அண்மையில் இடம்பெற்ற தற்கொலை குண்டுத் தாக்குதல்களையடுத்து பூண்டுலோயா தமிழ் மகா வித்தியாலயத்தில் கல்வி பயிலும் முஸ்லிம் மாணவிகள் பாடசாலைக்கு பர்தா அணிந்து வரக்கூடாது என பெற்றோரும் பழைய மாணவர்களும் எதிர்ப்புத் தெரிவித்துள்ளனர்.
இந்நிலைமை தொடர்பில் ஆராய்ந்து தீர்மானம் எடுப்பதற்கான கூட்டமொன்று கடந்த வெள்ளிக்கிழமை பாடசாலையில் இடம்பெற்றது.
இக்கூட்டத்தில் பழைய மாணவர் சங்க பிரதிநிதிகள், பாடசாலை அபிவிருத்திச் சங்க பிரதிநிதிகள், பெற்றோர் தரப்பில் பிரதிநிதிகள், பூண்டுலோயா பொலிஸ் நிலைய பொறுப்பதிகாரி, நுவரெலியா பிராந்திய உதவி பொலிஸ் அத்தியட்சகர், வலயக் கல்வி அதிகாரிகள், பாடசாலை அதிபர் ஆகியோரும் கலந்துகொண்டிருந்தனர்.
முஸ்லிம் தரப்பில் கல்விபயிலும் மாணவிகளின் பெற்றோரல்லாத 7 பேரும் பள்ளிவாசல் நிர்வாக சபையின் 3 பேரும் அழைக்கப்பட்டிருந்தனர். நடைபெற்ற கூட்டத்தில் இறுதித் தீர்மானம் எட்டப்படாத நிலையில் வலயக் கல்விப் பணிப்பாளருடன் பாடசாலை அபிவிருத்திச் சங்கத்தின் ஆறு பேர் கலந்துரையாடி இது தொடர்பில் தீர்மானம் மேற்கொள்வதாகத் தீர்மானிக்கப்பட்டுள்ளது.
இவ்விவகாரம் தொடர்பில் பூண்டுலோயா தமிழ் மகா வித்தியாலய அதிபர் ஸ்ரீவேணுகோபால சர்மாவை விடிவெள்ளி தொடர்புகொண்டு வினவியபோது அவர் பின்வருமாறு விளக்கமளித்தார். பாடசாலை ஒரு கலவன் பாடசாலை. 1400 மாணவ மாணவிகள் இங்கு பயில்கிறார்கள். இவர்களில் 126 பேர் முஸ்லிம் மாணவ, மாணவிகள். 126 பேரில் 69 பேர் மாணவிகள். இவர்களில் 35 பேர் பர்தா அணிந்து வருகிறார்கள். இங்கு தமிழ் மாணவர்களே பெரும்பான்மையானவர்கள்.
இப்பாடசாலை முஸ்லிம் மாணவிகள் பர்தா அணிந்து வருவதை பெற்றோர் விரும்பவில்லை எதிர்க்கிறார்கள்.
இதுவரை காலம் பர்தாவுக்கு எதிர்ப்பு இருக்கவில்லை. ஏப்ரல் மாதம் இடம்பெற்ற குண்டுத்தாக்குதலையடுத்தே இந்நிலைமை உருவாகியுள்ளது. தமிழ் மாணவிகள் போன்று முஸ்லிம் மாணவிகள் உடையணிய வேண்டும் என பெற்றோர் வலியுறுத்துகிறார்கள்.
வலயக் கல்வித் திணைக்கள அதிகாரிகளுடன் கலந்துரையாடி இறுதித் தீர்மானம் மேற்கொள்வதற்கு நடவடிக்கை எடுக்கப்பட்டுள்ளது என்றார்.
-vidivelli