இலங்கையில் இன ரீதியான பாகுபாட்டை முற்றாக இல்லாதொழித்து சமத்துவத்தை பேணும் வகையில், நாட்டில் இடம்பெறும் அது தொடர்பான விடயங்களை உடனடியாக தெரிவிக்க இலங்கை முஸ்லிம் அமைப்புக்களின் கூட்டு முயற்சியில் தொடர்பு இலக்கம் ஒன்று அறிமுகம் செய்யப்பட்டுள்ளது.
அகில இலங்கை ஜம்இய்யத்துல் உலமா, ஸ்ரீலங்கா முஸ்லிம் கவுன்ஸில், தேசிய ஷூரா சபை, வை.எம்.எம்.ஏ மற்றும் கொழும்பு மாவட்ட மஸ்ஜித்கள் சம்மேளனம் ஆகிய அமைப்புகள், வர்த்தக சமூகம் மற்றும் ஏனைய பங்காளர்களையும் உள்ளடக்கியே இந்த தொடர்பு இலக்கம் அறிமுகம் செய்யப்பட்டுள்ளது.
இன ரீதியிலான பாகுபாடு மற்றும் இனவாதத்திற்கு இலங்கையில் இடமில்லை. நாட்டின் சட்டங்களின் மூலம் வழங்கப்பட்டுள்ள உரிமைகளை மதித்து அவற்றை பாதுகாக்கும் வகையில் அனைத்துப் பிரஜைகளும் செயற்பட வேண்டும் என குறித்த தரப்பினர் வேண்டிக் கொண்டுள்ளனர்.
யாரேனுமொருவர் ஏதேனும் ஒரு வகையிலான இன ரீதியான பாகுபாட்டுக்கோ துன்புறுத்தலுக்கோ அல்லது இனவாத செயற்பாட்டிற்கோ உட்படுத்தப்படும் பட்சத்தில் 011 7021921 எனும் இந்த இலக்கத்திற்கு தொடர்பு கொண்டு தெரிவிக்க முடியும்.
அதேவேளை பொலிஸில் முறைப்பாடுகளை செய்த பின்னரும் அந்தப் பிரச்சினை தொடர்பில் எவ்வித பதிலும் கிடைக்கவில்லையென்றால் அவற்றை அறிவிக்கவும் அது தொடர்பில் ஆலோசனை பெறவும் மேற்படி இலக்கத்துடன் தொடர்பு கொள்ள முடியும் என்றும் தெரிவிக்கப்பட்டுள்ளது.
vidivelli