என்னை பரிசோதிக்க வேண்டுமென எவரும் கோரிக்கை விடுக்கவில்லை
அபாயா அணிந்து வார வேண்டாம் என்றே ஆர்ப்பாட்டக்காரர்கள் கூறினார்கள்
கடந்த 7 ஆம் திகதி நான் கடமையாற்றும் அவிசாவளை புவக்பிட்டிய தமிழ் மகா வித்தியாலயத்திற்கு கடமைக்காக சென்றபோது அங்கே பாடசாலை மாணவர்களின் பெற்றோரும், மற்றும் பலரும் பாடசாலை நுழைவாயிலுக்கருகில் குழுமி நின்று ஆர்ப்பாட்டம் செய்துகொண்டிருந்தார்கள்.
தமிழ் டீச்சர்களை பாடசாலை நுழைவாயிலுக்குள் விட்டார்கள். முஸ்லிம் ஆசிரியைகளை உள்ளே விடவில்லை. எம்மைப் பரிசோதனைக்கு உட்படுத்த வேண்டும் என்று கேட்கவில்லை.
அபாயா அணிந்து வந்தால் உள்ளே அனுப்பமுடியாது. எங்கள் பிள்ளைகளுக்குப் பாதுகாப்பில்லை. குண்டுகள் வெடித்து அனர்த்தம் ஏற்படுவதற்கு இடமளிக்க முடியாது. போய் சாரி அணிந்துகொண்டு வாருங்கள் என்று ஆர்ப்பாட்டக்காரர்கள் எம்மிடம் தெரிவித்தார்கள் என அவிசாவளை, புவக்பிட்டிய தமிழ் மகா வித்தியாலயத்துக்கு அபாயா அணிந்து கடமைக்குச் சென்று பாடசாலை வளாகத்துக்குள் அனுமதிக்கப்படாது திருப்பியனுப்பப்பட்ட 10 முஸ்லிம் ஆசிரியைகளில் ஒருவர் ‘விடிவெள்ளி’ க்குத் தெரிவித்தார். அந்த ஆசிரியை தனது பெயரை பகிரங்கப்படுத்த விரும்பவில்லை.
அவர் தொடர்ந்தும் சம்பவம் பற்றி தெளிவுபடுத்துகையில்
‘அங்கு பெண் பொலிஸார் வந்தார்களா?’ என்று எனக்குத் தெரியாது. நான் காணவில்லை. ஆனால் பெண் பொலிஸார் வருகை தந்ததை சக ஆசிரியைகள் ஓரிருவர் கண்டதாக என்னிடம் தெரிவித்தார்கள்.
நாங்கள் 7 மணியிலிருந்து 9.30 மணி வரை பாடசாலை நுழைவாயிலுக்கு வெளியில் காத்திருந்தோம். அங்கு வலயக் கல்விப் பணிப்பாளர் வருகை தந்தார். நாம் அவர்களிடம் நிலைமையை விளக்கினோம். கலர் அபாயாவே அணிந்து வந்திருக்கிறோம் என்றோம்.
அவர் ‘நீங்கள் சாரி அணிந்து வந்திருக்கலாமே-? அதிபர் கூறியதை நீங்கள் கேட்டிருக்க வேண்டும். சாரி அணிந்து வந்திருக்க வேண்டும்’ என்றார்.
அப்போது ஆர்ப்பாட்டத்தில் ஈடுபட்டிருந்தவர்கள் ‘இவர்களைப் பேச விட்டதே தப்பு. அடித்து விரட்ட வேண்டும்’ என்றார்கள்.
நுழைவாயிலில் இருந்து பாதுகாப்பு அதிகாரியோ மற்றும் எவரோ எம்மை சோதனையிட வேண்டும் என்று கோரவில்லை. அபாயா வேண்டாம். சாரி அணிந்து வாருங்கள். எங்களுக்குப் பயமாக இருக்கிறது என்றே கூறினார்கள் என்றார். எங்களை அபாயாவுடன் உள்ளே விட்டால் பிள்ளைகளுக்குப் பாதுகாப்பு இல்லை என்றும் கூறினார்கள்.
இதேவேளை அமைச்சர் மனோ கணேசன் முஸ்லிம் ஆசிரியைகள் தங்களது கைப்பைகளைப் பரிசோதனைக்கு உட்படுத்துவதற்கு அனுமதிக்கவில்லை. அதனாலே ஆசிரியைகள் திருப்பியனுப்பப்பட்டார்கள் என ஊடகங்களுக்குத் தெரிவித்துள்ளார். இதனை குறிப்பிட்ட பாதிக்கப்பட்ட ஆசிரியை முழுமையாக மறுத்துள்ளார். முழுப்பொய் எனவும் தெரிவித்துள்ளார். நல்லிணக்கத்துக்கும், இன நல்லுறவுக்குமான அமைச்சர் இவ்வாறு தெரிவித்துள்ளமை கவலை தருகிறது என்றும் கூறியுள்ளார்.
மேல் மாகாண ஆளுநர் அசாத் சாலியும் இவ்விவகாரம் தொடர்பில் கருத்து வெளியிட்டுள்ளார்.
அபாயா அணிந்துகொண்டு பாடசாலைகளுக்கு கடமைக்குச்செல்ல முடியாது என கல்வியமைச்சு சுற்றுநிருபம் எதையும் வெளியிட்டில்லை. புவக்பிட்டிய தமிழ் மகா வித்தியாலய ஆசிரியைகளை தீவிரவாதிகளெனப் பேசியுள்ளார்கள். அவர்களின் கைப்பையை சோதனைக்கு உட்படுத்த வேண்டுமென எவரும் கோரவில்லை. கைப்பைகளை சோதனைக்குட்படுத்த கோரியபோது ஆசிரியைகள் அதற்கு இடமளிக்கவில்லை என அமைச்சர் மனோ கணேசன் தெரிவித்திருப்பது தவறான கருத்தாகும்.
ஊடகங்களும் தவறாகவே செய்தி வெளியிட்டன. புர்கா அணிந்து பாடசாலைக்கு சென்ற 10 முஸ்லிம் ஆசிரியைகள் திருப்பியனுப்பப்பட்டதாகவே செய்திகள் வெளியாகின. செய்தியில் புர்கா மற்றும் நிக்காபின் படங்களே பிரசுரிக்கப் பட்டிருந்தன.
இது தொடர்பில் நான் ஊடகங்களுக்கு முறையிட்டேன். திருத்தப்பட்டு ஹிஜாப் அணிந்து சென்ற ஆசிரியைகள் என செய்தி வெளியிடப்பட்டாலும் புர்காவின் படமே பிரசுரிக்கப்பட்டது. ஹிஜாப் என்றால் என்னவென்றே மாற்று மொழி ஊடகங்களுக்குத் தெரியாது என்றார்.
vidivelli