்விப் பணிப்பாளர் பி.ஸ்ரீலால் நோனிஸை ஆளுநர் தொடர்பு கொண்டபோது அவரும் பாதுகாப்புக்கு உத்தரவாதமளிக்க முடியாதெனத் தெரிவித்தார்.
இந்நிலையில் புவக்பிட்டிய தமிழ் மகா வித்தியாலயத்தில் கடமையாற்றிய 15 முஸ்லிம் ஆசிரியைகளுக்கும் வேறு பாடசாலைகளுக்கு நிரந்தர இடமாற்றம் வழங்குமாறு மேல்மாகாண ஆளுநர் முஸம்மில் மேல் மாகாண கல்விப்பணிப்பாளர் பி.ஸ்ரீலால் நோனிஸிடம் வேண்டுகோள் விடுத்தார்.
இதற்கிணங்க 15 முஸ்லிம் ஆசிரியைகளும் மேல் மாகாணத்தின் முஸ்லிம் பாடசாலைகளுக்கு நேற்று முன்தினம் 18 ஆம் திகதி முதல் இடமாற்றம் செய்யப்பட்டுள்ளனர்.
புவக்பிட்டிய தமிழ் மகா வித்தியாலயத்தில் கடமையாற்றிய குறிப்பிட்ட ஆசிரியைகள் அபாயா அணிந்து கடமைக்கு வருவதற்கு எதிர்ப்புத் தெரிவித்து தடைவிதிக்கப்பட்டமையால் முன்னாள் மேல்மாகாண ஆளுநர் அசாத் சாலியினால் ஆசிரியைகளுக்கு தற்காலிக இடமாற்றம் வழங்கப்பட்டிருந்தமை குறிப்பிடத்தக்கது.
இது தொடர்பில் சம்பந்தப்பட்ட ஆசிரியைகளில் ஒருவரை ‘விடிவெள்ளி’ தொடர்பு கொண்டு வினவியபோது, ‘தற்காலிகமாக இடமாற்றம் பெற்றிருந்த நாங்கள் மீண்டும் புவக்பிட்டிய தமிழ் மகாவித்தியாலயத்துக்கு கடமைக்குச் செல்ல வேண்டியிருந்தது. தொடர்ந்தும் அபாயாவுக்கு எதிர்ப்புத் தெரிவித்து பாடசாலை நுழைவாயிலில் ஒரு குழுவினர் காத்திருப்பதாக எமக்குத் தகவல் கிடைத்ததால் கடந்த 17 ஆம் திகதி நாங்கள் கடமைக்குச் செல்லவில்லை. மேல்மாகாண ஆளுநரிடம் முறையிட்டதையடுத்து தற்போது எங்களுக்கு கொழும்பு மாவட்ட முஸ்லிம் பாடசாலைகளுக்கு நிரந்தர இடமாற்றம் வழங்கப்பட்டுள்ளது’ என்றார்.
-Vidivelli