முஹம்மட் ரிபாக்
ஒடுக்கப்பட்ட சமூகம் என்றோ ஒருநாள் கிளர்ந்தெழும். இதுபோலத்தான், அன்று புத்தளத்தில் சீமெந்து தொழிற்சாலையை நிறுவினர். பின்னர் அனல் மின் நிலையத்தை ஸ்தாபித்தனர். இப்படி தாம் வாழும் சூழலுக்கு அச்சுறுத்தும் வகையிலான திட்டங்கள் புத்தளத்தில் முன்னெடுக்கப்பட்டதனால் அம்மக்கள் பெரிதும் பாதிக்கப்பட்டனர். புவி வெப்பமாதல், காற்று மாசடைதல், நச்சு வாயுக்கள், நிலத்தடி நீர் மாசடைவு, மழையின்மை இப்படி இயற்கை சூழலுக்கு பெரும் பாதிப்பு ஏற்பட்டது. புத்தெழில்மிக்க புத்தளம் மாசுற ஆரம்பிக்க மக்களும் தமக்கு இழைக்கப்பட்ட அநீதிகள் குறித்து விழிப்படைய ஆரம்பித்தனர். நிலைமை இப்படியிருக்க திண்மக்கழிவகற்றல் திட்டத்தை நடைமுறைப்படுத்த அரசாங்கம் புத்தளம் மாவட்டத்தை தெரிவு செய்தது. அத்துடன், அதற்காக அறுவாக்காடு எனும் இயற்கை வளம் நிறைந்த பகுதியில் காடழிப்பை செய்து திட்டத்தை முன்னெடுத்து இறுதிக் கட்டத்தை அடைந்திருக்கிறது. இப்படி புத்தளம் மக்கள் மீது அத்துமீறிய சுற்றாடலுக்கும் வாழ்வியலுக்கும் கேடுவிளைவிக்கும் திட்டங்களை திணிப்பதால் அந்த மக்கள் கிளர்ந்தெழ ஆரம்பித்தனர். நூற்றுக்கணக்கான நாட்கள் சத்தியாக்கிரகமிருந்த மக்கள் கடந்த 19 ஆம் திகதி கொழும்பில் பாரிய ஆர்ப்பாட்டமொன்றை நடத்தியிருந்தனர். அதற்கப்பால் புத்தளத்திற்கு சென்ற ஜனாதிபதிக்கும் தமது எதிர்ப்பை அமைதியான முறையில் தெரிவிக்க முயன்றனர்.
ஜனாதிபதியின் புத்தளம் விஜயம்
“நாட்டுக்காக ஒன்றிணைவோம்” புத்தளம் மாவட்டத்துக்கான செயற்றிட்டத்தின் நிறைவுவிழா கடந்த வெள்ளிக்கிழமை (22) புத்தளம் சேர்விஸ் வீதியில் உள்ள சக்தி விளையாட்டு மைதானத்தில் ஜனாதிபதி மைத்திரிபால சிறிசேன தலைமையில் இடம்பெற்றது.
இதன்போது, குறித்த கவனயீர்ப்பு போராட்டத்தில் ஈடுபட்ட பொதுமக்கள், ஜனாதிபதி கலந்துகொண்ட சக்தி விளையாட்டு மைதானத்திற்கு முன்பாக செல்ல முற்பட்டபோது ஆண்கள், பெண்கள் மீது பொலிஸார் தடியடிப் பிரயோகம் மேற்கொண்டனர்.
கொழும்பு குப்பைகளை புத்தளத்தில் கொட்டும் அரசாங்கத்தின் திட்டத்தை உடனடியாகக் கைவிட வேண்டுமெனக் கோரி புத்தளத்தில் மக்கள் நீண்ட காலமாக ஆர்ப்பாட்டங்களில் ஈடுபட்டு வருகின்றனர்.
இந்த விடயத்தில் ஜனாதிபதியை நேரில் சந்தித்து கலந்துரையாடுவதற்கு சர்வமத குழு மற்றும் க்ளீன் புத்தளம் அமைப்பினருக்கு சந்தர்ப்பம் தருமாறு தொடர்ச்சியாக வேண்டுகோள் விடுக்கப்பட்டிருந்தது.
