4/21 தாக்குதல்கள், முஸ்லிம்கள் மீதான வன்முறைகள்: 2289 சந்தேகநபர்கள் கைது 211 பேர் தடுப்புக் காவலில்
423 பேருக்கு விளக்கமறியல்; 1655 பேருக்கு பிணை
4/21 உயிர்த்த ஞாயிறு தினத்தன்று இடம்பெற்ற தற்கொலை குண்டுத் தாக்குதல்கள், அதனை தொடர்ந்து நாடளாவிய ரீதியில் நடாத்தப்பட்ட சோதனைகள் மற்றும் அண்மையில் வடமேல் மாகாண முஸ்லிம் கிராமங்களை மையப்படுத்தியும் அதனை ஒத்தவிதத்தில் மேலும் சில இடங்களிலும் இடம்பெற்ற வன்முறைகள் தொடர்பில் இதுவரை 2289 பேர் பொலிஸாரால் கைது செய்யப்பட்டுள்ளனர். 330 சிங்களவர்கள், 139 தமிழர்கள், 1820 முஸ்லிம்கள் இவ்வாறு பயங்கரவாத தடை சட்டம், அவசரகால சட்ட விதிகள், சிவில் மற்றும் அரசியல் உரிமைகள் தொடர்பிலான சர்வதேச இணக்கப்பாட்டு சட்டம் மற்றும் தண்டனை சட்டக் கோவை உள்ளிட்ட சாதாரண சட்டங்களின் கீழ் இவர்கள் கைது செய்யப்பட்டுள்ளதாக பொலிஸ் ஊடகப் பேச்சாளர் பொலிஸ் அத்தியட்சகர் ருவன் குணசேகர கூறினார்.
இவ்வாறு கைது செய்யப்பட்டவர்களில் 1655 பேர் நீதிமன்றங்களில் முன்னிலைப்படுத்தப்பட்டும் பொலிஸ் நிலையங்களுக்கு உள்ள அதிகாரத்தின் கீழும் பிணையில் விடுவிக்கப்பட்டுள்ளதுடன்,. 423 பேர் விளக்கமறியலில் வைக்கப்பட்டுள்ளனர். ஏனைய 211 பேர் தற்போதும் சி.ஐ.டி., ரி.ஐ.டி. மற்றும் ஏனைய பொலிஸ் நிலையங்களில் தடுத்து வைக்கப்பட்டு விசாரிக்கப்பட்டு வருவதாக பொலிஸ் அத்தியட்சகர் ருவன் குணசேகர மேலும் கூறினார்.
சட்ட திட்டங்கள் அடிப்படையிலான கைதுகள்:
உயிர்த்த ஞாயிறு தின தொடர் தற்கொலைத் தாக்குதல்களைத் தொடர்ந்து நாடளாவிய ரீதியில் சிறப்பு கைது நடவடிக்கைகள் இடம்பெற்றன. தாக்குதல்களுடன் தொடர்புடையோர், பின்னர் முன்னெடுக்கப்பட்ட சோதனை நடவடிக்கைகளில் சிக்கியோர் மற்றும் அதன் பின்னரான வடமேல் மாகாணம் உள்ளிட்ட சில பகுதிகளில் ஏற்பட்ட முஸ்லிம்களுக்கு எதிரான வன்முறைகள் தொடர்பில் என அந்த கைது பட்டியல் நீடித்தன.
பயங்கரவாத தடை சட்டத்தின் கீழான கைதுகள்:
இதில் பயங்கரவாத தடை சட்டத்தின் கீழ் கடந்த ஏப்ரல் 21 முதல் நேற்று வரை 575 கைதுகள் இடம்பெற்றுள்ளன. 25 சிங்களவர்கள், 13 தமிழர்கள், 537 முஸ்லிம்கள் இவ்வாறு இச்சட்டத்தின் கீழ் கைது செய்யப்பட்டவர்களில் உள்ளடங்குகின்றனர். தொடர் தற்கொலை குண்டுத் தாக்குதல்களுடன் நேரிடையாகத் தொடர்புபட்டவர்கள் என சி.ஐ.டி. மற்றும் சி.ரி.ஐ.டி. ஆகிய விசாரணைப் பிரிவினரால் கைது செய்யப்பட்ட அனைவருமே இந்த சட்டத்தின் கீழேயே தடுத்து வைக்கப்பட்டு விசாரிக்கப்பட்டு வருகின்றனர்.
அவசரகால சட்டவிதிகளின் கீழான கைதுகள்:
தொடர் தற்கொலை தாக்குதல்களைத் தொடர்ந்து அவசரகால சட்டமானது நாட்டில் அமுல் செய்யப்பட்டது. இந்த சட்ட விதிகளின் கீழ் நேற்று வரை 213 பேர் கைது செய்யப்பட்டுள்ளனர். 66 சிங்களவர்கள், 6 தமிழர்கள் மற்றும் 141 முஸ்லிம்கள் அவசர கால சட்ட விதிகளின் கீழ் கைதானோரில் உள்ளடங்குகின்றனர்.
