இலங்கையில் இடம்பெற்ற உயிர்த்த ஞாயிறு குண்டுத் தாக்குதல்களுடன் தொடர்புடைய பிரதான சந்தேக நபராகக் கருதப்படும் ஹயாத்து மொஹம்மட் அஹமட் மில்ஹான், இன்டர்போல் என்றறியப்படும் சர்வதேச பொலிஸினால் வெளியிடப்பட்ட சிவப்பு அறிவித்தலைத் தொடர்ந்தே மத்திய கிழக்கில் வைத்து கைது செய்யப்பட்டுள்ளதாக அறிவிக்கப்பட்டுள்ளது. இதனை இன்டர்போல் தனது இணையதளத்தில் உறுதிப்படுத்தியுள்ளது.
மில்ஹானின் கைதானது இலங்கை குண்டுத் தாக்குதல்கள் தொடர்பில் முன்னெடுக்கப்பட்டு வரும் விசாரணைகளில் முக்கிய நகர்வாக கருதப்படுவதாக இன்டர்போலின் செயலாளர் நாயகம் ஜேர்கன் ஸ்டொக் தெரிவித்துள்ளார்.
பயங்கரவாதம் மற்றும் படுகொலைகள் குறித்த குற்றச்சாட்டுக்களின் கீழேயே மில்ஹான் தேடப்பட்டு வந்ததாக குறிப்பிட்டுள்ள இன்டர்போல், இவருடன் சேர்த்து மேலும் நான்கு இலங்கையர்கள் கைது செய்யப்பட்டதாகவும் அவர்களும் கடந்த வெள்ளிக்கிழமை இலங்கைக்கு அழைத்துவரப்பட்டுள்ளதாகவும் தெரிவித்துள்ளது.
உயிர்த்த ஞாயிறன்று இலங்கையில் இடம்பெற்ற தொடர் தற்கொலை குண்டுத் தாக்குதலுடன் தொடர்புடைய பிரதான சந்தேக நபர்களில் ஒருவராக கருதப்படும், குறித்த கொடூர தாக்குதல்களை நடாத்திய தேசிய தெளஹீத் ஜமாஅத் எனும் அமைப்பின் ஸ்தாபகர் சஹ்ரான் ஹாஷிம் எனும் பயங்கரவாதியின் கீழ் செயற்பட்ட குழுவின் ஆயுதப் பிரிவுக்கு பொறுப்பாக இருந்த அஹமட் மில்ஹான் என அறியப்படும் 30 வயதான ஹயாத்து மொஹம்மட் அஹமட் மில்ஹான், சவூதி அரேபியாவில் கைது செய்யப்பட்டிருந்த நிலையில் கடந்த வெள்ளிக்கிழமை இலங்கைக்கு அழைத்து வரப்பட்டார்.
அத்துடன் குறித்த பயங்கரவாத தாக்குதல்கள் தொடர்பில் மிக அவசியமான, பயங்கரவாதி சஹ்ரானுக்கு மிக நெருக்கமான தேசிய தெளஹீத் ஜமா அத் அமைப்பின் அனுராதபுர மாவட்ட தலைவராக கருதப்படும் அபுசாலி அபூபக்கர் உள்ளிட்ட மேலும் நால்வரையும், அஹமட் மில்ஹானுடன் சேர்த்து சி.ஐ.டி. எனப்படும் குற்றப் புலனாய்வுப் பிரிவு சவூதி அரேபியாவின் ஜித்தாவில் இருந்து இலங்கைக்கு கைது செய்து அழைத்து வந்தது. உதவி பொலிஸ் அத்தியட்சகர் ஒருவரின் கீழ் சவூதி அரேபியாவுக்கு சென்ற சிறப்பு சி.ஐ.டி. குழு, ஜித்தாவில் அவர்களைப் பொறுப்பேற்று வெள்ளிக்கிழமை அதிகாலை 4.00 மணிக்கு கட்டுநாயக்க விமான நிலையத்தை வந்தடைந்ததாகவும், அங்கிருந்து குறித்த 5 பயங்கரவாத சந்தேக நபர்களும் கொழும்பு – கோட்டையில் உள்ள சி.ஐ.டி. தலைமையகமான நான்காம் மாடிக்கு அழைத்து வரப்பட்டு விசாரணைகள் ஆரம்பிக்கப்பட்டுள்ளதாகவும் பொலிஸ் பேச்சாளர் பொலிஸ் அத்தியட்சர் ருவன் குணசேகர தெரிவித்தார்.
