ஏ.ஆர்.ஏ. பரீல்
இலங்கை வரலாற்றில் பாரிய இரத்தக் கறையொன்று பதிந்துவிட்டது. காலத்தால் அழிக்க முடியாத அப்பாவி மக்களின் இரத்தக் கறையது.
நாட்டு மக்களை மாத்திரமல்ல. சர்வதேசத்தையும் அதிர்ச்சியில் உறைய வைத்துள்ள வெடிப்புச் சம்பவங்கள் அவை. மனமிரங்கி இறைவனைப் பிரார்த்தித்துக் கொண்டிருந்தவர்களும் தங்கள் விடுமுறையை நட்சத்திர ஹோட்டல்களில் கழித்துக் கொண்டிருந்தவர்களும் பலி கொள்ளப்பட்டிருக்கிறார்கள்.
நாட்டின் ஆட்சியாளர்களை நடுங்க வைத்துள்ள இந்தக் கொடூர சம்பவங்களை ஏன் அரசாங்கத்தினால் தடுத்து நிறுத்த முடியாமற் போனது? நாட்டின் தேசிய பாதுகாப்பு ஏன் பலவீனப்பட்டுள்ளது? என்ற சர்ச்சையில் மக்கள் குழம்பிப் போயிருக்கிறார்கள். தங்கள் பாதுகாப்பு தொடர்பில் தொடர்ந்தும் அச்சம் கொண்டுள்ளார்கள்.
ஒன்று இரண்டல்ல. முற்பகல் வேளையில் 6 வெடிப்புச் சம்பவங்கள். பிற்பகல் வேளையில் 2 வெடிப்புச் சம்பவங்கள். இச்சம்பவங்களில் 290 பேர் பலியாகியிருப்பதாகவும் 450 க்கும் மேற்பட்டோர் காயங்களுக்குள்ளாகி வைத்தியசாலையில் அனுமதிக்கப்பட்டுள்ளதாகவும் தகவல்கள் தெரிவிக்கின்றன.
கொழும்பு, கொச்சிக்கடை அந்தோனியார் தேவாலயம், நீர்கொழும்பு, கட்டான, கட்டுவப்பிட்டிய தேவாலயம், மட்டக்களப்பு சீயோன் தேவாலயம் ஆகிய ஆலயங்களிலும் மற்றும் கொழும்பு ஷங்கிரில்லா, சினமன் கிரேன்ட், கிங்ஸ்பெரி ஆகிய நட்சத்திர ஹோட்டல்களிலும் பயங்கரவாதிகள் தங்கள் கைவரிசைகளைக் காட்டியுள்ளனர்.
தற்கொலைக் குண்டுதாரிகளே குண்டுகளை வெடிக்க வைத்திருப்பதாக தகவல்கள் வெளியாகிக் கொண்டிருக்கின்றன. உயிர்த்த ஞாயிறு தினத்தில் கல்நெஞ்சம் கொண்ட குண்டுதாரிகள் அப்பாவிகளின் உயிர்களைப் பலிகொண்டு உடல்களைச சிதறச் செய்திருக்கிறார்கள்.
தெஹிவளை, மிருகக்காட்சிசாலைக்கு அருகிலுள்ள ஹோட்டலொன்றிலும் தெமட்டகொடை மஹாவில வீட்டுத்தொகுதியிலும் குண்டு வெடிப்புச் சம்பவங்கள் இடம்பெற்றுள்ளன. தெமட்டகொடை சம்பவத்தில் பாதுகாப்பு பிரிவினைச் சேர்ந்த மூவர் மற்றும் வீட்டிலிருந்த நால்வர் பலிகொள்ளப்பட்டிருக்கிறார்கள். தெஹிவளை சம்பவத்தில் இருவர் பலியாகியிருக்கிறார்கள்.
அவதானமாக இருக்க வேண்டும்
முழு நாடும் சர்வதேசமும் ஆழ்ந்த கவலையில் மூழ்கியுள்ள இந்தச் சந்தர்ப்பத்தில் மக்கள் அடிப்படைவாதிகளிடமிருந்தும் தீவிரவாதிகளிடமிந்தும் மிகவும் எச்சரிக்கையாக இருக்க வேண்டும். குண்டுத் தாக்குதல்களின் சூத்திரதாரிகள் எந்த இனத்தை, எந்த மதத்தைச் சார்ந்தவர்கள் என்றாலும் அவர்களைத் தேடி கண்டுபிடிப்பது நாட்டின் பாதுகாப்பு பிரிவின் கடமையாகும்.
