முஸ்லிம்களின் கலாசாரத்தை ஒழிக்க சிலர் முயல்கின்றனர்
பயங்கரவாதத்தின் பின்னாலுள்ள சர்வதேச சக்தியை இனங்காண வேண்டும் என்கிறார் அமைச்சர் ஹக்கீம்
நாட்டின் சுபீட்சத்தை விரும்பாத வெளிச்சக்தியொன்று இருக்கின்றது. இந்த சிறு கும்பலுக்கு பின்னணியில் இருக்கும் அந்த சர்வதேச சக்தியை அடையாளம் காணவேண்டும். அத்துடன் இந்த சம்பவத்தை அடிப்படையாகக்கொண்டு முஸ்லிம் மக்களின் கலாசாரத்தை ஒழிக்க சிலர் முயற்சிக்கின்றார்களா என்ற சந்தேகம் முஸ்லிம் சமூகத்தில் இருந்து வருகின்றது என ஸ்ரீலங்கா முஸ்லிம் காங்கிரஸ் தலைவரும் அமைச்சருமான ரவூப் ஹக்கீம் தெரிவித்தார்.
பாராளுமன்றத்தில் நேற்று செவ்வாய்க்கிழமை, கடந்த 21ஆம் திகதி பயங்கரவாத தாக்குதலையடுத்து சுற்றுலாத்துறைக்கு ஏற்பட்டுள்ள பாதிப்புகள் குறித்த சபை ஒத்திவைப்பு வேளை விவாதத்தில் கலந்துகொண்டு கருத்து தெரிவிக்கும்போதே இவ்வாறு குறிப்பிட்டார்.
அவர் அங்கு தொடர்ந்து தெரிவிக்கையில்,
மதத்தின் பெயரால் மேற்கொண்ட இந்த தாக்குதலை சிறியதொரு கும்பலே மேற்கொண்டிருக்கின்றது. இந்த சிறிய கும்பலை பரவவிடாமல் தடுப்பதை தவிர வேறு வழி எமக்கில்லை. இவர்களின் நோக்கம் என்ன? மார்க்கத்தில் இல்லாத விடயத்தை முன்னிலைப்படுத்திக்கொண்டு இவர்கள் மேற்கொண்ட இந்த செயலால் அவர்களின் உடலைக்கூட மார்க்கத்தின் அடிப்படையில் நல்லடக்கம் செய்ய முடியாத நிலைக்கு சென்றிருக்கின்றது. விடுதலைப்புலிகள் தனிநாட்டுக் கோரிக்கையுடன் போரிட்டனர். அவர்களின் இயக்கத்தை அழித்ததுடன் விடுதலைப்புலிகளின் போராட்டம் முடிவுக்கு வந்தது. என்றாலும் தற்போது குண்டுத்தாக்குதலை மேற்கொண்ட சிறிய கும்பலுக்கு பின்னால் வெளிச்சக்தி இருப்பதை காண்கின்றோம். என்றாலும் முஸ்லிம் சமூகத்தில் இவர்களுக்கு ஆதரவாக பேசக்கூடியவர்கள் எவரும் இல்லை. இஸ்லாமிய உலகத்தை உருவாக்குவதாக தெரிவித்து உள்நாட்டில் தனது குடும்பத்தை மாய்த்துக்கொண்டிருப்பது எவ்வளவு மடமைத்தனம் என்பதை காணலாம். இந்த கும்பலை யாரோ பயன்படுத்தி இருக்கின்றார்கள். அதனை கண்டுபிடிக்கவேண்டும். மாறாக நாட்டுக்குள் மாத்திரம் சோதனைகளை மேற்கொண்டு ஒருசிலரை கைதுசெய்து அவர்களை புனருத்தாபனத்துக்கு அனுப்புவதன் மூலம் இதனை கட்டுப்படுத்த முடியாது. மேலும் நாட்டின் சுபீட்சத்தை வெளிச்சக்தி விரும்பவில்லை. அந்த சக்தியே இந்த சிறிய கும்பலை பயன்படுத்தியுள்ளது. அந்த சக்தியை அடையாளம் காணவேண்டும். அதற்காக முஸ்லிம் சமூகம் உச்சகட்ட பொறுமையுடன் பாதுகாப்பு பிரிவுக்கு ஆதரவளித்து வருகின்றது. இந்த சம்பவத்தை பயன்படுத்திக்கொண்டு முஸ்லிம் சமூகத்தை நெருக்கடிக்கு ஆளாக்கும்வகையில் நடத்த முற்படக்கூடாது. அவ்வாறான நிலையில் அவர்களும் விரும்பியோ இல்லையோ வேறு திசைக்குத் தள்ளப்படுவார்கள்.
அத்துடன் இந்த சம்பவத்தை பயன்படுத்திக்கொண்டு முஸ்லிம் சமூகத்தின் கலாசாரத்தை ஒழிக்க சிலர் முற்பட்டு வருகின்றார்களா என்ற சந்தேகம் முஸ்லிம் மக்கள் மத்தியில் இருந்து வருகின்றது. முஸ்லிம் பெண்கள் முகத்தை மறைத்து ஆடை அணிவதை நிறுத்தியுள்ள நிலையில் அவர்கள் தலையை மறைத்து ஏனைய அவர்களின் ஆடைகளை அணிந்து செல்லும்போது அதற்கு பல இடையூறுகள் ஏற்படுத்தப்படுவதாக தெரிவிக்கப்படுகின்றது. இவை நிறுத்தப்படவேண்டும்.
எனவே, நாட்டின் சுபீட்சத்தை விரும்பாத சர்வதேச வெளிச்சக்தியை அடையாளம் காணவேண்டும். அதற்காக நாங்கள் அனைவரும் ஒருவருக்கொருவர் விரல் நீட்டிக்கொள்ளாமல் ஒன்றிணைந்து செயற்படவேண்டும் என்றார்.
-Vidivelli