எனினும், அந்தக் கோரிக்கை இதுவரை நிறைவேற்றப்படவில்லை என்பதை கண்டித்தும், புத்தளத்திற்கு விஜயம் செய்யும் ஜனாதிபதியை சந்திப்பதற்கு சர்வமத குழு உள்ளிட்டோருக்கு சந்தர்ப்பத்தை பெற்றுக் கொடுக்குமாறும் கோரியே இந்த கறுப்புக் கொடி கவனயீர்ப்பு போராட்டம் முன்னெடுக்கப்பட்டது.
இந்தக் கவனயீர்ப்பு ஆர்ப்பாட்டத்தில் மக்கள் பிரதிநிதிகள் மற்றும் ஆண்கள், பெண்கள், இளைஞர்கள் என பெரும் எண்ணிக்கையிலானோர் கலந்துகொண்டனர்.
புத்தளம் தபால் நிலையத்திலிருந்து பேரணியாக சென்று, புத்தளம் பொலிஸ் நிலையத்திற்கு அருகாமையில், காலை 8.30 மணிக்கு ஒன்று௯டிய மக்கள், குப்பைக்கு எதிரான பல வாசகங்கள் எழுதப்பட்ட சுலோகங்களை ஏந்தியவாறும், குப்பைக்கு எதிரான கோஷங்களை எழுப்பியவாறும் கவனயீர்ப்பில் ஈடுபட்டனர்.
இதன்போது, ஸ்மார்ட் ஸ்ரீலங்கா வேலைத்திட்டத்தை ஆரம்பித்து வைப்பதற்காக ஜனாதிபதி வருகை தரவிருந்த பிரதேச செயலகத்தை நோக்கி ஆர்ப்பாட்டக்காரர்கள் செல்ல முற்பட்டபோது, அதனை பொலிஸார் தடுத்து நிறுத்தினர்.
இதனால் ஆர்ப்பாட்டக்காரர்களுக்கும், பொலிஸாருக்கும் இடையில் வாக்குவாதம் ஏற்பட்டதுடன், அங்கு பதற்றநிலை காணப்பட்டது. விஷேட அதிரடிப்படை, கலகம் தடுக்கும் பொலிஸார், நீர்த் தாரை பீச்சும் கவச வாகனம் என்பன தயார் நிலையில் இருந்தன. அத்துடன், ஜனாதிபதி கலந்துகொள்ள இருந்த அனைத்துப் பிரதேசங்களிலும் பாதுகாப்பு பலப்படுத்தப்பட்டிருந்தது.
புத்தளம் பொலிஸார், இந்தப் போராட்டக்காரர்களைத் தடுத்து நிறுத்துவதற்காக, புத்தளம் நீதிமன்றத்தினால் பெற்றுக்கொண்ட தடையுத்தரவை பொலிஸார் ஆர்ப்பாட்டக்காரர்களிடம் வாசித்துக் காட்டினர். எனினும், குறித்த போராட்டம் அமைதியான முறையில் முன்னெடுக்கப்பட்டது.
இதேவேளை, ஆர்ப்பாட்டக்காரர்கள் புத்தளம் பிரதேச செயலகத்திற்கு செல்வதை பொலிஸார் தடுத்து நிறுத்தியபோது, ஆர்ப்பாட்டக்காரர்கள் அங்கிருந்து கலைந்து சென்று ஜனாதிபதி கலந்துகொண்ட பிரதான வைபவம் இடம்பெற்ற புத்தளம் சக்தி விளையாட்டு மைதானத்திற்கு செல்ல முற்பட்டபோதே அங்கு பொலிஸாருக்கும், பொதுமக்களுக்கும் இடையே அமைதியின்மை ஏற்பட்டது.