சமூக வலைத்தளங்களும் மற்றும் ஏனைய தரப்பினராலும் பரப்பப்பட்டு வரும் அடிப்படையற்ற தகவல்களிலிருந்தும் எச்சரிக்கையாக இருக்க வேண்டும்.
எரியும் நெருப்புக்கு எண்ணெய் வார்க்காது அவ்வாறான முயற்சிகளை முறியடிப்பதற்கு நாமனைவரும் இன, மத, பேதங்களின்றி செயற்பட வேண்டும். எமது நாட்டின் சமாதானம், நல்லிணக்கம், தேசிய ஒருமைப்பாடு என்பனவற்றை சீர்குலையச் செய்யும் முயற்சிகளுக்கு துணை போகக்கூடாது. இவ்வாறான சம்பவங்கள் மூலம் எமது நாட்டின் பொருளாதாரத்துக்கு பாரிய சவால்கள் ஏற்படும் என்பதை நாம் அனுபவ ரீதியாக உணர்ந்துள்ளோம். இவ்வாறான நிலைமை சிங்களவர், தமிழர், முஸ்லிம்கள், கிறிஸ்தவர் என்ற வேறுபாடின்றி அனைவரையுமே பாதிக்கும்.
பின்னணியில் அடிப்படைவாத அமைப்பு?
ஞாயிற்றுக்கிழமை இடம்பெற்ற தொடரான குண்டு வெடிப்புச் சம்பவங்களின் பின்னணியில் அடிப்படைவாத அமைப்பு உள்ளமை தெரிய வந்துள்ளது என இராஜாங்க பாதுகாப்பு அமைச்சர் ருவான் விஜயவர்தன குறிப்பிட்டுள்ளார். ஐ.எஸ். அமைப்பு தொடர்பில் தேசிய புலனாய்வுப் பிரிவு எச்சரித்திருந்ததுடன் இலங்கையில் அவர்களது செயற்பாடுகள் குறித்தும் கண்காணித்து வந்தது என்றும் அவர் தெரிவித்துள்ளார்.
ஜனாதிபதியின் செயலாளர் உதய ஆர். செனவிரத்ன, பாதுகாப்புச் செயலாளர் ஹேமசிறி பெர்ணான்டோ, வெளிவிவகார அமைச்சின் செயலாளர் ரவிநாத் ஆரியசிங்க ஆகியோர் கலந்து கொண்டிருந்த கூட்டத்திலே இந்தத் தகவலை வெளியிட்டிருக்கிறார். பல்வேறு இடங்களில் இடம்பெற்ற குண்டுவெடிப்பு சம்பவங்களின் பின்னணி அடையாளம் காணப்பட்டுள்ளது. கொழும்பு, மட்டக்களப்பு, நீர்கொழும்பு மற்றும் 3 ஹோட்டல்களில் இடம்பெற்ற தாக்குதல்கள் தற்கொலை குண்டுத் தாக்குதல்களாகவே காணப்படுகின்றன.
தேசிய புலனாய்வு பிரிவு மற்றும் அரச புலனாய்வுப் பிரிவு என்பன இவ்வாறான தாக்குதல்கள் குறித்து ஏற்கனவே தகவல்கள் வழங்கியிருந்தன. ஆனால் இவ்வாறான கொடூர சம்பவங்கள் இடம்பெறும் என எதிர்பார்க்கவில்லை. கிடைக்கப்பெற்ற அனைத்து புலனாய்வுத் தகவல்களுக்கு அமைய பாதுகாப்பு நடவடிக்கைகள் முன்னெடுக்கப்பட்டிருந்தன. மக்களின் பாதுகாப்பு குறித்து அரசு கவனம் செலுத்தவில்லை என எவரும் குற்றம் சாட்ட முடியாது” என்றும் அவர் கூறியுள்ளார்.
ஏற்கனவே உரிய நடவடிக்கை எடுக்கப்படவில்லை
பாதுகாப்பு இராஜாங்க அமைச்சர் ருவான் விஜயவர்தன புலனாய்வு தகவல்களுக்கு அமைவாக பாதுகாப்பு நடவடிக்கைகள் முன்னெடுக்கப்பட்டிருந்தன என்று தெரிவித்தாலும் பிரதமர் ரணில் விக்கிரமசிங்க தெரிவித்துள்ள கருத்துகள் மாறுபட்டவையாக அமைந்துள்ளன.