ஐ.சி.சி.பி.ஆர்.இன் கீழான கைதுகள்:
இதேவேளை, ஐ.சி.சி.பி.ஆர். எனப்படும் அரசியல் மற்றும் சிவில் உரிமைகள் தொடர்பிலான சர்வதேச இணக்கப்பாட்டு சட்டத்தின் கீழ் கடந்த ஏப்ரல் 21 முதல் நேற்று வரையிலான காலப்பகுதியில் 72 பேர் கைது செய்யப்பட்டுள்ளனர். இவர்களில் அதிகமானோர் சிங்களவர்களாவர். 45 சிங்களவர்கள் இவ்வாறு இச்சட்டத்தின் கீழ் கைது செய்யப்பட்டுள்ள நிலையில், ஏனையோரில் 26 முஸ்லிம்களும் ஒரு தமிழரும் உள்ளடங்குகின்றனர்.
தண்டனை சட்டக் கோவையின் கீழான கைதுகள்:
இதனைவிட ஏனைய கைதுகள் தண்டனை சட்டக் கோவையின் கீழும் ஏனைய சாதாரண சட்ட விதிகளின் கீழும் இடம்பெற்றுள்ளன. அவ்வாறு சாதாரண சட்டங்களின் கீழ் மட்டும் ஏப்ரல் 21 முதல் நேற்று வரை 1429 பேர் கைது செய்யப்பட்டுள்ளனர். அவர்களில் 188 சிங்களவர்களும் 120 தமிழர்களும் 1121 முஸ்லிம்களும் உள்ளடங்குகின்றனர்.
பிணை விபரம்:
இந்நிலையில் உயிர்த்த ஞாயிறு தாக்குதல்களின் பின்னர் அந்த தற்கொலை குண்டுத் தாக்குதல்கள், அதனைத் தொடர்ந்து நாடளாவிய ரீதியில் நடாத்தப்பட்ட சோதனைகள் மற்றும் அண்மையில் வடமேல் மாகாண முஸ்லிம் கிராமங்களை மையப்படுத்தியும் அதனை ஒத்த விதத்தில் மேலும் சில இடங்களிலும் இடம்பெற்ற வன்முறைகள் தொடர்பில் கைதான 2289 பேரில் 1655 பேர் பிணையில் விடுவிக்கப்பட்டுள்ளனர். நீதிமன்றங்களினாலும் பொலிஸ் நிலையங்களினாலும் கைதின் பின்னர் அவர்கள் இவ்வாறு விடுவிக்கப்பட்டுள்ளனர்.
இவ்வாறு பிணையில் விடுவிக்கப்பட்டோரில் 1261 பேர் முஸ்லிம்களாவர். பிணையில் விடுவிக்கப்பட்ட ஏனையோரில் 269 சிங்களவர்களும் 125 தமிழர்களும் உள்ளடங்குகின்றனர்.
தடுப்புக் காவல் விபரம்:
இதேவேளை, கைது செய்யப்பட்ட 2289 பேரில் 211 பேர் தொடர்ந்தும் பொலிஸ் காவலில் தடுத்து வைக்கப்பட்டு விசாரணைகளுக்கு உட்படுத்தப்பட்டுள்ளனர். அவர்களில், உயிர்த்த ஞாயிறு தற்கொலை தாக்குதல்கள் தொடர்பில் சி.ஐ.டி.யால் கைது செய்யப்பட்ட 68 பேரும் சி.ரி.ஐ.டி.யால் கைது செய்யப்பட்ட 26 பேரும் உள்ளடங்குகின்றனர்.
இவ்வாறு தடுத்து வைக்கப்பட்டு விசாரிக்கப்படுவோரில் 9 சிங்களவர்களும் ஒரு தமிழரும் 201 முஸ்லிம்களும் உள்ளடங்குகின்றனர்.
விளக்கமறியலில் உள்ளோர்:
இதனிடையே உயிர்த்த ஞாயிறு தாக்குதல்களின் பின்னர் நேற்று வரை கைது செய்யப்பட்ட 2289 பேரில் 423 பேர் மட்டுமே விளக்கமறியல்களில் வைக்கப்பட்டுள்ளனர். 358 முஸ்லிம்களும், 13 தமிழர்களும், 52 சிங்களவர்களும் விளக்கமறியலில் உள்ளோரில் உள்ளடங்குகின்றனர்.
இந்நிலையில் ஞாயிறு தினத்தன்று இடம்பெற்ற தற்கொலை குண்டுத் தாக்குதல்கள், அதனை தொடர்ந்து நாடளாவிய ரீதியில் நடாத்தப்பட்ட சோதனைகள் மற்றும் அண்மையில் வடமேல் மாகாண முஸ்லிம் கிராமங்களை மையப்படுத்தியும் அதனை ஒத்த விதத்தில் மேலும் சில இடங்களிலும் இடம்பெற்ற வன்முறைகள் தொடர்பில் 330 சிங்களவர்கள் கைது செய்யப்பட்ட நிலையில் அவர்களில் 61 பேர் விளக்கமறியல்களிலும் பொலிஸ் தடுப்பிலும் உள்ளனர்.
269 பேருக்கு பிணை வழங்கப்பட்டுள்ளது
இவ்வாறு கைது செய்யப்பட்ட 139 தமிழர்களில் 125 பேர் பிணையில் உள்ள நிலையில் 14 பேர் விளக்கமறியல்களிலும் பொலிஸ் தடுப்பிலும் உள்ளனர். கைதான 1820 முஸ்லிம்களில் 1261 பேர் பிணையில் விடுவிக்கப்பட்டுள்ள நிலையில் மேலும் 559 பேர் பொலிஸ் தடுப்பிலும் விளக்கமறியல்களிலும் ளக்கமறியல்களிலும் உள்ளமை குறிப்பிடத்தக்கது.
-Vidivelli