ஜே.வி.பி.யின் தனிப்பட்ட விருப்புக்களை நிறைவேற்றிக் கொள்வதற்காக கொண்டுவரப்படும் 20 ஆவது அரசியலமைப்பு திருத்தத்திற்கு நாம் ஒருபோதும் ஆதரவளிக்கப் போவதில்லை எனத் தெரிவித்த பாராளுமன்ற உறுப்பினர் நாமல் ராஜபக் ஷ, ஜனாதிபதி மைத்திரிபால சிறிசேன, எதிர்க்கட்சித் தலைவர் மஹிந்த ராஜபக் ஷ மற்றும் பிரதமர் ரணில் விக்கிரமசிங்க ஆகியோருடன் ஏனைய கட்சிகளின் தலைவர்கள் அனைவரும் ஒன்றிணைந்து 20 ஆவது திருத்தம் கொண்டு வரப்பட்டால், அதற்கு ஆதரவளிக்க நாம் தயாரெனவும் தெரிவித்தார்.
கொழும்பில் இடம்பெற்ற நிகழ்வொன்றின் பின்னர் ஊடகங்களுக்கு கருத்து தெரிவிக்கும்போதே அவர் இதனைத் தெரிவித்தார்.
தொடர்ந்தும் அவர் தெரிவிக்கையில்,
ஜனாதிபதி மைத்திரிபால சிறிசேன மற்றும் எதிர்க்கட்சித் தலைவர் மஹிந்த ராஜபக் ஷ ஆகியோருக்கிடையில் இடம்பெற்ற சந்திப்பின்போது, நிறைவேற்றதிகார ஜனாதிபதி முறைமையை நீக்குவதில் தனக்கு தனிப்பட்ட ரீதியிலும் எந்த பிரச்சினையும் இல்லை என எதிர்க்கட்சித் தலைவர் மஹிந்தராஜபக் ஷ தெரிவித்துள்ளார்.
எனினும், 19 ஆவது அரசியலமைப்பு சீர்திருத்தத்துடன், நிறைவேற்றதிகார ஜனாதிபதி முறைமையும் சிதைவடைந்துள்ளது என்றால், நிறைவேற்றதிகார ஜனாதிபதி முறைமையால் எந்தவிதமான பயனும் இல்லை என்பதே அதற்கான காரணமாகும். அத்தோடு மக்கள் விடுதலை முன்னணியின் கட்சி விருப்புக்களையும், தனிப்பட்ட விருப்புக்களையும் நிறைவேற்றிக் கொள்வதற்கான 20 ஆவது அரசியலமைப்பு சீர்திருத்தத்திற்கு நாம் ஒருபோதும் ஆதரவளிக்கப் போவதில்லை. ஆனால், ஜனாதிபதி மைத்திரிபால சிறிசேன, எதிர்க்கட்சித் தலைவர் மஹிந்த ராஜபக் ஷ மற்றும் பிரதமர் ரணில் விக்கிரமசிங்க ஆகியோருடன் ஏனைய கட்சிகளின் தலைவர்கள் அனைவரும் ஒன்றிணைந்து 20 ஆவது திருத்தம் கொண்டுவரப்பட்டால், அதற்கு ஆதரவளிக்க நாம் தயார் என்றார்.
-Vidivelli