இதேவேளை, குப்பை பிரச்சினை தொடர்பில் சமயத் தலைவர்கள் உள்ளிட்ட ஐந்து பேரடங்கிய குழுவொன்றுக்கு சக்தி விளையாட்டு மைதானத்தில் வைத்து ஐந்து நிமிடங்கள் ஜனாதிபதியை சந்திப்பதற்காக அனுமதி பெற்றுத் தருவதாக ஜனாதிபதி செயலக அதிகாரியொருவர் வாக்குறுதியளித்து, அந்த ஐவரையும் சக்தி விளையாட்டு மைதானத்திற்கு அழைத்துச் சென்ற போதிலும், இறுதி நேரத்தில் அந்த சந்திப்பு இடம்பெறவில்லை.
தடியடிப் பிரயோகம்
ஜனாதிபதி கலந்து கொண்ட பிரதான வைபவம் இடம்பெற்ற சக்தி விளையாட்டு மைதானத்திற்கு செல்ல முற்பட்ட போராட்டத்தில் ஈடுபட்ட ஆண்கள், பெண்கள் மீது பொலிஸார் தடியடிப் பிரயோகம் மேற்கொண்டனர்.
ஜனாதிபதி கலந்துகொண்ட பிரதான நிகழ்வுக்கு மக்கள் கட்டுப்பாட்டை இழந்து, உள்செல்ல முற்பட்டதாலேயே இவ்வாறு தடியடிப் பிரயோகம் மேற்கொண்டு அவர்களை அங்கிருந்து விரட்டியடித்ததாக பொலிஸார் தெரிவித்தனர்.
இந்த தடியடிப் பிரயோகத்தினால் ஆண்கள், பெண்கள் காயமடைந்துள்ளனர் எனத் தெரிவிக்கப்படுகின்றது.
ஐவர் கைது
நீதிமன்றத்தின் உத்தரவை மீறிப் போராட்டத்தில் ஈடுபட்ட குற்றச்சாட்டின் பேரில் இரண்டு இளைஞர்கள் பொலிஸாரினால் கைது செய்யப்பட்டனர்.
இவ்வாறு கைது செய்யப்பட்ட இருவரும், சனிக்கிழமை (23) புத்தளம் மாவட்ட நீதிவான் முன்னிலையில் ஆஜர்படுத்தப்பட்ட போது பிணையில் விடுதலை செய்யப்பட்டனர்.
அத்துடன், கடந்த சனிக்கிழமை காலை குறித்த சம்பவம் தொடர்பில் விசாரணைக்காக அழைக்கப்பட்ட க்ளீன் புத்தளம் அமைப்பின் உறுப்பினர் ஒருவர் விசாரணையின் பின்னர் கைது செய்யப்பட்டதுடன், ஞாயிற்றுக்கிழமை இரண்டு இளைஞர்களும் கைது செய்யப்பட்டனர்.
இவ்வாறு கைது செய்யப்பட்ட சந்தேக நபர்கள் மூவரும் ஞாயிற்றுக்கிழமை (24) நீதிவான் முன்னிலையில் ஆஜர்படுத்தப்பட்ட பின்பு, பிணையில் விடுதலை செய்யப்பட்டனர்.
மேலும் 28 பேருக்கு எதிராக விசாரணை
ஜனாதிபதி மைத்திரிபால சிறிசேன புத்தளத்திற்கு வருகை தந்தபோது, கவனயீர்ப்பு போராட்டத்தில் கலந்துகொண்ட மேலும் 28 பேருக்கு எதிராக விசாரணை ஆரம்பிக்கப்பட்டுள்ளதாக பொலிஸார் தெரிவித்தனர்.
வீடியோ மற்றும் புகைப்படங்கள் மூலம் குறித்த 28 பேரும் இனங்காணப்பட்டுள்ளதாகவும் பொலிஸார் குறிப்பிட்டனர்.
இதேவேளை, பொலிஸாரினால் கைது செய்யப்பட்ட ஐவருக்கு எதிரான வழக்கு நேற்று வியாழக்கிழமை புத்தளம் மாவட்ட நீதிமன்றத்தில் விசாரணைக்கு எடுத்துக்கொள்ளப்பட்டது.
