( மினுவாங்கொடை நிருபர் )
‘கலாபூஷண அரச விருது வழங்கல் விழா – 2019’ இற்காக, முஸ்லிம் கலைஞர்களிடமிருந்தும் முஸ்லிம் சமய பண்பாட்டலுவல்கள் திணைக்களம் விண்ணப்பங்களைக் கோரியுள்ளது.
35 ஆவது முறையாக இடம்பெறும் இத்தேசிய அரச விழாவுக்கு, 60 வயதுக்கு மேற்பட்ட முஸ்லிம் கலைஞர்கள், இம்மாதம் 30 ஆம் திகதிக்கு முன்னர் விண்ணப்பிக்க வேண்டும் என,முஸ்லிம் சமய பண்பாட்டலுவல்கள் திணைக்களத்தின் பணிப்பாளர் அஷ்ஷெய்க் எம்.ஆர்.எம். மலிக் தெரிவித்துள்ளார்.
இதற்காக, முஸ்லிம் சமய பண்பாட்டலுவல்கள் திணைக்களத்தின் www.muslimaffairs.gov.lk என்ற இணையத்தளத்திலிருந்து விண்ணப்பங்களைப் பதிவிறக்கம் செய்துகொள்ள முடியும்.
குறித்த பிரதேசத்தில் தற்போது நிரந்தரமாக வசித்து வரும் மற்றும் 2019 டிசம்பர் மாதம் 15 ஆம் திகதியன்று 60 வயதைப் பூர்த்தி செய்துள்ள முஸ்லிம் கலைஞர்கள் இதற்கு விண்ணப்பிக்கத் தகுதியுடையவர்களாவர்.
மேற்படி கலாபூஷண அரச விருது, குறித்த துறையில் சிரேஷ்டத்துவ அடிப்படையில் தகுதி பெற்றவர்களுக்கு மாத்திரம் வழங்கப்படும். இதற்காக ஒரு பிரதேச செயலகத்திலிருந்து மூன்று பேரின் பெயர்கள் சிபாரிசு செய்யப்படும். அந்தந்த பிரதேச கலாசார அதிகார சபையின் சிபாரிசுடன், கலாசார உத்தியோகத்தர் அல்லது கலாசார அபிவிருத்தி உத்தியோகத்தர் அல்லது அபிவிருத்தி உத்தியோகத்தர் ஊடாக பிரதேச செயலாளரின் அனுமதியுடன் அனைத்து விண்ணப்பங்களும் சமர்ப்பிக்கப்படல் வேண்டும்.
நாட்டின் கலைத் துறைக்கு உன்னத பங்காற்றியவர்களைக் கௌரவிப்பதற்காக, இந்த கலாபூஷண அரச விருது வழங்கல் விழா, ஒவ்வொரு வருடமும் டிசம்பர் மாதம் 15 ஆம் திகதி ஜனாதிபதி தலைமையில் கொழும்பில் இடம்பெற்று வருகின்றது. குறித்த விருதுக்காகத் தெரிவு செய்யப்படும் கலைஞர்களுக்கு, விசேட அரச நினைவுச் சின்னம், பொற்கிழி மற்றும் சான்றிதழ்கள் என்பன வழங்கிக் கௌரவிக்கப்படுகின்றமை குறிப்பிடத்தக்கது.
-vidivelli