கடந்த ஏப்ரல் மாதம் 21 ஆம் திகதி முஸ்லிம் அடிப்படைவாதக் குழுவொன்றினால் மேற்கொள்ளப்பட்ட தற்கொலைக் குண்டுத்தாக்குதல்கள் முழு முஸ்லிம் சமூகத்தையும் சோதனைக்கு உள்ளாக்கி விட்டன.
முஸ்லிம்கள் தமக்கு எந்த நேரத்தில், என்ன நடக்குமோ என்ற அச்சத்தில் நாட்களைக் கடத்திக் கொண்டிருக்கிறார்கள்.
முஸ்லிம்கள் அனைவரும் அடிப்படைவாதிகள், தீவிரவாதிகள் என சந்தேகிக்கப்படுகிறார்கள். தற்கொலை குண்டுத் தாக்குதல்களையடுத்து 2289 பேர் சந்தேகத்தின் பேரில் அவசரகால சட்டத்தின் கீழ் கைது செய்யப்பட்டனர். இவர்களில் 1665 பேர் பிணையில் விடுதலை செய்யப்பட்டுள்ளனர். 423 பேர் விளக்கமறியலில் வைக்கப்பட்டுள்ளதுடன் 211 பேர் தடுத்து வைக்கப்பட்டு விசாரணைகளுக்கு உட்படுத்தப்பட்டு வருகின்றனர்.
முஸ்லிம்கள் இந்நாட்டுக்குச் சொந்தக்காரர்கள் அல்லர். அவர்கள் அரபு நாட்டுக்குத் திரும்பிச் செல்ல வேண்டும் என இனவாதக் கருத்துகள் பரப்பப்பட்டு வருகின்றன.
கடந்த மாதம் குருநாகல், புத்தளம் மற்றும் கம்பஹா மாவட்டங்களில் முஸ்லிம்களுக்கெதிராக வன்முறைகள் கட்டவிழ்த்து விடப்பட்டன.
நூற்றுக்கணக்கான வீடுகள், வர்த்தக நிலையங்கள் தாக்கி சேதப்படுத்தப்பட்டன. வர்த்தக நிலையங்கள் எரிக்கப்பட்டன. 27 பள்ளிவாசல்கள் தாக்கி உடைக்கப்பட்டன. குர்ஆன் பிரதிகள் நாசமாக்கப்பட்டன.
முஸ்லிம் புத்திஜீவிகள் கூட தீவிரவாதத்துக்கு துணை போனார்கள் என கைது செய்யப்பட்டு சிறையில் அடைக்கப்பட்டுள்ளார்கள். முஸ்லிம் பெண்களின் கலாசார ஆடைக்கும் நாட்டில் பலத்த எதிர்ப்பு தெரிவிக்கப்பட்டது. சில பாடசாலைகள், அரச நிறுவனங்களில் அபாயாவுக்கு அனுமதி மறுக்கப்பட்டது.
ஜனாதிபதியினால் அரச வர்த்தமானி மூலம் புர்காவுக்கு தடை விதிக்கப்பட்டது. இதனையடுத்து முஸ்லிம் பெண் டாக்டர் ஒருவர் தன்னால் புர்காவை தவிர்க்க முடியாமல் தனது பதவியையே இராஜினாமா செய்தார்.
முஸ்லிம் ஆசிரியைகள் புர்கா மாத்திரமல்ல அபாயாவே அணிந்து பாடசாலைக்கு நுழைய முடியாது தடை செய்தார்கள். கண்டி அந்தோனியார் மகளிர் கல்லூரியிலும், புவக்பிட்டிய தமிழ் வித்தியாலயத்திலும் இவை அரங்கேற்றப்பட்டன.
இந்த நிலையிலே பொது நிர்வாகம் மற்றும் அனர்த்த முகாமைத்துவ அமைச்சின் செயலாளர் அரசாங்க ஊழியர்களின் ஆடை தொடர்பில் திடீரென சில தினங்களுக்கு முன்பு சுற்று நிருபமொன்றினை வெளியிட்டார். இந்தச் சுற்று நிருபம் முஸ்லிம் பெண் உத்தியோகத்தர்கள் அபாயா அணிந்து செல்வதற்குத் தடைவிதிக்கும் வகையில் அமைந்திருந்தது.