இந்த விசாரணையின் போது பெயர் குறிப்பிட்ட 28 பேருடைய பெயர்கள் பொலிஸாரால் நீதிவான் முன்னிலையில் சமர்ப்பிக்கப்பட்டன. அத்துடன், 28 பேரில் நேற்றைய தினம் 4 பேர் நீதிமன்றத்தில் ஆஜராகியிருந்தனர்.
இவ்வாறு ஆஜரான நான்கு பேருக்கும் நீதிவான் பிணையில் செல்ல அனுமதி வழங்கினார்.
இதேவேளை, புத்தளம் பொலிஸாரால் நீதிமன்றத்தில் சமர்ப்பிக்கப்பட்ட 28 பேரில் 24 பேரை அடுத்த மாதம் 25 ஆம் திகதி நீதிமன்றத்தில் ஆஜராகுமாறு அழைப்பாணை விடுக்கப்பட்டுள்ளதாக பொலிஸார் தெரிவித்தனர்.
கடும் கண்டனம்
புத்தளத்திற்கு விஜயம் செய்த ஜனாதிபதி, இந்தக் குப்பை விவகாரம் தொடர்பில் பேசாதது, சர்வமத குழு மற்றும் க்ளீன் புத்தளம் அமைப்பினரை சந்திப்பதற்கு அனுமதி வழங்காதமை, ஜனாதிபதியை சந்திப்பதற்காக போராட்டம் நடத்தியவர்கள் மீது பொலிஸார் தடியடிப் பிரயோகம் மேற்கொண்டமையை சமயத் தலைவர்களும், சமூக ஆர்வலர்களும் கண்டித்துள்ளனர்.
எதிர்கால சந்ததியினரை பாதுகாக்கும் இந்த சரித்திர முக்கியத்துவம் வாய்ந்த போராட்டத்தில் ஈடுபடுவோரை தடியடிப் பிரயோகம் மேற்கொண்டாலும், கைது செய்து சிறையில் அடைத்தாலும் இந்தப் போராட்டத்திலிருந்து மக்கள் பின்வாங்கப் போவதில்லை எனவும் புத்தளம் மக்களின் இந்தப் போராட்டத்திற்கு புத்தளம் மாவட்ட சர்வமத குழுவின் ஆதரவு எப்போதும் உண்டு என புத்தளம் மாவட்ட சர்வமத குழுவின் பொருளாளர் ஸ்ரீவஸ்ரீ வெங்கட சுந்தர ராம குருக்கள் தெரிவித்தார்.
கடந்த 200 நாட்களுக்கு மேல் இந்த மக்கள் புத்தளத்தில் குப்பைக்கு எதிரான போராட்டத்தில் ஈடுபட்டு வருகின்றனர். கடந்த 19 ஆம் திகதி கொழும்பு காலிமுகத் திடலிலும் கவனயீர்ப்பு போராட்டம் ஒன்றும் முன்னெடுக்கப்பட்டது. அப்போது, ஜனாதிபதி செயலகம் மற்றும் பிரதமர் அலுவலகம் என்பவற்றுக்கு சென்று அதிகாரிகளை சந்தித்து இந்த குப்பைத் திட்டம் தொடர்பில் ஜனாதிபதி மற்றும் பிரதமரை சர்வமதக்குழு நேரில் சந்திக்க வேண்டும் எனவும் அதற்கு ஏற்பாடு செய்து தருமாறும் கேட்டுக்கொண்டோம்.
விரைவில் அதற்கான சந்தர்ப்பங்களை பெற்றுத் தருவதாக ஜனாதிபதி மற்றும் பிரதமர் அலுவலக அதிகாரிகள் வாக்குறுதியளித்தனர்.
இந்த நிலையில், கடந்த வெள்ளிக்கிழமை சில நிகழ்வுகளில் கலந்துகொள்வதற்காக வருகைதந்த ஜனாதிபதியை பத்து நிமிடங்களேனும் சந்திப்பதற்கு சர்வமத குழு மற்றும் க்ளீன் புத்தளம் அமைப்பினருக்கு சந்தர்ப்பத்தை பெற்றுத் தருமாறும் சு.க. அமைப்பாளர்களான விக்டர் அன்டனி மற்றும் என்.டி.எம்.தாஹிர் ஆகியோரைக் கேட்டுக்கொண்டோம்.
