இன்று சர்வதேசத்தின் முழுப்பார்வையும் சூடான் என்ற நாட்டின் மீதே படிந்துள்ளது. அதற்குக் காரணம் அந்த நாட்டில் இடம்பெறும் தொடர்ச்சியான போராட்டங்களும் மக்களுக்கு இழைக்கப்படும் அநீதிகளுமேயாகும்.
சூடான் நாட்டை சுமார் 30 வருடங்களாக ஒமர் அல் பஷீர் ஆட்சி செய்து வந்தார். ஒமரின் ஆட்சியால் அதிருப்தி அடைந்த மக்கள் நாடு முழுவதும் ஒமரை பதவி விலகுமாறு கூறி ஆர்ப்பாட்டங்களை கட்டவிழ்த்து விட்டனர். அதனைத் தொடர்ந்து கடந்த ஏப்ரல் மாதம் இராணுவத்தால் ஒமர் கைது செய்யப்பட்டதுடன் பதவி கவிழ்க்கப்பட்டார். இதனால் 1989 இல் ஒமர் தொடங்கி வைத்த 3 தசாப்த ஆட்சி முடிவுக்கு வந்தது.
ஒமரின் பதவி கவிழ்ப்பைத் தொடர்ந்து சூடானின் ஆட்சியை இராணுவம் கைப்பற்றியது. ஆட்சியின் தலைவராக சூடான் இராணுவ சபையின் பிரதித் தலைவர் ஜெனரல் முஹம்மத் ஹம்தான் டகாலோ நியமிக்கப்பட்டார்.
எனினும் ஒமர் ஆட்சி செய்தபோது அவரது ஆட்சிக்கு எந்தளவு எதிர்ப்பு எழுந்ததோ அதே அளவு எதிர்ப்பு இராணுவ சபையின் ஆட்சிக்கு எதிராகவும் எழுந்தது. மக்களாட்சி நிலை நாட்டப்பட வேண்டும் என சூடான் மக்கள் தடைகளை தாண்டி போராடிவருகின்றனர். இந்தப் போராட்டத்தை அடக்க இராணுவம் வன்முறைகளையும் மனிதாபிமானமற்ற அடக்குமுறைகளையும் கட்டவிழ்த்துவிட்டுள்ளமை சர்வதேசத்தின் கவனயீர்ப்பைப் பெற்றுள்ளது.
நடந்தது என்ன?
சூடான் மக்கள் இராணுவத்துடைய ஆட்சியில் திருப்தியடையவில்லை. மக்களை மக்களே ஆட்சி செய்யும் ஜனநாயக வழியொன்றை மக்கள் விரும்பினர். ஜனநாயக ஆட்சியொன்றை தோற்றுவிப்பதாயின் அதற்கு 3 வருட கால அவகாசம் தேவை என இராணுவத் தரப்பில் இருந்து ஜனநாயக ஆட்சியை கோரும் குழுவின் பிரதிநிதிகளிடம் தெரிவிக்கப்பட்டது. என்ற போதிலும் இராணுத்தின் இந்த முடிவுக்கு மக்கள் எதிர்ப்பு தெரிவித்த வண்ணமேயுள்ளனர்.
மக்களாட்சிதான் வேண்டும் என போராட்டக்காரர்கள் விடாப்பிடியாக இருந்தார்கள். போராட்டத்தின் உச்சகட்டமாக இராணுவத்தின் தலைமையகம் முன்பு பெருமளவிலான மக்கள் போராட்டத்தில் ஈடுபட்டனர். அதனைத் தொடர்ந்து மக்களாட்சிக்கு ஆதரவான பிரதிநிதிகளிடம் பேச்சுவார்த்தை நடத்த இராணுவம் இசைந்தது. இந்த பேச்சுவார்த்தை முடிவில் 3 வருட காலத்தில் தேர்தலை நடத்த இரு தரப்பும் ஒப்புக்கொண்டது.
இந்நிலையில்தான் கடந்த திங்கட்கிழமை தினத்தன்று நிராயுதபாணிகளாக போராட்டம் நடத்திக் கொண்டிருந்த பொது மக்கள் மீது ஆயுதம் தாங்கிய பாதுகாப்பு படையினர் துப்பாக்கிச் சூடு நடத்தியுள்ளனர். இதில் 100 பேர்வரை உயிரிழந்துள்ளதாக உத்தியோகபூர்வமற்ற தகவல்கள் தெரிவிக்கின்றபோதும் 46 பேரை தாம் கொன்றுள்ளதாக சூடான் இராணுவம் ஒப்புக் கொண்டுள்ளது. மற்றுமொரு தகவலில் 500 பேர் வரை கொல்லப்பட்டுள்ளதாக கூறப்படுகிறது.
