ரோஹிங்ய படுகொலைகளை வெளிப்படுத்தியமைக்காக மியன்மாரில் சிறையில் அடைக்கப்பட்டிருந்த ரொயிட்டர் ஊடகவியலாளர்கள் இருவரும் 500 நாட்களுக்கும் மேற்பட்ட காலம் தடுத்து வைக்கப்பட்டிருந்ததன் பின்னர் விடுவிக்கப்பட்டுள்ளனர்.
மியன்மார் இராணுவத்தினரால் 10 ரோஹிங்ய முஸ்லிம்கள் கொல்லப்பட்டதை அறிக்கையிட்டதைத் தொடர்ந்து கடந்த வருடம் டிசம்பர் மாதம் தொடக்கம் தடுத்து வைக்கப்பட்டிருந்த ரொயிட்டர் ஊடகவியலாளர்களான 32 வயதான வா லோன் மற்றும் 28 வயதான கியவ் ஓஒ ஆகியோர் மீது நாட்டின் உத்தியோகபூர்வ இரகசிய சட்டத்தினை மீறியதாக மியன்மாரினால் குற்றம் சாட்டப்பட்டிருந்தது.
கடந்த ஏப்ரல் மாதம் 17 ஆம் திகதி ஆரம்பமான பாரம்பரிய புதுவருடத்தைக் கொண்டாடும் வகையில் ஜனாதிபதியின் மயின்ட்டினால் வழங்கப்பட்ட மூன்றாவது சுற்று பொது மன்னிப்பின் கீழ் 6,520 கைதிகளுடன் குறித்த ஊடகவியலாளர்கள் இருவரும் விடுவிக்கப்பட்டனர்.
வா லோனின் மனைவி பான் ஈ மொன் ஊடகவியலாளர்கள் விடுவிக்கப்பட்டதை உறுதிப்படுத்தினார். நாம் தற்போது அவர்களுடனேயே இருக்கின்றோம், அவர்கள் விடுவிக்கப்பட்டுள்ளனர் என தொலைபேசி மூலம் அவர் தெரிவித்தார்.
2017 ஆம் ஆண்டு மியன்மாரின் ராக்கைன் மாநிலத்தில் 10 ரோஹிங்ய ஆண்கள் கொல்லப்பட்டமை தொடர்பில் தகவல்களைச் சேகரித்ததன் மூலம் பழைமைவாய்ந்த சட்டத்தை மீறியமைக்கு 2017 டிசம்பர் மாதம் கைது செய்யப்பட்ட இருவருக்கும் 2018 செப்டம்பர் மாதம் தலா ஏழு வருட சிறைத் தண்டனை விதிக்கப்பட்டிருந்தமை குறிப்பிடத்தக்கது.
-Vidivelli