அரச ஊழியர்களின் ஆடைகள் குறித்த சுற்றுநிருபம் இடைநிறுத்தம்
ஜனாதிபதி செயலகத்தின் அறிவுறுத்தலின் பேரிலேயே வெளியிட்டதாக கூறுகிறார் அமைச்சின் செயலாளர்
பொது நிர்வாகம் மற்றும் அனர்த்த முகாமைத்துவ அமைச்சினால் கடந்த மே மாதம் 29 ஆம் திகதியிடப்பட்டு வெளியிடப்பட்டுள்ள அரச ஊழியர்களின் ஆடை தொடர்பான சுற்று நிருபம் இடைநிறுத்தப்பட்டுள்ளது.
30 வருடங்கள் பழைமை வாய்ந்த அரச ஊழியர்களின் ஆடை தொடர்பான குறித்த சுற்று நிருபத்தை மீண்டும் அமுல்படுத்துவதற்கு பிரதமர் ரணில் விக்கிரமசிங்க எதிர்ப்புத் தெரிவித்ததையடுத்து சுற்று நிருபம் இடை நிறுத்தப்பட்டுள்ளதாக பொது நிர்வாகம் மற்றும் அனர்த்த முகாமைத்துவ அமைச்சர் ரஞ்சித் மத்தும பண்டார தெரிவித்துள்ளார். குறித்த சுற்று நிருபம் தொடர்பில் இன்று திங்கட்கிழமை நடைபெறவுள்ள பாராளுமன்ற குழுக்கூட்டத்தில் கலந்துரையாடப்பட்டு தீர்மானம் ஒன்று எட்டப்படும் எனவும் அமைச்சர் ரஞ்சித் மத்தும பண்டார தெரிவித்துள்ளார்.
அரச ஊழியர்களின் ஆடை தொடர்பில் புதிய சுற்று நிருபம் ஒன்று வெளியிடப்பட வேண்டுமா? இன்றேல் வெளியிடப்பட்டுள்ள சுற்று நிருபத்தில் திருத்தங்கள் மேற்கொள்ளப்பட வேண்டுமா? என்பது தொடர்பில் நாம் கலந்துரையாடி தீர்மானிக்கவுள்ளோம் எனவும் அவர் கூறினார்.
பொது நிர்வாக அமைச்சு திங்கட்கிழமை (இன்று) முதல் அரச ஊழியர்களின் ஆடை தொடர்பான சுற்று நிருபத்தை அமுல்படுத்துவதற்கு தீர்மானித்திருந்தது.
பொது நிர்வாக அமைச்சு வெளியிட்டுள்ள சுற்று நிருபத்தின்படி அரசாங்க உத்தியோகத்தர்கள் கடமைக்காக அலுவலக வளாகத்துக்குள் வரும்போது பெண் உத்தியோகத்தர்கள் சேலை அல்லது ஒஸரி (கண்டியச் சேலை) அணிந்திருத்தல் வேண்டும். ஆண் உத்தியோகத்தர்கள் காற்சட்டை மற்றும் மேற்சட்டை அல்லது தேசிய உடை அணிந்திருக்க வேண்டும்.
கடந்த 29 ஆம் திகதி வெளியான இந்தச் சுற்று நிருபத்தின் படி முஸ்லிம் பெண் உத்தியோகத்தர்கள் பாடசாலை, வங்கி உட்பட அரச நிறுவனங்களில் அபாயா அணிந்து கடமையாற்ற முடியாத நிலை உருவாகியுள்ளது. இந்த சுற்று நிருபமே தற்போது இடை நிறுத்தப்பட்டுள்ளது.
பொது நிர்வாக அமைச்சின் செயலாளர் ஜே.ஜே. ரட்ணசிரி கருத்து தெரிவிக்கையில் ஜனாதிபதி செயலகம் 1989 ஆம் ஆண்டில் வெளியிடப்பட்டுள்ள அரசாங்க உத்தியோகத்தர்களின் ஆடை தொடர்பான சுற்று நிருபத்தை அமுல்படுத்தும்படி வேண்டியதாலே அந்த சுற்று நிருபத்தை அமுலுக்கு கொண்டு வர நாம் தீர்மானித்தோம்.
