சாய்ந்தமருது உள்ளூராட்சி மன்ற விவகாரம்: புத்தாண்டு விடுமுறைக்கு பின்பு கலந்துரையாடல்
இராஜாங்க அமைச்சர் ஹரீஸ்
சாய்ந்தமருதுக்கென தனியான உள்ளூராட்சி சபையொன்று நிறுவுவது தொடர்பில் மாகாண சபைகள் மற்றும் உள்ளூராட்சி அமைச்சர் வஜிர அபேவர்தனவின் தலைமையில் குழுவொன்று நியமிக்கப்பட்டுள்ளது. வரவு– செலவுத்திட்டம் மற்றும் புத்தாண்டு விடுமுறை காரணமாகவே குழு ஒன்று கூடி இது தொடர்பில் கலந்துரையாடவில்லை. புத்தாண்டு விடுமுறையின் பின்பு குழு ஒன்றுகூடி கலந்துரையாடவுள்ளது என மாகாண சபைகள் மற்றும் உள்ளூராட்சி இராஜாங்க அமைச்சர் எச்.எம்.எம்.ஹரீஸ் தெரிவித்தார்.
சாய்ந்தமருதுக்கென முன்வைக்கப்பட்டுள்ள தனியான உள்ளூராட்சி சபை கோரிக்கை தொடர்பான முன்னெடுப்புகள் தொடர்பில் கருத்து தெரிவிக்கையிலே அவர் இவ்வாறு கூறினார்.
“சாய்ந்தமருது விவகாரம் தொடர்பில் அனைத்து தரப்பினருடனும் கலந்துரையாடி தீர்மானமொன்றினை மேற்கொள்வதற்கு நியமிக்கப்பட்டுள்ள குழுவில் முஸ்லிம் அரசியல் கட்சிகளின் தலைவர்களும், அம்பாறை மாவட்ட பாராளுமன்ற உறுப்பினர்களும் அடங்கியிருக்கிறார்கள்.
அண்மையில் இடம்பெற்ற வரவு– செலவுத்திட்ட விவாதங்கள் காரணமாகவே தாமதங்கள் ஏற்பட்டன. தற்போது தமிழ், சிங்கள புத்தாண்டு விடுமுறைகள் ஆரம்பமாகியுள்ளன. அதனால் புத்தாண்டு விடுமுறையின் பின்பு குறிப்பிட்ட குழு ஒன்றுகூடி பேச்சுவார்த்தை நடாத்தவுள்ளது.
தாமதத்திற்கான காரணம் இதுவேயாகும். மாறாக இதுவேண்டுமென்றே கால தாமதப்படுத்தப்படவில்லை என்றார்.
-Vidivelli