கப்பலின் சுக்கான் படம் பொறிக்கப்பட்ட ஆடையணிந்திருந்த முஸ்லிம் பெண்மணி பௌத்த தர்மசக்கரம் பொறிக்கப்பட்ட ஆடை அணிந்திருக்கிறார் என தவறாக ஹஸலக பொலிஸாரினால் குற்றம் சுமத்தப்பட்டு கைது செய்து விளக்கமறியலில் வைக்கப்பட்டமையினால் தனது அடிப்படை உரிமை மீறப்பட்டுள்ளமை காரணமாக தனக்கு நஷ்டஈடு பெற்றுத்தருமாறு உயர் நீதிமன்றில் அடிப்படை உரிமை மீறல் மனுவொன்றினைத் தாக்கல் செய்துள்ளார். கடந்த வெள்ளிக்கிழமை இந்த அடிப்படை உரிமை மீறல் வழக்கு தாக்கல் செய்யப்பட்டுள்ளது. கொலன்கொட புதலுகஸ்யாய பகுதியை வசிப்பிடமாகக் கொண்ட அப்துல் ரஹீம் மஸாஹிமா எனும் முஸ்லிம் பெண்மணியினால் தாக்கல் செய்யப்பட்டுள்ள அடிப்படை உரிமை மீறல் மனுவில் பிரதிவாதிகளாக சட்டமா அதிபர், ஹஸலக பொலிஸ் நிலைய பொறுப்பதிகாரி சந்தன நிசாந்த மற்றும் பொலிஸ் மா அதிபர் ஆகியோர் பெயர் குறிப்பிடப்பட்டுள்ளனர்.
சட்டத்தரணிகளான ஹரினி ஜயவர்தன, புலஸ்தி ஹேவாமான்ன மற்றும் ஜனாதிபதி சட்டத்தரணி ஜே.சி. வெலிஅமுன ஆகியாரின் ஆலோசனைக்கமைவாக இந்த அடிப்படை உரிமை மீறல் மனு தாக்கல் செய்யப்பட்டுள்ளதாக தெரிவிக்கப்படுகிறது.
முறைப்பாட்டாளர் ஒரு பிள்ளையின் தாயாராவார். அவர் சிறிது காலம் சவூதி அரேபியாவில் பணிப்பெண்ணாகத் தொழில் புரிந்ததன் பின்பு நாடு திரும்பி ஆடைகள் தைப்பதை தொழிலாகக் கொண்டவராவார்.
கடந்த மே மாதம் 17 ஆம் திகதி காலை 10.30 மணியளவில் பொலிஸ் உத்தியோகத்தர்கள் சிலர் ஜீப் வண்டியொன்றில் பெண்மணியின் வீட்டுக்கு சென்றுள்ளனர். அவர்களில் ஒரு பொலிஸ் உத்தியோகத்தர் தர்மசக்கரம் பொறிக்கப்பட்ட ஆடை அணிந்து பாதையில் பயணித்தமை தொடர்பாக அப்பெண்ணிடம் விசாரணை மேற்கொண்டுள்ளார். அந்த ஆடை தான் பணிப்பெண்ணாக வேலை செய்த நாட்டில் எஜமானர் மூலம் தனக்குக் கிடைத்ததாக அப்பெண் பதிலளித்துள்ளார். அச்சமயத்தில் அங்கு சென்றிருந்த ஹசலக பொலிஸ் நிலையப் பொறுப்பதிகாரி அவரைக் கைது செய்வதற்கு உத்தரவிட்டுள்ளார்.
பின்பு அப்பெண் பொலிஸ் நிலையத்துக்கு அழைத்துச்செல்லப்பட்டார். அவர் தண்டனைச் சட்டக்கோவை 291 பி பிரிவின் கீழ் மஹியங்கனை நீதிவான் நீதிமன்ற நீதிபதியின் முன்னிலையில் ஆஜர்படுத்தப்பட்டபோது ஜூன் மாதம் 3 ஆம் திகதிவரை விளக்கமறியலில் வைக்க உத்தரவிடப்பட்டு பதுளை சிறைச்சாலையில் விளக்கமறியலில் வைக்கப்பட்டார். பின்பு 3 ஆம் திகதி நீதிமன்றில் ஆஜர்படுத்தப்பட்டு பிணையில் விடுதலை செய்யப்பட்டார். முறைப்பாட்டாளரான பெண் அணிந்திருந்த ஆடையில் பொறிக்கப்பட்டிருந்தது தர்மசக்கரம் அல்ல கப்பலின் சுக்கான் படம் என நிரூபிக்கப்பட்டுள்ளது. அதன் அடிப்படையில் அப்பெண் கைது செய்யப்பட்டமை சட்டத்துக்கு முரணானதாகும். இதனால் குறிப்பிட்ட மனுவினை விசாரணைக்கு எடுத்துக்கொள்வதற்கு அனுமதி வழங்கும்படியும் அடிப்படை உரிமை மீறப்பட்டுள்ளதாக அறிவிக்கும்படியும் அதற்கு நஷ்டஈடு பெற்றுத்தரும்படியும் அத்தோடு இதில் தொடர்புபட்ட அதிகாரிகள் மீது விசாரணை மேற்கொண்டு தண்டனை பெற்றுக்கொடுக்கும்படியும் மனுவில் தெரிவிக்கப்பட்டுள்ளது.
-Vidivelli