30 வயதான புதிய காத்தான்குடி – 2 எனும் முகவரியைச் சேர்ந்த ஹயாத்து மொஹம்மட் அஹமட் மில்ஹான், 34 வயதான மருதமுனை – 3 ஐச் சேர்ந்த மொஹம்மட் மர்சூக் மொஹம்மட் ரிழா, வெல்லம்பிட்டியைச் சேர்ந்த 47 வயதான மொஹம்மட் முஹிதீன் மொஹம்மட் சன்வார் சப்றி, 29 வயதான காத்தான்குடி – 1 ஐச் சேர்ந்த மொஹம்மட் இஸ்மாயில் மொஹம்மட் இல்ஹாம், அனுராதபுரம் கெப்பித்திகொல்லாவையைச் சேர்ந்த 37 வயதான அபுசாலி அபூபக்கர் ஆகிய ஐந்து பயங்கரவாத சந்தேக நபர்களே சவூதியில் இருந்து இவ்வாறு கைது செய்யப்பட்டு நாட்டுக்கு அழைத்து வரப்பட்டவர்களாவர்.
இவ்வாறு சவூதியின், ஜித்தாவில் இருந்து அழைத்து வரப்பட்ட பயங்கரவாத சந்தேக நபர்களில் பிரதான சந்தேக நபரான அஹமட் மில்ஹான், கடந்த 2018 நவம்பர் மாதம் மட்டக்களப்பு – வவுணதீவில் இரு பொலிஸ் உத்தியோகத்தர்களைக் கொலை செய்துவிட்டு அவர்களின் ஆயுதங்களை கொள்ளையிட்ட சம்பவத்தின் பிரதான சந்தேக நபர் என சி.ஐ.டி.யினர் ஏற்கனவே தகவல்களை வெளிப்படுத்திக்கொண்டுள்ளனர். அந்த சம்பவம் தொடர்பில் பயங்கரவாதி சஹ்ரானின் சாரதியான கபூர் மாமா உள்ளிட்ட இருவர் ஏற்கனவே சி.ஐ.டி.யால் கைது செய்யப்பட்டுள்ள நிலையில், மில்ஹானுக்கும் அது குறித்த குற்றச்சாட்டு சுமத்தப்பட்டுள்ளது.
சவூதியில் இருந்து அழைத்து வரப்பட்ட மில்ஹான் எனும் பிரதான சந்தேக நபர், தொடர் தற்கொலை குண்டுத் தாக்குதல்களுக்கு முன்னர் சவூதி அரேபியாவுக்கு உம்ராவுக்காக சென்றிருந்தார். தொடர் தற்கொலை தாக்குதல்கள் அன்று அவர் மீள இலங்கைக்கு திரும்ப ஏற்பாடு செய்யப்பட்டிருந்த போதும் மீளத் திரும்பவில்லை. அவரின் தலைமையிலேயே இரண்டாம் கட்ட தாக்குதல்கள் திட்டமிடப்பட்டிருந்ததாக விசாரணையாளர்கள் சந்தேகிக்கின்றனர். எனினும் அவர் நாடு திரும்பாத நிலையில் அவரது பயணப் பொதி மட்டும் இலங்கைக்கு வந்துள்ளது. இந் நிலையில் சவூதி விமான நிலையம் ஒன்றில், 4/21 தாக்குதலை அடுத்து தன்னை சி.ஐ.டி. தேடுவதை தெரிந்துகொன்டு மில்ஹான் சவூதியிலேயே ஒளிந்திருக்க முற்பட்ட போது அந் நாட்டு பயங்கரவாத எதிர்ப்பு பிரிவினரால் சர்வதேச பொலிஸாரின் தலையீட்டுடன் கைது செய்யப்பட்டார். இந் நிலையில் கடந்த ஏப்ரல் மாதம் 21 ஆம் திகதியே சவூதி பயங்கரவாத தடுப்புப் பிரிவினரால் கைது செய்யப்பட்ட மில்ஹான் அப்போது முதல் ஜித்தாவில் உள்ள பயங்கரவாத தடுப்பு மையத்தில் தடுத்து வைக்கப்பட்டிருந்தார். அதன் பின்னர் அவரிடம் சவூதி முன்னெடுத்த விசாரணைகளின் கீழும், இலங்கையின் சிறப்பு பொலிஸ் குழு அங்கு சென்று நடாத்திய விசாரணைகளிலும் வெளிப்படுத்தப்பட்ட தகவல்களுக்கு அமைய ஏனைய நால்வரும் பல்வேறு சந்தர்ப்பங்களில் சவூதி பயங்கரவாத புலனாய்வுப் பிரிவினரால் கைது செய்யப்பட்டிருந்தமை குறிப்பிடத்தக்கது.
-Vidivelli