உயிர்த்த ஞாயிறு தினத்தன்று கிறிஸ்தவ ஆலயங்களிலும் நட்சத்திர ஹோட்டல்கள் சிலவற்றிலும் இடம்பெற்ற தற்கொலைக் குண்டுத்தாக்குதல்களையடுத்து நாட்டினதும் பொதுமக்களினதும் பாதுகாப்பினை அரசாங்கம் பலப்படுத்தியுள்ளது.
நாடளாவிய ரீதியில் வீடுகள் பலத்த சோதனைக்குள்ளாக்கப்பட்டு வருகின்றன. சந்தேகத்தின் பேரில் சில பள்ளிவாசல்களும் சோதனைக்குட்படுத்தப்பட்டுள்ளன. மக்கள் ஒன்று கூடுமிடங்களான ரயில் நிலையங்கள், பிரதான பஸ் நிலையங்கள், வைத்தியசாலைகள் உட்பட பல முக்கிய இடங்களில் ஆயுதமேந்திய படைவீரர்கள் கடமையில் ஈடுபடுத்தப்பட்டுள்ளனர்.
மக்கள் கட்டாய பயணங்களைத் தவிர ஏனைய பயணங்களைத் தவிர்த்துள்ளனர். ரயில்களிலும் பஸ்களிலும் பெரிய பயணப் பைகளுடன் ஏறுபவர்களை மக்கள் சந்தேகக் கண்கொண்டு பார்க்கின்றனர். அபாயா, புர்கா, நிக்காப் அணிந்து பயணிக்கும் எமது பெண்களைக் காணமுடியாதுள்ளது.
முஸ்லிம்கள் பெரும் அச்சத்துடன் வாழவேண்டிய சூழ்நிலை உருவாகியுள்ளது. தற்கொலை குண்டுத்தாக்குதல்கள் நடத்தி நூற்றுக்கணக்கான அப்பாவி உயிர்களைக் காவு கொண்டவர்கள் முஸ்லிம் தீவிரவாதிகள் என்பது நிரூபணமாகியுள்ளது.
இவ்வாறான சூழ்நிலையில் முஸ்லிம் சமூகம் நாங்கள் நிரபராதிகள், தீவிரவாதத்துக்கும் தீவிரவாத குழுவுக்கும் எங்களுக்கும் தொடர்பில்லை’ என்பதை நிரூபிக்க வேண்டிய நிலைக்குத் தள்ளப்பட்டுள்ளது.
சமூகத்தினுள் ஊடுருவியுள்ள ஒரு சிறு குழுவினரை சட்டத்தின் முன் நிறுத்த வேண்டியது முஸ்லிம்களின் கடமையாகவுள்ளது. அவர்களை இனங்கண்டு சட்டத்தின் பிடிக்குள் சிக்க வைப்பதற்கு முஸ்லிம்கள் பாதுகாப்பு பிரிவினருக்கு ஒத்துழைக்க வேண்டும். இதனை அஞ்சல், அஞ்சல் சேவைகள் மற்றும் முஸ்லிம் சமய விவகார அமைச்சரும் வலியுறுத்தியுள்ளார்.
2018 ஆம் ஆண்டு டிசம்பர் மாதம் இடம்பெற்ற மாவனெல்லையில் புத்தர் சிலை உடைப்பு சம்பவத்துடன் தொடர்புடையவர்களைக் கைதுசெய்ய சமூகநலன் கருதிய முஸ்லிம்களே பாதுகாப்புப் பிரிவினருக்கு ஒத்துழைப்பு வழங்கினார்கள். ஒத்துழைப்பு வழங்கியதற்காக அமைச்சர் கபீர் ஹாசிமின் ஆதரவாளர் ஒருவர் சுடப்பட்டமையையும் நாம் அறிவோம்.
கடந்த 26 ஆம் திகதி இரவு கல்முனை – சாய்ந்தமருது வில் இடம்பெற்ற தீவிரவாதிகளின் வெடிபொருட்கள் களஞ்சியசாலை சுற்றிவளைப்புக்கும் முஸ்லிம்களே தகவல் வழங்கியுள்ளனர். இதனால் பாரிய அழிவுக்கான திட்டம் முறியடிக்கப்பட்டுள்ளது. சாய்ந்தமருதுவில் சந்தேகத்துக்கிடமானவர்கள் தங்கியிருக்கிறார்கள், சந்தேகத்திற்கிடமான நடவடிக்கைகள் முன்னெடுக்கப் படுகின்றன என முஸ்லிம்களே அரச புலனாய்வுப் பிரிவினருக்கு தகவல் வழங்கியிருக்கிறார்கள். அந்தத் தகவல்களின் அடிப்படையிலேயே வெடிபொருள் களஞ்சியசாலை முற்றுகையிடப்பட்டது. இதிலிருந்து முஸ்லிம்கள் தீவிரவாதத்துக்கு எதிரானவர்கள். நாட்டுப்பற்றுள்ளவர்கள் என்பதை நிரூபித்துள்ளார்கள்.
அதேபோன்று சம்மாந்துறையில் குண்டு தயாரிப்பதற்கான மூலப்பொருட்கள், இரசாயனப் பொருட்கள், ஒரு இலட்சம் சிறிய இரும்பு உருளைகள், தற்கொலை குண்டு ஆடை உட்பட பல பொருட்கள் பாதுகாப்புப் பிரிவினரால் கண்டெடுக்கப்பட்டுள்ளன.
புர்கா தடை செய்யப்படவேண்டும் என்ற யோசனைக்கும் அகில இலங்கை ஜம்இய்யத்துல் உலமா சபை உட்பட முஸ்லிம் பாராளுமன்ற உறுப்பினர்கள் பச்சைக் கொடி காட்டியுள்ளனர். நாட்டிலிருந்து தீவிரவாதத்தை அடியோடு வேரறுப்பதற்கு முஸ்லிம்கள் தயார் என்பதை இது உறுதிப்படுத்துகிறது.
முஸ்லிம் சமூகம் இஸ்லாம் வெறுத்துள்ள தீவிரவாதத்தையும் மனிதப் படுகொலைகளையும் ஒழிப்பதற்கு தொடர்ந்தும் அரசாங்கத்துடன் கைகோர்க்க வேண்டும். தாங்கள் நிரபராதிகள், தீவிரவாதத்துக்கும் எமக்கும் எந்தத் தொடர்புமில்லை என்பதை நிரூபிக்க வேண்டும். இவ்வாறு நிரூபிப்பதன் மூலமே நாட்டில் ஏனைய இனங்களுடன் முன்புபோல் கைகோர்த்து ஒன்றிணைந்து வாழ்வதற்கான சூழல் உருவாகும். இல்லையேல் நாம் எப்போதும் சந்தேகக் கண்கொண்டே நோக்கப்படுவோம்.
சாய்ந்தமருதுவில் சுற்றிவளைப்புகளை மேற்கொள்வ தற்கு முஸ்லிம்களே தகவல் வழங்கியதாக கிழக்கின் இராணுவ மையத்தின் உயரதிகாரி முஸ்லிம்களைப் பாராட்டியுள்ளார். முஸ்லிம்கள் தொடர்ந்தும் இவ்வாறான விடயங்களில் ஒத்துழைப்பு வழங்கவேண்டுமென அறைகூவல் விடுத்துள்ளார்.
பல்லின மக்கள் வாழும் எமது நாட்டில் சமாதானத்துடனும் பாதுகாப்புடனும் வாழ்வதற்கு நாம் தொடர்ந்தும் ஒத்துழைப்பு வழங்குவோம்.
vidivelli