“கொழும்பு மற்றும் சில பகுதிகளில் இடம்பெற்ற குண்டுவெடிப்புச் சம்பவங்கள் தொடர்பில் ஏற்கனவே தகவல்கள் கிடைக்கப் பெற்றிருந்தும் அது தொடர்பில் தேவையான நடவடிக்கைகள் முழுமையாக எடுக்கப்படாமை, கவனம் செலுத்தப்படாமை மிகவும் பாரதூரமான விடயமாகும் என பிரதமர் தான் நடத்திய ஊடக மாநாட்டில் தெரிவித்திருந்தார்.
இந்த அபாய அறிவிப்பு தொடர்பில் தனக்கும் மற்றும் அமைச்சர்களினதும் கவனத்திற்குக் கொண்டு வரப்படாமை, உரிய கவனம் செலுத்தப்படாமை தொடர்பில் ஆராயவுள்ளதாகவும் அவர் கூறியுள்ளார்.
இதேவேளை, தற்கொலை குண்டுத்தாக்குதல் தொடர்பில் உளவுத்துறை ஏற்கனவே பொலிஸாரையும் எச்சரித்திருந்தது. அந்த எச்சரிக்கை உதாசீனம் செய்யப்பட்டதால் இச் சம்பவங்களைத் தடுக்க முடியாமற் போனதா? என்பது பற்றி ஆராயவுள்ளதாக பொலிஸ் ஊடக பேச்சாளர் பொலிஸ் அத்தியட்சகர் ருவன் குணசேகரவும் தெரிவித்துள்ளார்.
இவ்வாறு தாக்குதல் மேற்கொள்ளப்படவுள்ளது என்பதை வெளிப்படுத்தி உளவுத் துறையினரால் ஆவணம் ஒன்று வழங்கப்பட்டதை பாதுகாப்புச் செயலாளர் ஹேமசிறி பர்ணான்டோவும் ஒப்புக் கொண்டுள்ளமையும் குறிப்பிடத்தக்கதாகும்.
தாக்குதல் நடவடிக்கையின் தலைமையகம்
நாட்டில் கடந்த ஞாயிற்றுக்கிழமை இடம்பெற்ற குண்டு தாக்குதல்கள் தெமட்டகொடை மஹவில வீடமைப்புத் திட்டத்தைச் சேர்ந்த வீடொன்றிலிருந்தே ஒருங்கிணைக்கப்பட்டதாக பொலிஸார் சந்தேகிக்கின்றனர். அவ்வீட்டிலிருந்து சந்தேகத்தின் பேரில் இருவரை பொலிஸார் கைது செய்துள்ளனர்.
நேற்று முன்தினம் பிற்பகல் பொலிஸார் குறித்த வீட்டை சோதனைக்குட்படுத்த முற்படுத்தப்பட்டபோது அங்கிருந்த ஒருவர் குண்டொன்றினை வெடிக்கச் செய்ததால் வீட்டைச் சோதனையிடச் சென்றிருந்த பொலிஸ் உத்தியோகத்தர்கள் மூவர் உட்பட 7 பேர் பலியாகினார்கள்.
கொழும்பில் மூன்று நட்சத்திர ஹோட்டல்களில் இடம்பெற்ற குண்டு வெடிப்புச் சம்பவங்கள் தொடர்பில் மேற்கொள்ளப்பட்ட விசாரணைகளின்போது கிடைக்கப் பெற்ற தகவல்களுக்கு அமைவாகவே இவ்வீடு சோதனைக்குட்படுத்தப்பட்டது. அங்கு தற்கொலை குண்டுதாரி குண்டை வெடிக்கச் செய்தபோது கொங்கிறீட் உடைந்து வீழ்ந்து அதற்கு அடியில் தற்கொலை குண்டுதாரியும் மேலும் 3 பேரும் சிக்கி உயிரிழந்ததாக பொலிஸார் தெரிவித்தனர்.
மக்கள் அமைதியாக இருங்கள்
நடைபெற்று முடிந்த துரதிர்ஷ்ட சம்பவங்கள் தொடர்பில் சட்டத்தை அமுல்படுத்துவதற்கு சம்பந்தப்பட்ட பிரிவுகளுக்கு இடமளித்து அவர்களது பொறுப்பில் அனைத்தையும் ஒப்படைத்து அனைவரும் சமாதானமாகவும் தூர நோக்குடனும் செயற்படும்படியும் அமைதியாக இருக்கும்படியும் அஸ்கிரிய பீட மகாநாயக்க தேரர் வரகாகொட ஞானரத்ன வேண்டுகோள் விடுத்துள்ளார்.
