கடந்த வெள்ளிக்கிழமை நியூசிலாந்திலுள்ள இரண்டு பள்ளிவாசல்களில் நடைபெற்ற துப்பாக்கி தாக்குதலுக்கு பதிலடி வழங்கும் வகையில், பாகிஸ்தானில் இஸ்லாமியவாதிகள் தேவாலயம் ஒன்றைத் தீயிட்டு கொளுத்தியதாக சமூக ஊடகங்களில் வைரலாக செய்தி பரவி வருகிறது.
வெள்ளையின மேலாதிக்கவாத அவுஸ்திரேலியர் ஒருவர் இரண்டு பள்ளிகளில் தொழுகை மேற்கொண்ட 50 முஸ்லிம்களை துப்பாக்கியால் சுட்டு கொன்றதோடு, அந்த கொடூரத்தை சமூக ஊடகங்களில் நேரலையில் ஒளிபரப்பினார்.
இதற்குப் பதிலாக நடத்தப்பட்டதாக கூறி பகிரப்படும் தேவாலய எரிப்புக் காணொலியில் முக்கிய கட்டடத்தில் சிலர் ஏறுவது தெரிவதோடு, காணொலியின் முடிவில் கிறிஸ்தவ அடையாளப் பொருளொன்றை அவர்கள் உடைப்பதும் தெரிகிறது.
மக்கள் கத்துவதையும் இந்த காணொலியில் கேட்க முடிகிறது. இதன் ஒரு பகுதியில். இந்த தேவாலயத்தை சுற்றி புகையையும் காண முடிகிறது.
ஆனால், நியூசிலாந்து தாக்குதலுக்கு பதிலடி வழங்கும் வகையில், பாகிஸ்தானில் தேவாலயம் கொளுத்தப்பட்டதாக பரவி வரும் செய்தி பொய் என்பது செய்திகளில் இருந்து தெரிய வந்துள்ளது.
அதிகமானோர் கொல்லப்பட்ட இந்த தாக்குதலுக்கு பழிவாங்கப்பட்டதாக கூறி, அதற்கு சான்றாக 30 வினாடிகளே இருக்கும் இந்த ‘தேவாலய எரிப்பு’ காணொலி பகிரப்படுகிறது.
ஆனால், இந்த காணொலி பாகிஸ்தானை சேர்ந்ததல்ல. இது எகிப்தை சேர்ந்தது என்பது தெரிய வந்தது. இந்த காணொலி 2013 ஆம் ஆண்டில் எகிப்தில் உள்ள காப்டிக் தேவாலயங்களில் நடந்த தாக்குதலின் போது எடுக்கப்பட்டதாகும்.
எகிப்தில் கிறிஸ்தவர்களுக்கு எதிராக வன்முறை தோன்றிய போது, தீ வைத்து எரித்தோரால் எகிப்து முழுவதும் குறைந்தது 25 தேவாலயங்கள் தாக்கப்பட்ட போது 2013 ஆகஸ்ட் மாதம் இந்த காணொலி எடுக்கப்பட்டது.
-Vidivelli