இந்தத் துப்பாக்கிச்சூட்டை தொடர்ந்து ஜெனரல் முஹம்மத் ஹம்தான் டகாலோ ஒப்பந்தங்களை இரத்துச் செய்வதாக அறிவித்துள்ளார். மேலும் எதிர்வரும் 9 மாத கால இடைவெளியில் தேர்தல் நடத்தப்படும் எனவும் தெரிவித்துள்ளார். கடந்த புதன்கிழமையன்று எந்தவித நிபந்தனைகளுமின்றி போராட்டக்குழுவுடன் பேச்சுவார்த்தை நடத்த புர்கான் இணங்கியபோதும் போராட்டக் குழு பேச்சுவார்த்தை நடத்த மறுத்துள்ளது.
துப்பாக்கிச் சூட்டில் பெருமளவிலான மக்கள் உயிரிழந்ததால் மக்கள் இராணுவத்தின் மீது கடுங்கோபத்துடன் இருக்கிறார்கள். இதனாலேயே போராட்டங்களுக்கு தலைமை தாங்கிய ஸ்பா எனும் அமைப்பின் பேச்சாளர் அம்ஜத் பரீட் “சூடான் மக்கள் பேச்சுவார்த்தைக்கு தயாராக இல்லை” எனத் தெரிவித்தார். தற்காலிகமாக ஆட்சி நடத்தும் இராணுவ கவுன்ஸிலானது மக்களைக் கொல்கிறது. அவர்களோடு பேச்சுவார்த்தை நடத்த மக்கள் தயாராக இல்லை என அவர் ஊடகங்களுக்கு தெரிவித்தார்.
இதற்கு பதிலளித்துள்ள இராணுவம் “நாட்டில் குழப்பம் ஏற்பட நாம் ஒரு போதும் அனுமதிக்கமாட்டோம். நாட்டில் சட்ட திட்டங்களை மக்கள் மதித்து நடப்பது உறுதி செய்யப்பட வேண்டும். அதற்கான நடவடிக்கையை நாம் எடுப்போம்” என தெரிவித்துள்ளது.
கார்டூம் நகரில் மக்கள் இவ்வாறு கொல்லப்படுவதும் சித்திரவதை செய்யப்படுவதும் இது முதல் தடவையல்ல. ஏப்ரலில் இராணுவம் ஆட்சியை பொறுப்பேற்றது முதல் இந்த இன்னல்களை மக்கள் அனுபவித்து வருகின்றனர். துணை இராணுவப் படையினர் பொது மக்களுடைய வசிப்பிடங்களுக்குச் சென்று அங்குள்ள மக்களை சுட்டு வீழ்த்தியுள்ளனர். மேலும் கத்தி, அரிவாள் போன்ற ஆயுதங்களால் அங்கங்களை துண்டாக்கியுமுள்ளனர்.
நைல் நதியில் சடலங்கள்
சூடான் இராணுவத்தினால் சிறுவர்கள், பெண்கள் மற்றும் ஆண்கள் என 100 இற்கும் மேற்பட்டவர்கள் கொல்லப்பட்டுள்ளனர். கடந்த வாரம் புதன்கிழமையன்று கார்டூம் நகருக்கு விஜயம் செய்த வைத்தியர் குழுவொன்று வெளியிட்டுள்ள அறிக்கையின்படி நைல் நதியில் இருந்து 40 சடலங்கள் மீட்கப்பட்டுள்ளதை உறுதி செய்துள்ளது.
குறித்த 40 சடலங்களும் வைத்தியசாலையில் பிரேத பரிசோதனைகளுக்காக வைக்கப்பட்டுள்ள நிலையில் உயிரிழந்த அனைவரும் போராட்டத்தில் ஈடுபட்டவர்கள்தான் என்பது உறுதி செய்யப்பட்டுள்ளது. தமது உரிமைக்காக போராடிய மக்களை அரசாங்கமே வெட்டி ஆற்றில் வீசியுள்ள சம்பவம் சர்வதேசத்தை அதிர்ச்சிக்குள்ளாக்கியுள்ளது. கொல்லபட்டவர்களுள் பலர் நீரில் மூழ்கடிக்கப்பட்டும் வெட்டியும் கொல்லப்பட்டுள்ளனர்.