ஜனாதிபதியுடன் சந்திப்பதற்கு சந்தர்ப்பம் பெற்றுத் தருவதாக வாக்குறுதி அளிக்கப்பட்டதே தவிர, உறுதியாக நேரம் பெற்றுத் தரவில்லை. இதனையடுத்து, புத்தளம் மக்கள் ஜனாதிபதியின் கவனத்தை ஈர்க்கும் நோக்கில் அமைதியான முறையில் கவனயீர்ப்பு போராட்டம் ஒன்றை நடத்துவதென தீர்மானித்து, மிகவும் அமைதியான முறையில்தான் போராட்டம் நடத்தினார்கள்.
மக்கள் தெரிவு செய்த ஜனாதிபதியை சந்திப்பதற்கும், பிரச்சினைகளை சொல்வதற்கும் அந்த மக்களுக்கு உரிமைகள் இருக்கின்றது. அதை யாராலும் தடுக்க முடியாது.
எனவே, இவ்வாறு போராட்டம் நடத்தியவர்கள் மீது பொலிஸார் நடந்துகொண்ட விதமும், இதுபற்றி ஜனாதிபதி கவனம் செலுத்தாமல் இருப்பதும் வேதனையை ஏற்படுத்துகிறது.
எனவே, அரசாங்கம் இன்னமும் கடும் போக்குடன் நடந்துகொள்ளாமல், வெளிநாட்டு ஆலோசனைகளைப் பெற்று, கொழும்பு குப்பைகளை வேறு பகுதிக்கு எடுத்துச் சென்று மீள்சுழற்சிக்கு உட்படுத்த நடவடிக்கைகள் எடுக்க வேண்டும்.
எனவே, அரசாங்கம் இன்னமும் கடும் போக்குடன் நடந்துகொள்ளாமல், வெளிநாட்டு ஆலோசனைகளைப் பெற்று, கொழும்பு குப்பைகளை வேறு பகுதிக்கு எடுத்துச் சென்று மீள்சுழற்சிக்கு உட்படுத்த நடவடிக்கைகள் எடுக்க வேண்டும்.
எந்தப் பாதிப்புக்களும் வராது என்று வாக்குறுதி வழங்கி அமைக்கப்பட்ட அனல் மின்சாரம், சீமெந்து தொழிற்சாலை என்பவற்றால் மக்கள். இன்றும் அவதிப்பட்டுக் கொண்டிருக்கிறார்கள் என்பதை மீண்டும் இந்த அரசாங்கத்திற்கு ஞாபகப்படுத்துகிறோம்.
இதேவேளை, குப்பை விவகாரம் தொடர்பில் புத்தளம் மக்கள் பொறுமையாக செயற்படுவதுடன், அதிகமாக துஆ பிரார்த்தனைகளில் ஈடுபடுமாறும் புத்தளம் பெரியபள்ளிவாசல் பொதுமக்களை கேட்டுள்ளது.
புத்தளம் பெரியபள்ளிவாசல் கண்டனம்
புத்தளம் நகருக்கு வருகைதந்த ஜனாதிபதியை சந்திப்பதற்கு அனுமதி வழங்க கோரி அமைதியான போராட்டத்தை நடத்திய மக்கள் மீது பொலிஸார் மேற்கொண்ட தாக்குதல் நடவடிக்கைகள் வேதனையை அளிக்கிறது.
இன, மத வேறுபாடுகளின்றி, தியாகங்களுக்கு மத்தியில் எதிர்கால சந்ததியினரை பாதுகாக்கும் இந்த சரித்திர முக்கியத்துவமிக்க போராட்டத்தில் ஈடுபட்டுள்ள பல்லாயிரக்கணக்கான புத்தளம் மக்களின் உணர்வுகளை அரசாங்கமும், அரசியல்வாதிகளும் கவனத்தில் எடுக்க வேண்டும் என்பதே சிவில் தலைமைகளின் எதிர்பார்ப்பாகும்.
