ஜனாதிபதியின் புத்தளம் நகர விஜயத்தோடு இணைந்ததாக ஜனாதிபதியை சந்திக்க சந்தர்ப்பத்தை கோரி அமைதிப் போராட்டத்தை முன்னெடுத்த பொதுமக்கள்மீது பாதுகாப்புத் தரப்பினரால் மேற்கொள்ளப்பட்ட தாக்குதல் எமக்கு மிகவும் வேதனையைத் தருகின்றதென புத்தளம் முஹியத்தீன் ஜும்ஆ பெரிய பள்ளிவாசல் நிர்வாகம் விடுத்துள்ள அறிக்கையொன்றில் தெரிவிக்கப்பட்டுள்ளது. அதில் மேலும் தெரிவிக்கப்பட்டுள்ளதாவது,
இன, மத, பால் வேறுபாடின்றி பல தியாகங்களுக்கு மத்தியில் எதிர்கால சந்ததியை பாதுகாக்கும் போராட்டத்தில் இணைந்துள்ள பல்லாயிரக்கணக்கான புத்தளம் மக்களின் உணர்வுகளை அரசாங்கமும், அரசியல் பிரமுகர்களும், உயர் பீடங்களும் கவனத்திலெடுக்க வேண்டும் என்பதே புத்தளம் சிவில் தலைமைகளின் எதிர்பார்ப்பாகும்.
இத்தகைய அசம்பாவிதங்கள் மற்றும் சமூகத்தை அழிக்கக்கூடிய திட்டங்களிலிருந்து எமது ஊரையும் எமது சமூகத்தையும் பாதுகாக்க அல்லாஹ்விடம் உளத்தூய்மையோடும், இறையச்சத்துடனும் துஆக்களில் ஈடுபடுவோம். அசம்பாவிதங்களில் காயப்பட்ட, வேதனைப்பட்ட, சட்ட சிக்கல்ளுக்கு உட்பட்டுள்ளவர்களுக்கு அல்லாஹுதஆலா உடல் மற்றும் உள சுகத்தை தர நாம் அனைவரும் பிரார்த்திப்போம்.
சமூகங்களுக்கு மத்தியில் சிக்கல்களை உருவாக்க நினைக்கும் சில தீயசக்திகளின் முயற்சியில் சிக்கிக்கொள்ளாத வகையில் பொதுமக்கள் இந்நாட்களில் சமயோசிதமாக செயற்படுமாறு வினயமாக வேண்டிக்கொள்கிறோம் என தெரிவிக்கப்பட்டுள்ளது.
-Vidivelli