காத்தான்குடி வாழ் மக்கள் தீவிரவாதத்துக்கு எதிரானவர்கள் ஒருசிலரின் செயலால் வெட்கமும் கவலையும் அடைகிறோம்

காத்தான்குடி சிவில் அமைப்புக்களின் சம்மேளனம் தெரிவிப்பு

By vidivelli On May 1, 2019

எவ்வகையான தீவிரவாத நடவடிக்கைகளையும் காத்தான்குடி பொது மக்கள் எச் சந்தரப்பத்திலும் ஏற்றுக் கொள்ளவில்லையென காத்தான்குடி சிவில் சமூக அமைப்புக்களின் சம்மேளனம் நேற்று முன்தினம் நடாத்திய ஊடகவியலாளர் மாநாட்டின் போது அதன் தலைவர் அஷ்ஷெய்க் எம்.பி.எம்.பிர்தௌஸ் (நளீமி) தெரிவித்தார். இந்த ஊடகவியலாளர் சந்திப்பு காத்தான்குடி பீச்வே ஹோட்டல் மண்டபத்தில் நடைபெற்றது.

இதன் போது தொடர்ந்து கருத்து தெரிவித்த அவர், கடந்த 21ஆம் திகதி ஞாயிற்றுக்கிழமை இடம் பெற்ற தற்கொலைத்தாக்குதல் சம்பவத்துடன் தொடர்புபட்ட பிரதான நபர் காத்தான்குடியைச் சேர்ந்தவன் என்ற வகையில் பொதுவாக நாடு முழுவதிலும் குறிப்பாக மட்டக்களப்பு, அம்பாறை மாவட்டங்களில் ஏற்பட்டுள்ள ஒரு அச்ச நிலை தொடர்பிலும் சந்தேகப் பார்வை தொடர்பிலும் பதிலளிக்க வேண்டிய கடப்பாட்டினை நாம் கொண்டுள்ளோம்.

இத்தாக்குதலுடன் தொடர்புபட்டவர்கள் காத்தான்குடியைச் சேர்ந்த விரல் விட்டு எண்ணக் கூடியவர்களேயாகும். அவர்களினது எவ்வகையான தீவிரவாத நடவடிக்கைகளையும் காத்தான்குடி பொது மக்கள் எச் சந்தர்ப்பத்திலும் ஏற்றுக் கொள்ளவில்லை என்பதாலேயே இத்தாக்குதல் சம்பவங்களில் பிரதான சூத்திரதாரியும் அவருடன் தொடர்புபட்ட ஒரு சிலரும் 2017 ஆம் ஆண்டு காத்தான்குடியை விட்டு தலைமறைவாகினர். அத்தோடு அவர்களுக்கு எதிராக தாக்கல் செய்யப்பட்ட வழக்குகளுக்கு ஆஜராகாது ஒளிந்து வாழ்ந்தார்கள் என்பதனையும் இவ்விடத்தில் சுட்டிக்காட்ட விரும்புகின்றோம்.

நாட்டின் சட்டம் ஒழுங்கைப் பேணி சமாதான சக வாழ்வினை இந் நாட்டில் வாழும் இனங்கள் மற்றும் சமயங்களுக்கூடாக கட்டியெழுப்ப கடந்த காலங்களைப் போலவே எதிர்காலத்திலும் எமது பூரண ஒத்துழைப்பினை வழங்கவும் அர்ப்பணிப்புடன் செயற்படவும் இத்தருணத்தில் காத்தான்குடி மக்களாகிய நாம் உறுதிபூணுகின்றோம்.

இஸ்லாத்தின் பெயரால் இத்தாக்குதலை முன்னெடுத்த ஐ.எஸ்.பயங்கரவாத அமைப்பினர் எமதூரைச் சேர்ந்தவர்களை பயன்படுத்தியுள்ளமையையிட்டு நாம் வெட்கித் தலை குனிகின்றோம்.

இலங்கை முஸ்லிம்கள் கடந்த 30 வருடகால யுத்தத்திலும் யுத்தத்திற்கு பின்னரும் பல்வேறு படுகொலைகள், இழப்புக்கள், பலவந்த வெளியேற்றங்களை சந்தித்த போதிலும் ஒரு போதும் வன்முறையினை நாடவில்லை என்பதனை பொறுப்புடன் ஞாபகமூட்ட விரும்புகின்றோம்.

அவ்வாறே இஸ்லாத்தைப் பொறுத்தவரையில் மத விடயத்தில் பலாத்காரம் இல்லை என்பன போன்ற வழிகாட்டல்களையே அல்குர்ஆன் எமக்குப் போதிக்கின்றது. இதற்கு மாற்றமான வன்முறையை இஸ்லாம் ஒரு போதும் அங்கீகரிக்கவில்லை. அந்தவகையில் கடந்த 21.04.2019 ஞாயிற்றுக் கிழமை இடம்பெற்ற மதத்தின் பெயரிலான மிலேச்சத்தனமான வன்முறைகளை இலங்கை முஸ்லிம்கள் சார்பாகவும் குறிப்பாக காத்தான்குடி முஸ்லிம்கள் சார்பாகவும் வன்மையாகக் கண்டிக்கின்றோம்.