பாதிக்கப்பட்ட மக்கள்
மக்களாட்சி வேண்டும் என போராட்டம் நடத்திய ஒரே காரணத்துக்காக சூடானில் மக்கள் கொன்று குவிக்கப்பட்டுள்ளார்கள். பலர் அங்கங்கள் துண்டாக்கப்பட்ட நிலையில் படுகாயமடைந்துள்ளார்கள். இத்தனை இன்னல்களை அனுபவித்த பின்னரும் தமக்கு மக்களாட்சி வேண்டும் என்ற நிலைப்பாட்டில் இருந்து சூடானியர்கள் தளராமல் இருக்கிறார்கள்.
சூடான் இராணுவத்தினர் பொது மக்களை அடித்துக் காயப்படுத்தும் காணொலிகள் சமூக வலைத்தளங்களில் வைரலாகி பெரும் பரபரப்பை ஏற்படுத்தியுள்ளது. மிருகத்தனமான முறையில் தாக்கப்பட்டு வைத்தியசாலையில் அனுமதிக்கப்பட்டுள்ள ஒருவர் தெரிவித்த கருத்தின்படி சுமார் 10 பேரை அவர் முன்னிலையில் இராணுவத்தினர் கொன்றுள்ளார்கள்.
மேலும் ரமழான் காலத்தில் நோன்பிருந்த ஒருவர் கடுமையாக கொடுமைப்படுத்தப்பட்டுள்ளார். நோன்பாளியான அவர், கழிவு நீரை குடிக்கும்படி நிர்பந்திக்கப்பட்டுள்ளார். இதேபோல பலர் துன்புறுத்தப்பட்டதாகவும் அவர் தெரிவித்தார். மேலும் அவருடைய தலைமுடியை தீயினால் எரித்துமுள்ளனர்.
“நாங்கள் வீட்டை விட்டுவிட்டு வெளியே வர முடியாத நிலைமை உள்ளது. ஏன் என்றால் நாம் வெளியே வந்தால் பாதுகாப்பு படையினரால் கொல்லப்படுவோம்” என தனது பெயரை வெளியிட விரும்பாத ஒருவர் தெரிவித்தார்.
மக்கள் வைத்தியசாலையில் சிகிச்சை பெறுவதை தடுக்கும் வகையில் கார்டூம் நகரில் உள்ள வைத்தியசாலைகளையும் மருத்துவ நிலையங்களையும் பாதுகாப்புப் படையினர் மூடி வருவதாக அங்கிருந்து வரும் செய்திகள் தெரிவிக்கின்றன.
“அவர்கள் மக்களை மிரட்டுகிறார்கள். ஆயுதங்களை பிரயோகிக்கிறார்கள். நாங்கள் பாதுகாப்பாக உணரவில்லை. எங்களுக்கு பாதுகாப்பு படை மீது நம்பிக்கையும் இல்லை” என கார்டூமில் வசிக்கும் சுலைமா என்ற பெண் தெரிவித்தார்.
ஐ.நா. கண்டனம்
சூடானில் இராணுவத்தினரால் போராட்டத்தில் ஈடுபட்ட மக்கள் இரக்கமற்ற முறையில் கொல்லப்பட்டதற்கு எதிராக ஐ.நா. வின் பாதுகாப்பு அமைப்பு கண்டனம் வெளியிட்டுள்ளது.
மனிதாபிமானமற்ற முறையில் இவ்வாறு மக்கள் கொல்லப்பட்டமையானது மனித உரிமை மீறல் என ஐ.நா. தெரிவித்துள்ளது. மேலும் சீனா மற்றும் ரஷ்யா ஆகிய நாடுகளும் சூடானுக்கு எதிராக இதேபோன்ற கண்டனத்தை தெரிவித்துள்ளன.
சூடான் இராணுவம் சுமார் 100 இற்கும் மேற்பட்டவர்களை கொன்றுள்ளதாக ஐ.நா. குற்றம் சுமத்தியது என்ற போதிலும் சூடான் இராணுவம் இந்தக் குற்றச்சாட்டை மறுத்து வருவதுடன் 46 பேரை தாம் கொன்றதாக ஒப்புக்கொண்டுள்ளது.
-Vidivelli