சுற்று நிருபத்தை எதிர்த்து அடிப்படை உரிமை மீறல் மனு
மனித உரிமை ஆணைக்குழுவிலும் முறைப்பாடுகள்; குரல்கள் இயக்கம் நடவடிக்கை
பொது நிர்வாகம் மற்றும் அனர்த்த முகாமைத்துவ அமைச்சினால் கடந்த வெள்ளிக்கிழமை அரச அலுவலகங்களில் பணிபுரியும் ஊழியர்களுக்கான ஆடை ஒழுங்குமுறை தொடர்பில் வெளியிடப்பட்ட சுற்று நிருபத்தை எதிர்த்து அடிப்படை உரிமை மீறல் மனுவினைத் தாக்கல் செய்ய நடவடிக்கை எடுத்துள்ளதாக ‘குரல்கள் இயக்கம்’ தெரிவித்துள்ளது.
குறித்த சுற்று நிருபமானது ஊழியர்களின் அடிப்படை உரிமைகளை மீறியுள்ளது என்ற அடிப்படையில் உச்ச நீதிமன்றத்தில் அடிப்படை உரிமை மீறல் வழக்கினைத் தாக்கல் செய்வதற்கும் இந்த சுற்று நிருபத்திற்கு எதிரான இடைக் காலத் தடையைக் கோரி மேன்முறையீட்டு நீதிமன்றத்திலும் எழுத்தாணை மனுவொன்றையும் தாக்கல் செய்வதற்கான அனைத்து நடவடிக்கைகளையும் மேற்கொண்டுள்ளதாக குரல்கள் இயக்கம் தெரிவித்துள்ளது. குறிப்பிட்ட சுற்று நிருபமானது பெண் ஊழியர்கள் சேலை அல்லது ஒசரி அணிந்துஅதற்கு மேலால் மத அடையாளங்களைக் கொண்ட ஆடைகளை அணியலாம் என்று குறிப்பிட்டிருந்தது. இது சேலை இல்லாத ஆடைகளை அணிந்து கொண்டு அலுவலகங்களுக்கு வரும் ஊழியர்களை அதிக சங்கடத்திற்கு உள்ளாக்கியது மாத்திரமல்லாமல் முஸ்லிம் பெண் ஊழியர்கள் ஹபாயா அணிந்து வேலைக்குச் செல்லமுடியாத ஒருநிலையை தோற்றுவித்தது.
இந்தச் சுற்று நிருபமானது இலங்கை அரசியல் யாப்பில் உறுதிசெய்யப்பட்ட அடிப்படை உரிமைகளையும் குறிப்பாக விரும்பிய மதத்தையும் விரும்பிய கலாசாரத்தையும் பின்பற்றும் உரிமைக்கு முரணாகக் காணப்பட்டதனால் இந்த சுற்று நிருபத்தின் வலிதான தன்மையை எதிர்த்து சட்ட நடவடிக்கைககள் எடுக்கப்படவுள்ளன.
அது மாத்திரமின்றி குறிப்பிட்ட சுற்று நிருபத்திற்கு எதிராக மனித உரிமை ஆணைக்குழுவில் அரசாங்க பெண் ஊழியர்கள் நாடளாவிய ரீதியில் முறைப்பாடுகள் செய்வதற்கான முன்னேற்பாடுகளையும் குரல்கள் இயக்கம் மேற்கொண்டுள்ளது.
இச் சந்தர்ப்பத்தில் சர்ச்சைக்குரிய சுற்றுநிருபம் இரத்துசெய்யப்பட்டதாக அமைச்சர் மத்துமபண்டாரவை மேற்கோள்காட்டி ஊடகங்கள் நேற்று செய்தி வெளியிட்டுள்ளன.
இருப்பினும் அதனை இரத்துச் செய்தமை தொடர்பில் எந்த உத்தியோகபூர்வ உறுதிப்பாடும் இல்லாத நிலையில் தங்களுடைய வழமையான ஆடைகளை அணிந்து அலுவலகங்களுக்குச் செல்லமுடியுமா என்ற கேள்விக்கான பதில் இன்னும் கிடைக்கவில்லை.
குறிப்பிட்ட சுற்று நிருபம் ரத்துச் செய்யப்பட்டதற்கான உத்தியோகபூர்வ அறிவித்தல் வரும் வரைக்கும் அது இன்னும் அமுலில் இருப்பதாகவே கணிக்கப்பட வேண்டும். அதனால் அச் சுற்று நிருபம் ரத்துச் செய்யப்பட்ட உத்தியோகபூர்வ அறிவித்தல் வரும் வரைக்கும் அது அமுலில் இருப்பதாக கருதி அதனை சவால்விடுக்கும் சட்டரீதியான நடவடிக்கைகளை முன்னெடுத்து வருவதாக குரல்கள் இயக்கம் மேலும் தெரிவித்துள்ளது.
-Vidivelli