ஈராக்கில் கப்பல் கவிழ்ந்து விபத்துக்குள்ளானதில் 100 பேர் பலியானதாக அந்நாட்டு தகவல்கள் தெரிவிக்கின்றன. இவர்களில் பெரும்பாலானோர் குழந்தைகள் மற்றும் பெண்களாவர்.
இது குறித்து ஊடகங்கள் தரப்பில், ஈராக்கின் வடக்குப் பகுதியில் உள்ள மொசூல் நகரில் கடந்த வியாழக்கிழமை பிரபல சுற்றுலாப் பகுதியாகக் கருதப்படும் திக்ரீஸ் நதிக்கு அருகில் குர்திஷ் புத்தாண்டை சிறிய அளவிலான கப்பல் ஒன்றில் மக்கள் கொண்டாடினர்.
கொண்டாட்டத்தின் போது திடீரென விபத்து ஏற்பட்டதில் கப்பல் கவிழ்ந்தது. இதில் மூழ்கி 100 பேர் பலியாகிய போதிலும் 50 ற்கும் மேற்பட்டவர்கள் மீட்கப்பட்டனர். மீட்கப்பட்டவர்களில் பலர் வைத்தியசாலையில் அனுமதிக்கப்பட்டுள்ளனர்.
கப்பலின் கொள்ளளவை விட அதிகமான நபர்களை ஏற்றியதே விபத்துக்குக் காரணம் என்று செய்திகள் தெரிவிக்கின்றன.
இந்த விபத்தை நேரில் சென்று பார்வையிட்ட ஈராக் பிரதமர் அடெல் அப்தெல் மஹ்தி கூறும்போது, ”மூன்று நாட்கள் தேசம் முழுவதும் துக்க தினமாக அனுஷ்டிக்கப்படும்” என்றார்.
இந்த கப்பலில் 200 ற்கும் மேற்பட்டோர் இருந்துள்ளனர். அருகில் இருந்தவர்கள் மற்றும் மீட்பு படையினர் விரைந்து வந்து அவர்களை காப்பாற்றும் முயற்சியில் ஈடுபட்டனர்.
இதில் 94 பேர் சடலங்களாக மீட்கப்பட்டதுடன் மேலும் 55 பேர் உயிருடன் மீட்கப்பட்டனர். உயிரிழந்தவர்களுள் 19 பேர் குழந்தைகளாவர்.
-Vidivelli