அத்துடன், இத்தகைய அசம்பாவிதங்கள் மற்றும் சமூகத்தை அழிக்கக் கூடிய திட்டங்களிலிருந்து எமது ஊரையும், எமது சமூகத்தையும் பாதுகாக்க இறையச்சத்துடனும், உளத்தூய்மையுடனும் இறைவனிடம் துஆப் பிரார்த்தனைகளில் ஈடுபடுவோம்.
அத்தோடு, வெள்ளிக்கிழமை அசம்பாவிதங்களில் காயப்பட்ட, வேதனைப்பட்ட, சட்ட சிக்கல்களுக்கு உட்பட்டுள்ளவர்களுக்கு இறைவன் உடல், உள சுகத்தை தர நாம் அனைவரும் பிரார்த்திக்கிறோம்.
இதேவேளை, சமூகங்கள் மத்தியில் பிரச்சினைகளை உருவாக்க நினைக்கும் சில தீய சக்திகளின் முயற்சியில் மாட்டிக்கொள்ளாத வகையில் பொதுமக்கள் சமயோசிதமாக செயற்படுமாறும் கேட்டுக்கொள்கிறோம் எனக் குறிப்பிடப்பட்டுள்ளது.
பெண்கள் மீது தாக்குதல் பொலிஸாருக்கு எதிராக முறைப்பாடு
குறித்த சம்பவத்தின் போது பெண்கள் மீது தடியடிப் பிரயோகம் மேற்கொண்ட பொலிஸாருக்கு எதிராக முஸ்லிம் உரிமைகளுக்கான அமைப்பின் உறுப்பினர் மிப்ளால் பொலிஸ் ஆணைக்குழுவில் முறைப்பாடு செய்துள்ளார்.
புத்தளம் மக்கள், அபிவிருத்திக்கு எதிராகப் போராட்டம் நடத்தவில்லை. தமது எதிர்கால சந்ததியினரை பாதுகாக்கும் நோக்கிலேயே போராட்டத்தை நடத்தினார்கள். இவ்வாறு போராட்டம் நடத்திய மக்கள் மீது குறிப்பாக பெண்கள் என்று பார்க்காமல் தடியடிப் பிரயோகம் மேற்கொண்டமையை நாம் வன்மையாக கண்டிக்கிறோம்.
எனவேதான் பெண்கள் மீது தாக்குதல் நடத்திய பொலிஸாருக்கு எதிராக விசாரணையொன்றை ஆரம்பிக்குமாறு தேசிய பொலிஸ் ஆணைக்குழுவில் முறைப்பாடு செய்துள்ளோம் என்றார்.
பிரேரணை நிறைவேற்றம்
கொழும்பு குப்பைகளை கொட்டுவதற்கு அரசாங்கம் திட்டமிட்டுள்ளமைக்கு எதிராக வணாத்தவில்லு பிரதேச சபையில் பிரேரணை ஒன்று நிறைவேற்றப்பட்டுள்ளது.
வணாத்தவில்லு பிரதேச சபையின் தலைவர் சமந்த முனசிங்க தலைமையில், சபா மண்டபத்தில் நேற்று வியாழக்கிழமை காலை மாதாந்த அமர்வு இடம்பெற்றது.
இதன்போது, ஐக்கிய தேசியக் கட்சி உறுப்பினர் ஏ.எம்.எம்.அனஸ்தீன் குப்பை திட்டம் தொடர்பில் விஷேட பிரேரணை ஒன்றை சமர்ப்பித்தார். பின்பு குறித்த பிரேரணை தொடர்பில் விவாதம் நடத்தப்பட்டதுடன், இறுதியில் வாக்கெடுப்பும் இடம்பெற்றது.
இந்த வாக்கெடுப்பில் குப்பைத் திட்ட பிரேரணைக்கு ஆதரவாக வணாத்தவில்லு பிரதேச சபை தலைவர் சமந்த முனசிங் உள்ளிட்ட 14 பேர் வாக்களித்தனர். இதில் ஸ்ரீல.பொ.ஜ.பெரமுன உறுப்பினர்கள் 6 பேரும் , ஸ்ரீல.மு.கா உறுப்பினர்கள் இருவரும், சுயேட்சைக்குழு – 2 ஒருவரும், ஐ.தே.க உறுப்பினர்கள் நால்வரும், ஸ்ரீல.சு.க உறுப்பினர் ஒருவரும் இதற்கு எதிராக வாக்களித்தனர்.