அவர் வெளியிட்டுள்ள அறிக்கையொன்றிலேயே இந்த வேண்டுகோள் விடுக்கப்பட்டுள்ளது. அந்த அறிக்கையில் மேலும் இவ்வாறு தெரிவிக்கப்பட்டுள்ளது. ”கொழும்பு உட்பட சில பகுதிகளில் இடம்பெற்ற துரதிர்ஷ்ட சம்பவங்கள் தொடர்பில் நாம் மிகவும் கவலையடைகிறோம்.
கத்தோலிக்க மக்களின் சமய வழிபாடுகள் இடம்பெற்றபோது அவர்கள் இலக்கு வைக்கப்பட்டுள்ளார்கள். அநேகரின் உயிர் பலிகொள்ளப்பட்டுள்ளது. நூற்றுக்கணக்கானோர் காயங்களுக்குள்ளாகி சிகிச்சை பெற்று வருகிறார்கள். இலங்கையர் என்ற வகையில் சிங்களவர், தமிழர், முஸ்லிம்கள், பர்கர் என்ற வேறுபாடின்றி இந்த சம்பவங்களை வன்மையாக கண்டிப்போம். காயமடைந்துள்ளவர்களுக்காக பிரார்த்திப்போம். சட்டத்தை அமுல்படுத்த பாதுகாப்பு பிரிவினருக்கு இடமளித்து அமைதி காப்போம்’ எனத் தெரிவிக்கப்பட்டுள்ளது.
ஆலயத்துக்குள் நுழைந்து குண்டை வெடிக்கச் செய்தார்
‘பெரிய பை (பேக்) ஒன்றினைத் தோளில் தொங்கவிட்டுக் கொண்டு ஆலயத்துக்குள் நுழைந்த இளைஞர் ஒருவர் அப் பையை தோளிலிருந்து தூக்கும்போது பாரிய வெடிப்புச் சப்தத்துடன் தீ பரவியது’ என நீர்கொழும்பு கட்டுவப்பிட்டிய புனித செபஸ்தியான் ஆலயத்தில் இடம்பெற்ற குண்டு வெடிப்புச் சம்பவத்தை நேரில் கண்ட லக் ஷ்மன் பெரேரா தெரிவித்துள்ளார்.
தற்கொலை குண்டுதாரி ஆலயத்துக்குள் நுழைந்த சம்பவத்தை அவர் மேலும் விபரிக்கையில்;
‘நான் ஆலயத்தின் பின் புறமாக பிரதான வாசலின் அருகில் இருந்தேன். அப்போது ஆராதனையின் இறுதியில் நன்றி உரை நிகழ்த்தப்பட்டுக் கொண்டிருந்தது.
அப்போது இளைஞர் ஒருவர் ஆலயத்தின் மத்திய வாசல் ஊடாக உள்நுழைவதைக் கண்டேன். அவர் தோளில் பெரிய பை (பேக்) ஒன்றை தொங்கவிட்டுக் கொண்டிருந்தார். அந்த இளைஞர் ஆலயத்தின் மத்திக்குச் சென்றார். அதன் பின் தொங்கவிட்டிருந்த பையை உயரத்தில் தூக்கினார்.
அப்போது பாரிய வெடிப்புச் சப்தத்துடன் தீ பரவியது. பொதுவாக எவரும் ஆராதனை நடக்கும்போது இடை நடுவில் ஆலயத்துக்குள் நுழைவதில்லை. நாங்கள் இருந்த வாசலின் ஊடாக அவர் நுழைய முற்பட்டிருந்தால் நாம் அவருக்கு இடமளித்திருக்க மாட்டோம்’ என்றார்.
உதவி மதகுரு சஞ்சீவ அப்புஹாமி
நீர்கொழும்பு கட்டுவப்பிட்டிய ஆலயத்தின் உதவி மதகுரு சஞ்சீவ அப்புஹாமி குண்டு வெடிப்புச் சம்பவம் தொடர்பில் இவ்வாறு விபரித்தார். ”சம்பவம் நடைபெற்றபோது நாம் மதகுருவானவர்கள் மூவர் எங்களது ஆசனத்தில் அமர்ந்திருந்தோம். அச்சந்தர்ப்பத்தில் அனைத்து ஆராதனைகளும் நிறைவுற்று நன்றியுரை நிகழ்த்தப்பட்டுக் கொண்டிருந்தது. அப்போது நினைத்துப் பார்க்கவும் முடியாத பயங்கர வெடிச் சப்தமொன்று கேட்டது. எனது காலில் ஏதோவொன்று பட்டு காயம் ஏற்பட்டது. ஆராதனை நடந்து கொண்டிருக்கும்போது இச்சம்பவம் நிகழ்ந்திருந்தால் எமது உயிருக்கும் ஆபத்து ஏற்பட்டிருக்கும். நாம் உயிர் பிழைத்தது பற்றி சந்தோசப்படவில்லை. ஆலயத்துடன் மிகவும் நெருங்கித் தொடர்புபட்டிருந்தவர்கள் பலி கொள்ளப்பட்டு விட்டார்கள். அது குறித்து நாம் கவலைப்படுகிறோம்” என்றார்.