அரச பெண் உத்தியோகத்தர்கள் சாரி அல்லது கண்டியச் சீலை (ஒஸரி) அணிந்து வர வேண்டுமெனவும் ஆண் உத்தியோகத்தர்கள் காற்சட்டையும் மேற்சட்டையும் அல்லது தேசிய உடையும் அணிய வேண்டும் எனவும் அச்சுற்று நிருபத்தில் தெரிவிக்கப்பட்டுள்ளது.
இச்சுற்று நிருபம் தற்போது பிரதமர் ரணில் விக்கிரமசிங்கவினால் இடைநிறுத்தப்பட்டுள்ளது.
முஸ்லிம்களுக்கு எதிராக இவ்வாறான கெடுபிடிகள் தொடர்ந்த வண்ணமேயுள்ளன. முஸ்லிம் பெண்கள் அபாயாவுடன் தலையை மூடி வெளியில் பயணிப்பதை இன்று அரிதாகவே காணக்கூடியதாகவுள்ளது. அவர்கள் அச்சத்தில் வீடுகளுக்குள் அடங்கிப் போயிருக்கிறார்கள்.
இந்த சூழ்நிலையில் நேற்று அமைச்சர் ரிசாத் பதியுதீன், மேல்மாகாண ஆளுநர் அசாத்சாலி, கிழக்கு மாகாண ஆளுநர் ஹிஸ்புல்லாஹ் ஆகிய மூவரையும் பதவி விலக்கக் கோரி அழுத்தங்கள் வலுப்பெற்றன. பெரும்பான்மையின இனவாத குழுக்களும், இனவாத அரசியல்வாதிகளும் களத்தில் இறங்கி செயற்பட்டார்கள்.
பாராளுமன்ற உறுப்பினர் அத்துரலிய ரதன தேரர் கண்டி தலதாமாளிகை வளாகத்தில் கடந்த வெள்ளிக்கிழமை சாகும் வரையிலான உண்ணாவிரதப் போராட்டத்தில் இறங்கினார். குறிப்பிட்ட மூவரும் பயங்கரவாதத்துடன் தொடர்புபட்டவர்கள், அடிப்படைவாதிகளுக்கு உதவியவர்கள் என்று குற்றம்சாட்டியே இப்போராட்டம் ஏற்பாடு செய்யப்பட்டது.
நேற்று பகல் 12 மணி வரை ஞானசார தேரர் அரசாங்கத்துக்கு காலக்கெடு விதித்திருந்தார். மூவரும் பதவி விலக்கப்படாவிட்டால் நாடு திருவிழா காண வேண்டியேற்படும் என அச்சுறுத்தியிருந்தார். இதனால் முஸ்லிம்கள் மேலும் பீதிக்குள்ளாகினர். நேற்று கண்டியில் ஆயிரக் கணக்கான பெரும்பான்மை இனத்தவர்கள் ஒன்று கூடினார்கள்.
அங்கு அசாதாரண நிலை உருவாகும் நிலைமை ஏற்பட்டது. இந்நிலையிலே ஆளுநர்கள் அசாத்சாலியும், ஹிஸ்புல்லாஹ்வும் தங்கள் பதவிகளை நேற்று காலை இராஜினாமா செய்தனர். இதனையடுத்து கலந்துரையாடல்களை மேற்கொண்ட முஸ்லிம் அமைச்சர்கள் சமூகத்தின் பாதுகாப்பு மற்றும் நலன் கருதி தங்கள் பதவிகளையும் இராஜினாமா செய்து கொண்டனர். அமைச்சர்களான ரிசாத் பதியுதீன், ரவூப் ஹக்கீம், எம்.எச்.ஏ. ஹலீம், கபீர் ஹாசிம், இராஜாங்க அமைச்சர்களான அலிசாஹிர் மௌலானா, எச்.எம்.எம். ஹரீஸ், பைசல்காசிம், எம்.எஸ்.எம். அமீர் அலி மற்றும் பிரதியமைச்சர் அப்துல்லாஹ் மஹ்ரூப் ஆகியோர் பதவிகளைத் துறந்தனர்.
இனவாதிகளின் நீண்டகால இலட்சியம் நேற்று நிறைவேற்றிக் கொள்ளப்பட்டுள்ளது. சமூகத்தின் குரல்வளை நசுக்கப்பட்டுள்ளது. பதவிகள் இல்லாது விடினும் அவர்கள் சமூகத்துக்காக தொடர்ந்தும் குரல் கொடுக்க வேண்டும்.
-Vidivelli