தரம் ஐந்து புலமைப்பரிசில் பரீட்சை அனைத்து மாணவர்களுக்கும் கட்டாயமானதல்ல எனக் குறிப்பிட்டு நேற்றைய தினம் கல்வி அமைச்சினால் சுற்றுநிருபம் ஒன்று வெளியிடப்பட்டுள்ளது.
ஐந்தாம்தர புலமைப்பரிசில் பரீட்சை கட்டமைப்பை மறுசீரமைப்புச் செய்வதற்கான மீளாய்வினை மேற்கொள்வதற்கென நியமிக்கப்பட்ட குழுவின் பரிந்துரைகளின் பிரகாரமே கல்வி அமைச்சினால் இத்தீர்மானம் மேற்கொள்ளப்பட்டுள்ளதாக சுட்டிக்காட்டப்பட்டுள்ளது.
அந்த அறிக்கையில் மேலும் தெரிவிக்கப்பட்டுள்ளதாவது,
குறித்த விடயம் தொடர்பாக இதற்கு முன்னர் வெளியிடப்பட்ட கல்விச் செயலாளரினது 1995.06.09 ஆம் திகதிய 1995/16 ஆம் இலக்க சுற்றறிக்கை இரத்து செய்யப்படுவதோடு இதன் பின்னர் இச் சுற்றறிக்கையினது ஆலோசனைகளே அமுலில் இருக்கும்.
குறிப்பிட்ட வருமான எல்லைக்குட்பட்ட குறைந்த வருமானம் பெறும் குடும்பங்களின் கற்றலில் திறமைமிக்க மாணவர்களுக்கு புலமைப்பரிசில் வழங்குவதற்காகவும் பாடசாலைகளில் ஆறாம் ஆண்டுக்கு மாணவர்களைத் தெரிவு செய்வதற்காகவும் ஐந்தாம் ஆண்டு புலமைப்பரிசில் பரீட்சையானது ஒரு தெரிவுப் பரீட்சையாக வருடாந்தம் நடத்தப்படுகின்றது.
எனினும் தற்போது அப்பிரதான நோக்கங்களில் இருந்து விலகி மிகவும் போட்டிகரமான நிலை தோன்றியுள்ளதாகவும், பெரும்பாலான பாடசாலைகளில் ஐந்தாம் ஆண்டு புலமைப்பரிசில் பரீட்சைப் பெறுபேறுகளை அதிகரிக்கச் செய்வதற்காக மாணவர்களினது பல்தரப்பட்ட தன்மை மற்றும் அறிவுவிருத்தியினை கருத்தில்கொள்ளாது சகல மாணவர்களுக்கும் அதிக அழுத்தம் செலுத்தப்படுவ தாகவும் தெரியவந்துள்ளது.
எனவே, இதன் பின்னர் பாடசாலைகளில் ஐந்தாம் ஆண்டில் கல்வி கற்கின்ற புலமைப்பரிசிலிற்கு உரித்துடைய வருமான எல்லைக்கு உட்பட்ட, குறைந்த வருமானம் பெறும் குடும்பங்களைச் சேர்ந்த மாணவர்கள் தவிர்ந்த ஏனைய சகல மாணவர்களையும் இப் பரீட்சைக்கு தோற்றச்செய்வது கட்டாயமில்லை. இது தொடர்பில் மாணவர்கள் மீது எவ்விதத்திலும் அழுத்தம் செலுத்தப்படலாகாது என்பதனையும் கவனத்தில் கொள்ள விரும்புகின்றேன்.
அதேபோன்று 5 ஆம் தரத்துடன் நிறைவுபெறும் பாடசாலைகளில் கல்வி கற்கும் புலமைப்பரிசில் பரீட்சைக்குத் தோற்றாத மாணவர்களுக்கு 6 ஆம் தரத்திற்கு பாடசாலையினைப் பெற்றுக்கொடுப்பது வலயக் கல்விப் பணிப்பாளரின் பொறுப்பாகும்.
மேலும் மாணவர்களுக்கு தத்தமது விருப்பத்தின் பிரகாரம் புலமைப்பரிசில் பரீட்சைக்குத் தோற்றாதிருப்பதற்கு சந்தர்ப்பம் வழங்க முடிவதோடு, இது தொடர்பாக பெற்றோர்களுக்கு அறிவுறுத்தி பெற்றோரது ஒருமைப்பாடு தொடர்பான தகவல்கள் அடங்கிய ஆவணக்கோவை ஒன்றை பாடசாலையில் பேணுதல் வேண்டும்.
அவ்வாறே ஐந்தாம் ஆண்டு புலமைப்பரிசில் பரீட்சையின் பெறுபேற்றினை அடிப்படையாகக் கொண்டு போட்டித் தன்மையை அதிகரிக்கும் வகையில் சுவரொட்டிகள், பனர்கள் போன்ற பிரசார செயற்பாடுகளை மேற்கொள்ளக்கூடாது என்பதையும் மேலும் அறியத் தருகிறேன். மேலும் பாடசாலைகளில் ஆறாம் ஆண்டுக்கு மாணவர்களை அனுமதிக்கும்போதும் மாணவர்களை பாடசாலைக்கு அனுமதிப்பதற்கு உரிய சுற்றறிக்கை ஆலோசனைகளுக்கு ஏற்ப வசதிகள் சேவைகள் கட்டணம், பாடசாலை அபிவிருத்திச் சங்க கட்டணம் போன்ற அனுமதிக்கப்பட்ட கட்டணங்கள் தவிர்ந்த ஏனைய உதவிகளை பணமாகவோ அல்லது வேறு பொருட்களாகவோ அறவிடவோ அல்லது பெற்றுக்கொள்ளவோ முற்று முழுதாக தடைசெய்யப்பட்டுள்ளது என்றும் குறிப்பிடப்பட்டுள்ளது.
-Vidivelli