ஜனாதிபதி உத்தரவு
நடைபெற்றுள்ள வெடிப்புச் சம்பவங்கள் பற்றி இவற்றின் பின்னணி என்ன? இதுவொரு சூழ்ச்சியா? என்பதைக் கண்டறியுமாறு ஜனாதிபதி மைத்திரிபால சிறிசேன பாதுகாப்பு பிரிவினருக்கு உத்தரவிட்டுள்ளார். இதற்காக அனைவரும் பாதுகாப்பு பிரிவினருக்கு ஒத்துழைப்பு நல்க வேண்டுமெனவும் கோரியுள்ளார். இச் சம்பவங்களுடன் தொடர்புபட்டவர்களை சட்டத்தின் முன் நிறுத்துவதற்கு அரசாங்கம் அனைத்து நடவடிக்கைகளையும் மேற்கொண்டுள்ளதாகவும் தெரிவித்துள்ளார். மக்கள் பொய்ப் பிரசாரங்களுக்கு உட்பட்டு விடாது ஏமாறாது அமைதி காக்கும்படியும் வேண்டியுள்ளார்.
பிரதமர் சூளுரை
சம்பவங்கள் தொடர்பான விசாரணைகள் முன்னெடுக்கப்பட்டு வருகின்றன. விசாரணைகளின் பின்பு இவற்றுடன் தொடர்புபட்டவர்கள் எவராக இருந்தாலும் அவர்களுக்கு தராதரம் பாராது ஆகக்கூடிய தண்டனை வழங்கப்படுமென பிரதமர் ரணில் விக்கிரமசிங்க தெரிவித்துள்ளார்.
சட்டத்தை நிலை நாட்டுவதற்கு பாதுகாப்பு பிரிவினருக்கு அனைத்து அதிகாரங்களும் வழங்கப்பட்டுள்ளன என்றும் அவர் கூறியுள்ளார்.
அரசு பொறுப்புக்கூற வேண்டும்
தற்கொலைக் குண்டுதாரிகள் தாக்குதல்கள் மேற்கொள்ளத் திட்டமிட்டிருக்கிறார்கள் என அரச உளவுப் பிரிவு சம்பந்தப்பட்ட பாதுகாப்பு தரப்பினருக்கு ஏற்கனவே தகவல்களை வழங்கியிருந்தும் அது தொடர்பில் கவனம் செலுத்தப்படாமை இன்று விமர்சனத்துக்குள்ளாகியுள்ளது. இதற்கு அரசாங்கமே பொறுப்புக்கூற வேண்டும்.
பிரதமர் ரணில் விக்கிரமசிங்க கூட உளவுப் பிரிவினரின் அறிக்கை கவனத்திற் கொள்ளப்படாமையை விமர்சித்திருக்கிறார்.
அரசாங்கத்தின் அசமந்தப் போக்கே 290 உயிர்கள் பலி கொள்ளப்படுவதற்கும் 450 க்கும் மேற்பட்டோர் காயங்களுக்குள்ளா குவதற்கும் காரணமாய் அமைந்துள்ளது.
பிரதமர் ரணில் விக்கிரசிங்க வெறுமனே விமர்சனங்களை வெளியிடுவதுடன் பொறுப்பிலிருந்து விலகிக் கொள்ள முடியாது.
‘தேசிய பாதுகாப்பிற்கான அச்சுறுத்தல்களுக்கு அரசாங்கமே முழுப் பொறுப்பினையும் ஏற்க வேண்டும். தேசிய பாதுகாப்பினை உறுதிப்படுத்த அளப்பரிய சேவையாற்றிய புலனாய்வு பிரிவினர் மற்றும் பாதுகாப்பு பிரிவின் முக்கிய தரப்பினரை அவமதித்து கட்டுப்படுத்தியதன் விளைவே அப்பாவி மக்களை பலியெடுத்துள்ளதென எதிர்க்கட்சித் தலைவர் மஹிந்த ராஜபக் ஷ குற்றம் சுமத்தியுள்ளார். இந்தப் பின்னணியையும் இச்சந்தர்ப்பத்தில் ஆராய வேண்டியது அரசின் பொறுப்பாகும்.
vidivelli