சர்வதேசத்தின் உதவியுடன் தீவிரவாதம் ஒழிக்கப்படும்
தேசிய படைவீரர் தின நிகழ்வில் ஜனாதிபதி தெரிவிப்பு
முப்பது வருட பயங்கரவாதத்தை வெற்றி கொண்ட எமது முப்படையினரால் மதவாத கொள்கையினை பின்புலமாக கொண்டுள்ள சர்வதேச தீவிரவாதத்தையும் முழுமையாக துடைத்தெறிய முடியும் எனத் தெரிவித்த ஜனாதிபதி மைத்திரிபால சிறிசேன, சர்வதேச தீவிரவாதத்தை முழுமையாக எமது நாட்டில் இருந்து குறுகிய காலத்திற்குள் இல்லாதொழிக்க வேண்டும் என்றும் இதற்காக சர்வதேசத்தின் பூரண ஒத்துழைப்பும் தேவைக்கேற்ப பெற்றுக் கொள்ளப்படும் எனவும் குறிப்பிட்டார். தேசிய படைவீரர் தின நிகழ்வு நேற்று பாராளுமன்ற வளாகத்தில் இடம்பெற்ற போது உரையாற்றுகையிலேயே ஜனாதிபதி மைத்திரிபால சிறிசேன மேற்கண்டவாறு தெரிவித்தார். அவர் தொடர்ந்தும் கூறுகையில்,
இலங்கை ஆரம்ப காலத்தில் இருந்து போராட்டங்களுக்கு பெயர்போயுள்ளது. மன்னர் காலத்தில் அந்நியர்களின் ஆதிக்கம் வெற்றி கொள்ளப்பட்டது. பிற்போந்த காலப்பகுதியில் சிவில் யுத்தமும் இராணுவத்தினரால் வெற்றி கொள்ளப்பட்டு தேசிய இறைமை ஒருமுகப்படுத்தப்பட்டு அனைத்து மக்களும் சுதந்திரமாக வாழ்ந்தார்கள். தற்போது சர்வதேச தீவிரவாதிகளின் தாக்குதலும் இடம் பெற்றுள்ளது. அடிப்படைவாதிகளை முழுமையாக இல்லாதொழிக்கும் பலம் முப்படையினருக்கும் உள்ளது. இலங்கையில் சர்வதேச தீவிரவாதம் துடைத்தெறியப்படும் என்பதை உறுதியாக குறிப்பிட முடியும்.
மிலேச்சத்தனமாக செயற்பட்ட விடுதலைப் புலிகள் முழுமையாக அழிக்கப்பட்டு 2009 ஆம் ஆண்டு மே மாதம் நாடு கொடிய பிடியில் இருந்து விடுவிக்கப்பட்டு அனைத்து மக்களும் எதிர்பார்த்த சுதந்திரம் ஏற்படுத்தப்பட்டது. ஒருமித்து வாழ வேண்டும் என்பது அனைத்து மக்களின் மனங்களிலும் விதைக்கப்பட்டது. 1980 ஆம் ஆண்டில் இருந்து பயங்கரவாதத்தை இல்லாதொழிக்க அரச தலைவர்களும், அரசாங்கமும், புலனாய்வு பிரிவினரும், இராணுவத்தினரும் முறையான திட்டங்களை வகுத்து வந்து ஒரு கட்டத்திற்கு கொண்டு வந்தார்கள். அனைவரது ஒத்துழைப்பிற்கு அமையயுத்தம் வெற்றி கொள்ளப்பட்டது.
எமது நாட்டு முப்படையினரும், புலனாய்வுப் பிரிவினரும், பாதுகாப்பு தரப்பினரும் யுத்தத்தை வெற்றி கொண்ட அனுபவம் கொண்டவர்கள். சர்வதேசத்திற்கும் எடுத்துக்காட்டாக செயற்பட்டுள்ளார்கள். விடுதலைப் புலிகளை இல்லாதொழிக்க இந்திய அரசாங்கம் 01 இலட்சம் இராணுவத்தினரை போர் நடவடிக்கைகளுக்கு அனுப்பி வைத்தது. ஆனால் இந்திய இராணுவத்தினரால் விடுதலைப் புலிகளை வெற்றி கொள்ள முடியவில்லை. எமது நாட்டு பாதுகாப்பு தரப்பினராலே 30 வருட கால யுத்தம் இறுதிக் கட்டத்தில் வெற்றி கொள்ளப்பட்டது.
30 வருடகால பயங்கரவாதத்தை வெற்றி கொண்டு 10 ஆண்டுகளை கடந்துள்ள நிலையில் சர்வதேச தீவிரவாத தாக்குதலும் இன்று ஒரு சவாலாக காணப்படுகின்றது. கடந்த மாதம் 21 ஆம் திகதி மத அடிப்படைவாதிகளினால் நடத்தப்பட்ட மிலேச்சத்தனமான தாக்குதல்கள் வன்மையாக கண்டிக்கத்தக்கன. தீவிரவாத அமைப்புடன் தொடர்புடைய அனைத்து தரப்பினரும் தற்போது கைது செய்யப்பட்டுள்ளார்கள். பயங்கரவாத யுத்தத்தை வெற்றி கொண்ட எமது நாட்டு முப்படையினருக்கும், புலனாய்வு பிரிவினருக்கும், சர்வதேச தீவிரவாதிகளிடம் இருந்து மீண்டும் தாய் நாட்டை பாதுகாக்கும் பொறுப்பு ஒப்படைக்கப்பட்டுள்ளது.
மத அடிப்படைவாதத்தை கொள்கையாகக் கொண்டுள்ள சர்வதேச தீவிரவாதம் இன்று அனைத்து நாடுகளுக்கும் ஒரு நெருக்கடியாகவே காணப்படுகின்றது. அடிப்படைவாதிகள் எந்த இடத்தில் எவ்வாறான நிலையில் தாக்குதல்களை மேற்கொள்வார்கள் என்பது சர்வதேச இராணுவ நிபுணர்களாலும் கணிக்க முடியாத நிலை காணப்படுகின்றது. அந்தளவிற்கு இந்த அடிப்படைவாதிகள் சாதாரண மட்டத்திலும் தமது கொள்கைகளை பரப்பி நோக்கங்களை நிறைவேற்றிக் கொள்ள எத்தனிக்கின்றார்கள். சர்வதேச தீவிரவாதத்தை முழுமையாக இல்லாதொழிப்பதே அனைத்து நாடுகளினதும் பிரதான நோக்கமாக காணப்படுகின்றது.
சர்வதேச தீவிரவாதத்தை முழுமையாக எமது நாட்டில் இருந்து குறுகிய காலத்திற்குள் இல்லாதொழிக்க வேண்டும். இதற்காக சர்வதேசத்தின் பூரண ஒத்துழைப்பை தேவைக்கேற்ப பெற்றுக் கொள்ள வேண்டும். புதிய யுத்த நுட்பங்கள் மற்றும் சர்வதேச தீவிரவாத செயற்பாடுகளை அறிதல் தொடர்பில் சர்வதேச நுணுக்கங்களையும் நாம் தெரிந்து கொள்ளுதல் அவசியமாகும். எந்நிலையிலும் எமது நாட்டு இராணுவத்திற்கே முன்னுரிமை வழங்கப்படும் என்றார்.
-Vidivelli