இலங்கை வரலாற்றில் 2019 ஏப்ரல் 21 ஆம் திகதி மற்றுமொரு இரத்தக் கறைபடிந்த நாளாகும். கத்தோலிக்க மக்களின் புனித தினமான உயிர்த்த ஞாயிறு தினத்தில் திட்டமிட்டு தீவிரவாதிகளால் மேற்கொள்ளப்பட்ட கோழைத்தனமானதும் மிலேச்சத்தனமானதுமான இக்குண்டுத் தாக்குதலுக்கு இலக்காகி உயிர்நீத்த இலங்கையர்கள், வெளிநாட்டவர்கள், பாதுகாப்பு தரப்பினர் அனைவருக்கும் எமது ஆழ்ந்த அனுதாபங்களை தெரிவித்துக் கொள்கின்றோம்.
இத்தாக்குதல் சம்பவத்தில் படுகாயமடைந்து வைத்தியசாலையில் சிகிச்சை பெற்றுவரும் அனைவரும் மிகவிரைவாக குணமடைய இறைவனைப் பிரார்த்திக்கின்றோம். இக் கோழைத்தனமானதும் மிலேச்சத்தனமானதுமான தாக்குதல் சம்பவங்களில் தமது உறவுகளை இழந்து துயருறும் உங்கள் அனைவரது துன்பத்திலும், துயரத்திலும் நாங்களும் பங்குகொள்கின்றோம்.

போர் முடிவுக்கு வந்த பின்னர் இலங்கையில் மீண்டும் குண்டு வெடிப்புக்கள், மனிதப் படுகொலைகள் தொடர்பான அச்சத்தை விதைத்துச் சென்றுள்ள இத்தாக்குதல் சம்பவங்கள் மனித குலத்திற்கு விரோதமானவையேயாகும்.
இலங்கையின் அமைதியையும் பல்லினத் தன்மையையும் சகிக்க முடியாத சர்வதேச தீவிரவாத சக்திகளின் சதிவலைகளில் சிக்கிய குறிப்பிட்ட சிலரது இந்த தீவிரவாத செயல் இலங்கையை மீண்டும் அச்சத்திற்குள்ளும் ஒருவரையொருவர் சந்தேகத்தோடும், பயத்தோடும் நோக்கும் நிலையை தோற்றுவித்துள்ளமையையிட்டு நாம் பெரிதும் கவலையடைகின்றோம்.

இத்தாக்குதல் சம்பவத்தில் சம்பந்தப்பட்டவர்கள் முஸ்லிம்கள் என்றவகையில் இத்தாக்குதல் சம்பவங்களில் பெரிதும் பாதிக்கப்பட்ட கத்தோலிக்க சகோதர சகோதரிகளை அமைதிப்படுத்தி, முஸ்லிம்களை நோக்கி விரும்பத்தகாத நடவடிக்கைகள் எதுவும் இடம்பெற்றுவிடாமல் இருக்கவும் ஒட்டு மொத்த முஸ்லிம்களையும் குற்றவாளிக் கூண்டில் நிறுத்தாமல் இருக்கவும் வழிகாட்டிய பேராயர் மதிப்பிற்குரிய மல்கம் ரஞ்சித் அவர்களுக்கும், மட்டக்களப்பு கத்தோலிக்க திருச்சபையினருக்கும் எமது மனமார்ந்த நன்றிகளை இச்சந்தர்ப்பத்தில் தெரிவித்துக் கொள்கின்றோம்.

இதேவேளை இலங்கையின் அனைத்துப் பகுதிகளிலும் வியாபார நிமித்தமும் கல்விசார் நடவடிக்கைளுக்காகவும், தனிப்பட்ட தேவைகளுக்காகவும் வாழும் சமாதானத்தையும் , அமைதியையும் விரும்பும் காத்தான்குடி வாசிகளுக்கு எவ்வித இடையூறுகளும் ஏற்படாத வண்ணம் செயற்படுமாறு, சந்தேகம் ஏற்படுமிடத்து அதனை உரிய சட்ட ஏற்பாடுகளுக்கூடாக கையாளுமாறும் எச்சந்தர்ப்பத்திலும் வன்முறையை கையிலெடுக்க வேண்டாம் என்றும் இலங்கை பிரஜைகள் அனைவரையும் இப்பத்திரிகையாளர் மாநாட்டினூடாக மிக வினயமாகக் கேட்டுக் கொள்கின்றோம். விரும்பத்தகாத இச்சம்பவங்கள் நமது இலங்கை தாய் நாட்டிற்கு ஏற்படுத்தியுள்ள அழிவு, பொருளாதார வீழ்ச்சி என்பவற்றிலிருந்து நாட்டை மீண்டும் கட்டியெழுப்ப இலங்கையர்கள் என்றவகையில் உங்கள் அனைவருடனும் காத்தான்குடி மக்களாகிய நாமும் கைகோர்க்கத் தயாராய் உள்ளோம் என்பதனையும் அதற்கு எதிராக எழும் அனைத்து வகையான சவால்களையும் முறியடிக்க உங்கள் அனைவருடனும் கைகோர்க்கின்றோம் என்பதனையும் இப்பத்திரிகையாளர் மாநாட்டிற்கூடாக தெரிவித்துக் கொள்கின்றோம் என்றார்.

இந்த ஊடகவியலாளர் சந்திப்பில் இவ்வமைப்பின் செயலாளர் எம்.ஏ.சி.எம். ஜவாஹிர், உறுப்பினர்களான சட்டத்தரணி ஏ.உவைஸ், யூ.எல்.எம்.என்.முபீன் உட்பட உலமாக்கள், முக்கியஸ்தர்கள் கலந்து கொண்டனர்.

vidivelli