அம்பாறையில் 2018 ஆம் ஆண்டு பெப்ரவரி மாதம் இடம் பெற்ற வன்செயல்களினால் தாக்கி சேதமாக்கப்பட்ட அம்பாறை ஜும்ஆ பள்ளி வாசலை எதிர்காலத்தில் பாதுகாப்பதற்காகவே 2018 ஆம் ஆண்டு புதிய நிர்வாக சபையொன்று வக்பு சபையினால் நியமிக்கப்பட்டது. புதிய நிர்வாக சபையில் அம்பாறை நகரில் வாழும் முஸ்லிம்களும் அரச நிறுவனங்களில் பணியாற்றும் முஸ்லிம்களும் உள்வாங்கப் பட்டனர். முன்னைய நிர்வாக சபையில் இவ்வாறானவர்கள் உள்வாங்கப்பட்டிருக்க வில்லை. என வக்பு சபையின் தலைவர் சட்டத்தரணி எஸ்.எம்.எம்.யாசீன் தெரிவித்தார்.
அம்பாறை ஜும்ஆ பள்ளிவாசல் தாக்கப்பட்டு சில மாதங்களுக்குள் புதிய நிர்வாக சபை நியமிக்கப்பட்டமை தொடர்பில் பழைய நிர்வாக சபை விமர்சனங்களை வெளியிட்டுள்ளமை பற்றி வினவியபோதே வக்பு சபையின் தலைவர் இவ்வாறு கூறினார். அவர் தொடர்ந்தும் கருத்துத் தெரிவிக்கையில் பழைய நிர்வாக சபைக்கு எதிரான முறைப்பாடுகளும் தெரிவிக்கப்பட்டிருந்தன. பள்ளி வாசலுக்கு அருகில் வாழும் முஸ்லிம்களை நிர்வாகத்தில் உள்வாங்கினால் எதிர்காலத்தில் இவ்வாறான தாக்குதலிலிருந்து பள்ளிவாசலைப்பாதுகாக்கலாம் எனக்கருதியே புதிய நிர்வாக சபை நியமிக்கப்பட்டது.
புதிய நிர்வாக சபைக்கு எதிராக பழைய நிர்வாக சபை வக்பு ட்ரிபியுனலில் மேன்முறையீடு செய்ததனாலே வக்பு ட்ரிபியுனல் பள்ளிவாசலுக்கு ஐவர் கொண்ட கமிட்டியை நியமித்தது.
வக்பு சபை தனிநபர்களின் நலன்களைக் கருதுவதில்லை. பள்ளிவாசலின் எதிர்காலம் கருதியே தனது நடவடிக்கைகளை முன்னெடுக்கும் என்றார்..