பொதுவான சட்டம் ஒன்று அமுலில் இருப்பதனாலேயே நாம் அந்த பொதுவான ஆடையை அமுல்படுத்துவதற்கு தீர்மானித்தோம். இதில் மாற்றங்கள் ஏதும் மேற்கொள்வதாயின் அமைச்சரவையின் அங்கீகாரம் பெற்றுக் கொள்ளபட வேண்டும்.
அரச அலுவலகங்களிலும் பாடசாலைகளிலும் அபாயாவுக்கு எதிராக ஆர்ப்பாட்டங்களும் எதிர்ப்புகளும் உருவானதையடுத்தே அரச ஊழியர்களுக்கான ஆடை தொடர்பான சுற்று நிருபம் வெளியிட வேண்டியேற்ப்பட்டது. சில பாடசாலைகளில் ஆசிரியைகள் சாரி அணிந்து வராது அபாயா அணிந்து வந்ததால் அவர்கள் பாடசாலை வளாகத்துக்குள் அனுமதிக்கப்படவில்லை.
இதேவேளை அரசாங்கம் பெண் அரச ஊழியர்கள் சாரி அல்லது ஒஸரி அணிந்து கடமைக்கு வரவேண்டும் என சுற்று நிருபம் மூலம் நிர்ப்பந்திப்பது நியாயமற்றது என இலங்கை ஆசிரியர் சங்கத்தின் பொதுச் செயலாளர் ஜோசப் ஸ்டாலின் தெரிவித்துள்ளார்.
பெரும்பாலான பெண் அரச ஊழியர்கள் மற்றும் ஆசிரியைகள் ஸ்கர்ட், பிளவ்ஸ் அணிந்தே கடமைக்கு வருகிறார்கள் என்றார்.
பிரதமர் ரணில் விக்கிரமசிங்க அரசாங்க ஊழியர்களின் ஆடை தொடர்பில் சுற்று நிருபமொன்றினைத் தயாரித்து பொது நிர்வாக அமைச்சுக்கு அனுப்பி வைத்திருந்ததாகவும் அதில் அபாயா அணிந்து கடமைக்கு செல்லும் வகையில் தயாரிக்கப்பட்டிருந்ததாகவும் தெரிவிக்கப்படுகிறது.
பிரதமரின் ஆலோசனைகள் உள்ளடங்கிய சுற்று நிருபத்தை வெளியிடாது பொது நிர்வாக அமைச்சு 1989 ஆம் ஆண்டின் சுற்று நிருபத்தை மீள வெளியிட்டுள்ளது.
பிரதமரின் உத்தரவுகளையும் மீறி குறிப்பிட்ட சுற்று நிருபம் கடந்த 29 ஆம் திகதியிட்டு 31 ஆம் திகதி வெள்ளிக்கிழமையே பொது நிர்வாக அமைச்சின் செயலாளரினால் கையொப்பமிடப்பட்டதாக அமைச்சின் அதிகாரியொருவர் தெரிவித்தார். குறிப்பிட்ட சுற்று நிருபத்தில் திருத்தங்களைச் செய்யுமாறும் முஸ்லிம் பெண்கள் அபாயா அணிந்து கடமைக்குச் செல்லும் வகையில் மாற்றங்களை உட்புகுத்துமாறும் அஞ்சல் சேவைகள் மற்றும் முஸ்லிம் சமய விவகார அமைச்சர் எம்.எச்.ஏ. ஹலீம் பிரதமர் ரணில் விக்கிரமசிங்கவிடம் கோரிக்கை விடுத்துள்ளார். இவ்வாறான கோரிக்கைகளை ஏனைய முஸ்லிம் அமைச்சர்களும், மேல் மாகாண ஆளுநரும், ஸ்ரீ லங்கா முஸ்லிம் கவுன்சிலும் விடுத்துள்ளன.
-Vidivelli