சொத்துக் குவிப்பு விவகாரத்துக்காக கைது செய்யப்பட்டுள்ள குருநாகல் வைத்தியசாலையின் பிரசவ மற்றும் மகப்பேற்று வைத்தியர் மொஹம்மட் ஷாபியினால் சட்டவிரோதமாக கருத்தடை சத்திரசிகிச்சை மேற்கொள்ளப்பட்டுள்ளதாக 60 முறைப்பாடுகள் பதிவு செய்யப்பட்டுள்ளன. குருநாகல் போதனா வைத்தியசாலையில் பணிப்பாளரிடம் இந்த முறைப்பாடுகள் பதிவு செய்யப்பட்டுள்ளன. இதற்கு மேலதிகமாக குருநாகல் பொலிஸ் நிலையத்திலும் 10 முறைப்பாடுகள் பதிவு செய்யப்பட்டுள்ளதாக பொலிஸ் தகவல்கள் தெரிவித்தன.
சந்தேகநபரான வைத்தியர் சட்டவிரோதமாகக் கருத்தடை சத்திரசிகிச்சைகள் மேற்கொண்டதாகக் கிடைத்த முறைப்பாடுகளில், 4 முறைப்பாடுகள் அவருடன் சேர்ந்து பணியாற்றியதாகக் கூறப்படும் வைத்தியர்களால் முன்வைக்கப்பட்டவையென அறியமுடிகின்றது. ஏனைய முறைப்பாடுகளை 28 -– 30 வயதுக்கு இடைப்பட்ட பெண்களே பதிவு செய்துள்ளனர்.
இதனிடையே சொத்துக் குவிப்பு விவகாரத்தில் விசாரணைகள் முன்னெடுக்கப்பட்ட நிலையில், சட்டவிரோத கருத்தடை விவகாரம் தொடர்பில் குறித்த வைத்தியருக்கு எதிராக குருநாகல் மாவட்டத்துக்கு பொறுப்பான பிரதிப் பொலிஸ்மா அதிபரின் பின்னணியில் குற்றச்சாட்டுக்கள் சுமத்தப்பட்டுள்ளதாகத் தகவல்கள் வெளியாகியுள்ளன. குறித்த பிரதிப் பொலிஸ்மா அதிபரின் மனைவி குருநாகல் வைத்தியசாலையின் வைத்தியராகக் கடமையாற்றும் நிலையில், அந்தப் பின்னணியை வைத்து வைத்தியர் ஷாபிக்கு எதிராக வேறு நோக்கங்களுக்காகக் கருத்தடை குற்றச்சாட்டு முன்வைக்கப்பட்டுள்ளதாகக் கூறப்படுகின்றது. இந்நிலையில் இந்த விடயம் தொடர்பிலும் சி.ஐ.டி. விசாரணைகளில் அவதானம் செலுத்தப்பட்டுள்ளதாக பொலிஸ் தலைமையகத்தின் உயரதிகாரி ஒருவர் கூறினார்.
குறித்த பிரதிப் பொலிஸ்மா அதிபர் விவகாரத்திலும் சிக்கல் நிலை ஒன்று உள்ளது. அது தொடர்பிலும் கண்டிப்பாக நாம் ஆராய்கின்றோம்” என அந்த உயர் பொலிஸ் அதிகாரி சுட்டிக்காட்டினார்.
வைத்தியர் ஷாபிக்கு 40 கோடி ரூபாவிற்கும் அதிக சொத்துக்கள் உள்ளதாகத் தகவல்கள் கிடைத்ததால் குருநாகல் பொலிசார் ஊடாக விசாரணைகள் ஆரம்பிக்கப்பட்டுள்ளன. குருநாகல் பிரதிப் பொலிஸ்மா அதிபர் கித்சிரி ஜயலத்தின் உத்தரவிலேயே குருநாகல் பொலிசாரால் விசாரணைகள் ஆரம்பிக்கப்பட்டுள்ளன. இந்நிலையிலேயே கைது செய்யப்பட்ட வைத்தியர் ஷாபி, மேலதிக விசாரணைகளுக்காக பதில் பொலிஸ்மா அதிபர் சந்தன விக்ரமரத்னவின் உத்தரவுக்கமைய சி.ஐ.டி.யால் பொறுப்பேற்கப்பட்டுள்ளார்.
40 கோடி ரூபாவிற்கும் அதிக பெறுமதியுடைய சொத்துக்கள் அவரிடம் காணப்படுவதாக பொலிஸாருக்குத் தகவல் கிடைத்ததுடன், அவை ஏதேனும் கடும்போக்குவாத அல்லது பயங்கரவாதக் குழுவிடமிருந்து கிடைத்துள்ளதாவென ஆராயும் நோக்கில் அவர் கைது செய்யப்பட்டதாக ஆரம்பத்தில் பொலிஸார் தெரிவித்தனர். இதேவேளை, அந்த வைத்தியரின் பெயரில் காணப்படும் 17 காணி உறுதிப் பத்திரங்களை பொலிஸார் கைப்பற்றியுள்ளதாகவும் அறிய முடிகின்றது. அந்தக் காணிகள் குருநாகலை சூழவுள்ள இடங்களில் அமைந்துள்ளதாக பொலிஸார் தெரிவித்தனர்.
இதேவேளை, குருநாகல் போதனா வைத்தியசாலையின் தாதி அதிகாரியொருவர், வைத்தியசாலை பணிப்பாளருக்கு எழுத்துமூலம் முறைப்பாடு செய்து, வைத்தியர் மகப்பேற்று சத்திரசிகிச்சையின் பின்னர் தமது கர்ப்பப்பை அகற்றப்பட்டுள்ளதாக குற்றஞ்சாட்டியுள்ளார். தமது கர்ப்பப்பை அகற்றப்பட்டதை பின்னரே அறிந்துகொண்டதாக அந்தப் பெண், வைத்தியசாலையின் பணிப்பாளருக்கு அனுப்பியுள்ள கடிதத்தில் குறிப்பிடப்பட்டுள்ளது.
இதேவேளை, சந்தேகநபரான வைத்தியர் தாயொருவரின் பெயரை மாற்றி, சிசுவொன்றை வேறு தரப்பினருக்கு வழங்குவதற்கு முயற்சித்ததாக தெரியவந்துள்ளது.குருநாகல் போதனா வைத்தியசாலையின் நிர்வாக அதிகாரியொருவர் இது தொடர்பில் ஆரம்பகட்ட விசாரணை நடத்தியுள்ளதுடன், போலி ஆவணத்தைத் தயாரித்து சிசுவை வேறு தரப்பிற்கு சட்டரீதியற்ற முறையில் வழங்குவதற்கு சந்தேகத்திற்குரிய வைத்தியர் செயற்பட்டுள்ளதாக கூறப்படுகின்றது.
இந்நிலையில் இந்த விவகாரங்கள் தொடர்பிலான விசாரணைகளுக்கு இலங்கை மருத்துவ சபையின் உதவியைப் பெற்றுக்கொள்ள நடவடிக்கைகள் எடுக்கப்பட்டுள்ளன. அத்துடன் சுகாதார அமைச்சும் இதுகுறித்து விசாரணைகளுக்கென சிறப்பு விசாரணை குழுவொன்றினை அமைத்துள்ளமையும் குறிப்பிடத்தக்கது.
-Vidivelli