மியன்மாரில் பிரச்சினை இடம்பெறும் மேற்கு ராக்கைன் மாநிலத்தில் கிளர்ச்சிக்காரர்கள் நள்ளிரவில் மேற்கொண்ட தாக்குதலில் ஒன்பது பொலிஸார் பலியானதாக மியன்மார் அதிகாரிகள் கடந்த ஞாயிற்றுக்கிழமை உறுதி செய்தனர்.
அரக்கான் இராணுவம் என அழைக்கப்படும் ராக்கைன் இனக் கிளர்ச்சிக் குழு கடந்த சனிக்கிழமை நள்ளிரவில் மாநிலத் தலைநகர் சிட்டிவிக்கு அருகிலுள்ள யொயேட்யோட்டே கிராமத்தில் அமைந்துள்ள பொலிஸ் நிலையத்தின் மீது தாக்குதல் நடத்தினர். குறித்த பிரதேசத்தில் பாதுகாப்புப் படையினர் மற்றும் அரசாங்க அதிகாரிகள் மீது பல்வேறு தாக்குதல்களை நடத்தியுள்ள இக் கிளர்ச்சிக் குழு இறுதியாக நடத்திய தாக்குதல் இதுவாகும்.
தாக்குதலின் போது பொலிஸ் நிலையத்திலிருந்த ஒன்பது பொலிஸாரும் கொல்லப்பட்டதாக ராக்கைன் மாநில பொலிஸ் படை பிரதித் தலைமை அதிகாரி மஉங் மஉங் சோ உறுதிப்படுத்தினார்.
சனிக்கிழமை இரவு சுமார் நூறு அரக்கான் இராணுவ கிளர்ச்சிக்காரர்கள் பொலிஸ் நிலையத்தை சுற்றி வளைத்ததோடு பொலிஸாரை சரணடையுமாறு பணித்தனர். அவ்வாறு சரணடைய அவர்கள் மறுத்ததையடுத்து மோதல் ஆரம்பித்தது.
துப்பாக்கிச் சூட்டுக்கு இலக்காகி ஒன்பது பொலிஸாரும் கொல்லப்பட்டனர் என அவர் தெரிவித்தார். ராக்கைன் மாநிலத்திலுள்ள பெரும்பான்மை பௌத்தர்களைப் பிதிநிதித்துவப்படுத்துவதாகத் தெரிவிக்கும் அரக்கான் இராணுவத்தின் தாக்குதல்கள் அம் மாநிலத்தில் குறிப்பாக வடக்குப் பகுதிகளில் கடந்த வருடம் மார்ச் மாதம் தொடக்கம் தீவிரமடைந்துள்ளன.
கடந்த ஜனவரி மாதம் மியன்மாரின் பங்களாதேஷுடனான எல்லைக்கு அருகில் அமைந்துள்ள நான்கு எல்லைக் காவல் நிலைய காவலரண்கள் மீது மேற்கொள்ளப்பட்ட தொடர் தாக்குதலின் போது குறைந்தது 13 பாதுகாப்புப் படையினர் அரக்கான் இராணுவத்தினால் கொல்லப்பட்டதைத் தொடர்ந்து ராக்கைன் மாநிலத்தில் இராணுவம் மேற்கொண்ட தீவிர நடவடிக்கையினையடுத்து பெரும்பாலும் ராக்கைன் பௌத்தர்களைக் கொண்ட சுமார் 10,000 பேர் தமது வீடுகளை விட்டு வெளியேறியுள்ளனர்.
-Vidivelli