முஸ்லிம்களின் அடையாளம் என்பது அடிப்படைவாதம் அல்ல. ஆகவே முஸ்லிம் சமூகத்தில் ஒளிந்திருக்கும் அடிப்படைவாதிகளை காட்டிக்கொடுக்க வேண்டும். மீண்டும் இலங்கையராக நாம் அனைவரும் ஒன்றிணைய வேண்டும் என அமைச்சர் சம்பிக்க ரணவக்க தெரிவித்தார்.
இந்த நாட்டில் மதவாத மோதல்களை உருவாக்க எவரும் முயற்சிக்கக்கூடாது எனவும் அவர் வலியுறுத்தியுள்ளார்.
மேல் மாகாண மற்றும் நகர அபிவிருத்தி அமைச்சர் சம்பிக்க ரணவக்க விடுத்துள்ள அறிக்கையில் அவர் இதனைக் குறிப்பிட்டுள்ளார்.
இது குறித்து அவர் மேலும் கூறுகையில், எவ்வாறான பிரிவினைவாதம், அரசியல் முரண்பாடுகள் இருந்தாலும் கூட எமது புலனாய்வுத் துறையின் தகவல்களை கருத்தில் கொள்ளாது நிலைமைகளை கருத்தில் கொள்ளாது ஒரு சிலரது கீழ்த்தரமான அரசியல் நடவடிக்கைகளை கையாண்ட காரணத்தினால் தான் இலங்கையில் மீண்டும் ஒரு பயங்கரவாத தாக்குதல் இடம்பெற்றுள்ளது.
சஹ்றான் என்ற நபர் இன்று அல்ல கடந்த 2014 ஆம் ஆண்டே தடுக்கப்பட வேண்டிய ஒரு நபராவார். அதேபோல் எதிர்காலத்தில் உருவாகவிருக்கும் பயங்கரவாத சாத்தான்களை தடுத்து நிறுத்த வேண்டும்.
இதில் பிரதான கடமை முஸ்லிம் மக்களிடம் உள்ளது. இதற்காக எந்த அச்சமும் இல்லாது முன்வரவேண்டும்.
முஸ்லிம்கள் மத்தியில் இருக்கும் அடிப்படைவாதிகளை எமக்கு வெளிப்படுத்த வேண்டும். எமது பாதுகாப்பு படைகளுக்கு இந்த தகவல்களை தாருங்கள்.
மீண்டும் முஸ்லிம்கள் நல்லிணக்கத்தை கையில் எடுத்து அனைவருடனும் இணைந்து வாழும் பலமான சூழலை நாம் உருவாக்குவோம். சமூக வேறுபாடு இல்லாது, சமூக பிரிவினை இல்லாது உணவு, உடை முதல்கொண்டு நாம் அனைவரும் ஒற்றுமையான ஓர் இடத்துக்கு வருவோம்.
நாம் ஒருபோதும் இஸ்லாமிய கொள்கைகளை நிராகரிக்கவில்லை. சிங்களவர்களுக்கு என்ற ஓர் அடையாளம் உள்ளது, இந்துக்களுக்கு ஓர் அடையாளம் உள்ளது, கிறிஸ்தவர்களுக்கு ஓர் அடையாளம் உள்ளது. அதேபோல் முஸ்லிம் மக்களின் அடையாளத்தை நாம் நிராகரிக்கவில்லை.
அடையாளம் என்பது அடிப்படைவாதம் இல்லை என்பதை அனைவரும் நினைவில் வைத்துக் கொள்ளவேண்டும்.
நாம் அனைவரும் மனிதர்கள் வாழும் உலகில் வாழ்கின்றோம், நாம் அனைவரும் இலங்கைக்குள் வாழ்கின்றோம் என்பதை மறந்துவிடக்கூடாது.
முதலில் நாம் மனிதர்கள், அடுத்து இலங்கையர்கள் என்ற எண்ணத்தில் நாட்டின் வளர்ச்சிக்காக அனைவரும் வாழ வேண்டும்.
ஆகவே பயங்கரவாதத்தை ஒழிக்க அனைவரும் ஒத்துழைப்பு வழங்க வேண்டும். இன்று உருவாகியுள்ளது பிரபாகரன் அல்ல, இது விடுதலைப்புலிகளின் பயங்கரவாதம் அல்ல. இதை ஆரம்பத்தில் ஒழிக்க முடிந்தால் நாட்டினை ஆரோக்கியமாக பாதுகாக்க முடியும். அவ்வாறு செயற்பட்டால் மதவாத முரண்பாடு இல்லாத நாடாக எம்மை மாற்றிக்கொள்ள முடியும்.
இந்த பயங்கரவாதத்தை இந்தியாவோ சீனாவோ, அமெரிக்காவோ ரஷ்யாவோ மத்திய கிழக்கின் ஜனநாயக நாடுகளோ அங்கீகரிக்கவில்லை.
இந்த பயங்கரவாதம் அனைத்து நாடுகளுக்கும் அச்சுறுத்தல் என்பதால் நாம் அனைவரும் இணைந்து இவற்றை அழிக்க முடியும்.
இந்த சம்பவத்தால் தவறுகள் ஒரு சிலர் மீது சுமத்தலாம் ஆனால் தவறிய இடம் என்ன என்பதை ஆராய்ந்து எமது பாதுகாப்பு துறைக்கு பொருத்தமான நபர்களை நியமிக்க வேண்டும் எனவும் அவர் குறிப்பிட்டார்.
vidivelli