ஏ.ஆர்.ஏ.பரீல்
இவ்வருடம் 3,000 ஹஜ் விண்ணப்பதாரிகள் தங்களது ஹஜ் கடமையை முஸ்லிம் சமய பண்பாட்டலுவல்கள் திணைக்களத்தில் உறுதி செய்துள்ளனர். மேலும் 300 பேர் தங்களது கடமையினை உறுதிசெய்ய வேண்டியுள்ளது. ஹஜ் விண்ணப்பதாரிகள் தங்களது பயணத்தை உறுதிசெய்ய வேண்டிய இறுதித் தினம் 19 ஆம் திகதியாகும் என முஸ்லிம் சமய பண்பாட்டலுவல்கள் திணைக்களத்தின் பணிப்பாளர் எம்.ஆர். எம். மலிக் தெரிவித்தார்.
இவ்வருடத்துக்கான ஹஜ் ஏற்பாடுகள் தொடர்பில் கருத்து தெரிவிக்கையிலே அவர் இவ்வாறு கூறினார். அவர் தொடர்ந்தும் கருத்து தெரிவிக்கையில்; முஸ்லிம் சமய பண்பாட்டலுவல்கள் திணைக்களம் விண்ணப்ப இலக்கம் 13510 வரை ஹஜ் பயணத்தை உறுதி செய்யுமாறு விண்ணப்பதாரிகளுக்கு அறிவித்துள்ளது. எதிர்வரும் 19 ஆம் திகதி வெள்ளிக்கிழமைக்குள் 300 பேர் தங்கள் பயணத்தை உறுதி செய்யாதுவிடின் ஹஜ் பயணத்தை இவ்வருடம் மேற்கொள்வதற்காக மேன்முறையீடு செய்துள்ள தெரிவு செய்யப்படாதுள்ள பயணிகள் பயணத்தில் இணைத்துக் கொள்ளப்படவுள்ளார்கள்.
அறிவித்தல் அனுப்பப்பட்டுள்ள ஹஜ் பயணிகள் திணைக்களத்தினால் அங்கீகரிக்கப்பட்ட முகவர் நிலையமொன்றின் ஊடாக திணைக்களத்தில் தங்களது கடவுச்சீட்டினைச் சமர்ப்பித்து QR இலக்கத்தைப் பெற்றுக் கொள்ளுமாறு வேண்டப்படுகிறார்கள்.
அடுத்தவாரம் ஹஜ் ஏற்பாடுகளின் ஆரம்பகட்ட ஏற்பாடுகள் அனைத்தும் பூர்த்தி செய்யப்படும் என்றார்.
-vidivelli