கொழும்பில் நேற்று முன்தினம் வபாத்தான பிரபல இஸ்லாமிய அறிஞர் இஸ்மாயில் ஹஸரத்தின் ஜனாஸா நல்லடக்கம் பெருந்திரளானோரின் பங்கேற்புடன் நேற்று மாலை அக்குறணையில் இடம்பெற்றது.
அக்குறணையைப் பிறப்பிடமாகக் கொண்ட இஸ்மாயில் ஹஸரத், தனது வாழ்வை மார்க்கக் கல்வி மற்றும் தஃவா பணிக்காக அர்ப்பணித்தவராவார்.
அக்குறணை ஜாமிஆ அர்ரஹ்மானிய்யா, மெல்சிரிபுர உஸ்வதுல் ஹஸனா, நாவலப்பிட்டிய தாருல் உலூம் அல் ஹாஷிமிய்யாஹ், அட்டுலுகமை ஜாமிஆ இன்ஆமில் ஹஸன், பாணந்துறை தீனிய்யஹ், குல்லியதுர் ரஷாத் அல் அரபிய்யஹ் (கொழும்பு மர்கஸ்), ஹட்டன் டிக் ஓயா உஸ்மானிய்யாஹ் ஆகிய அரபுக் கல்லூரிகளில் இவர் விரிவுரையாளராக கடமையாற்றியுள்ளார்.
உள்நாடுகளிலும் வெளிநாடுகளிலும் தப்லீக் பணியில் ஈடுபட்டுள்ள அன்னார், ஆங்கிலம், உருது, அரபு, தமிழ், பாரசீகம் ஆகிய மொழிகளில் தேர்ச்சி பெற்றவராவார்.
நேற்று முன்தினம் கொழும்பில் காலமான அன்னாரின் ஜனாஸா அவரது பிறப்பிடமான அக்குறணைக்கு நேற்றுக் காலை கொண்டுவரப்பட்டு அக்குறணை தெலும்புகஹவத்தையில் உள்ள அவரது தாயாரின் இல்லத்திலும் பின்னர் அக்குறணை அஸ்னா பள்ளிவாசலிலும் மக்கள் பார்வைக்காக வைக்கப்பட்டது.
அஸர் தொழுகையின் பின்னர் அஸ்னா பள்ளிவாசலில் ஜனாஸா தொழுகை நடாத்தப்பட்டு அக்குறணை பெரிய பள்ளிவாசல் மையவாடியில் நல்லடக்கம் செய்யப்பட்டது.
ஜனாஸா நல்லடக்கத்தில் நாட்டின் பல பாகங்களிலும் இருந்து வருகை தந்த உலமாக்கள், அரபுக் கல்லூரி மாணவர்கள், தப்லீக் ஜமாஅத் உறுப்பினர்கள், அரசியல் பிரமுகர்கள், பொது மக்கள் உட்பட பெருந்திரளானோர் கலந்து கொண்டனர்.