அத்துடன், ஐக்கிய தேசியக் கட்சி உறுப்பினர் ஒருவரும், ஸ்ரீல.சு.கட்சி உறுப்பினர் ஒருவரும், சுயேட்சைக் குழு -1 உறுப்பினர்கள் இருவரும் இந்த வாக்களிப்பில் கலந்துகொள்ளாமல் நடுநிலைமை வகித்தனர்.
அரசியல்வாதிகள் என்ன செய்யப் போகிறார்கள்
இந்த குப்பை விவகாரம் தொடர்பில் திட்டத்தை செயற்படுத்தியே தீருவோம் என திட்டத்திற்கு பொறுப்பான அமைச்சர் சம்பிக்க ரணவக்கவும், எமது மையத்தின் மீது ஏறியே குப்பை வாகனங்களை அறுவாக்காட்டிற்கு கொண்டு செல்ல வேண்டும் எனவும் போராட்டக்காரர்களும் ௯றி வருகிறார்கள்.
மக்களின் கடும் எதிர்ப்புகளுக்கு மத்தியில் அரசாங்கம் இவ்வாறு திட்டத்தை நடைமுறைப்படுத்த எத்தனிக்க ௯டாது. இதற்கு முன்னரும் எவ்வித பாதிப்புக்களும் வராது என்று அமைக்கப்பட்ட நுரைச்சோலை அனல் மின்சாரம், சீமெந்து தொழிற்சாலை என்பவற்றால் இந்த மக்கள் இன்றுவரை அதனது பாதிப்புக்களை அனுபவித்துக் கொண்டிருக்கிறார்கள்.
இப்படியிருக்கையில், இந்த குப்பை விவகாரம் தொடர்பில் அரசாங்கம் என்ன வாக்குறுதிகளை வழங்கினாலும் அவற்றை நம்புவதற்கு இந்த மக்கள் தயாராக இல்லை என்பதையே ௯றி வருகிறார்கள். அத்துடன், இந்த விவகாரம் தொடர்பில் ஜனாதிபதி மற்றும் பிரதமர் ஆகியோரை சந்திப்பதற்கு சர்வமத குழு, க்ளீன் புத்தளம் ஆகியோருக்கு ஒருமுறை சந்தர்ப்பம் வழங்க வேண்டும் என்பதே மக்களுடைய கோரிக்கையாகும்.
இதற்காகவே, கடந்த வெள்ளிக்கிழமையும் போராட்டம் நடத்தினார்கள். இந்த மக்களின் போராட்ட உணர்வு ஜனாதிபதிக்கு விளங்கவில்லையா? இந்த மக்களை சந்திப்பதற்கு விருப்பமில்லையா அல்லது ஜனாதிபதியை சந்திப்பதற்கு அரசியல்வாதிகளுக்கு விருப்பமில்லையா என்பது எல்லோரினதும் கேள்வியாகவே உள்ளது.
எனவே, இந்த விடயம் தொடர்பில் முஸ்லிம் அரசியல்வாதிகள் கவனம் செலுத்த வேண்டும் என்பதே சமூக ஆர்வலர்களின் எதிர்பார்ப்பாக இருக்கிறது.
தேர்தல் காலங்களில் மாத்திரம் வாக்கு வேட்டைக்காக வலம் வரும் முஸ்லிம் அரசியல்வாதிகள் , இந்த குப்பை விடயத்தில் ஒரே அணியில் நின்று புத்தளம் மக்களின் நியாயமான கோரிக்கையை ஆட்சியாளர்களுக்கு தெளிவுபடுத்தி நியாயத்தைப் பெற்றுக்கொடுக்க வேண்டும் என்பதே மக்களின் எதிர்பார்ப்பாகும்.-Vidivelli