அதிகாரத்தை பகிர்ந்து தீர்வுகளை நோக்கிப் பயணிக்க ஏதேனும் திருத்தங்கள் கொண்டுவந்தால் அதற்கு நாம் முழுமையான ஆதரவை வழங்குவோம். ஆனால் நிறைவேற்று ஜனாதிபதி முறைமையை நீக்குவதற்கு இது சரியான தருணமல்லவென அமைச்சர் ரவூப் ஹக்கீம் தெரிவித்தார்.
நிறைவேற்று ஜனாதிபதி முறைமையை நீக்கும் 20 ஆவது திருத்த சட்டம் குறித்து கருத்து தெரிவிக்கும்போதே அவர் இதனைக் குறிப்பிட்டார். இது குறித்து அவர் மேலும் கூறுகையில்,
நிறைவேற்று அதிகாரத்தை நீக்கும் சரியான தருணம் இதுவல்ல, இப்போது ஜனாதிபதி தேர்தல் ஒன்றுக்கான காலகட்டம் நிலவி வருகின்ற நிலையில் நிறைவேற்று ஜனாதிபதி முறைமையை நீக்குவது என்பது சரியானதல்ல. ஜனாதிபதி தேர்தலில் வெற்றி பெறவேண்டும் என்ற நோக்கில் சிலர் இதனை கையில் எடுக்கப் பார்க்கின்றனர். அதிகாரப் பரவலாக்கல் குறித்து ஏதேனும் திருத்தங்கள் கொண்டுவந்து அரசியல் முரண்பாடுகளுக்கு தீர்வை எட்ட நினைத்தால் அதற்கு நாம் ஒத்துழைப்பு வழங்கத் தயாராக உள்ளோம். ஆனால் இப்போது நிறைவேற்று ஜனாதிபதி முறைமையை கையிலெடுக்க வேண்டாம். இது ஒருசிலரது தனிப்பட்ட தேவைக்காக மட்டுமே கையாளப்படுகின்றது. ஆகவே அதற்கு ஆதரவு வழங்கப் போவதில்லை.
மேலும், ஜனாதிபதி அண்மையில் செய்த ஆட்சிக் கவிழ்ப்பினால் இரண்டு மாதங்கள் எல்லா வேலைத்திட்டங்களும் தடைப்பட்டிருந்தன. ஜனாதிபதியும் பிரதமரும் இரு துருவங்களாக இருந்தாலும், இன்று அவர்களின் புகைப்படங்கள் எல்லா இடங்களிலும் ஒன்றாக உள்ளன. இந்நிலையில் இந்த வருடத்துக்குள் தேர்தல் வரவுள்ளது. அதில் எந்தக் கட்சி வெற்றிபெறும் என்று எல்லோரும் ஆவலுடன் காத்திருக்கின்றனர். ஜனாதிபதி வேட்பாளர் தெரிவிலும் என்ன நடக்கப்போகிறது என்று தெரியாமல் உள்ளது. சமூகத்துக்கு நன்மையான வேட்பாளரை நாங்கள் ஆதரிப்போம். இந்நிலையில் மாகாண சபை மற்றும் பாராளுமன்றத் தேர்தல்களில் எங்களது உறுப்பினர்களை சரியாகத் தெரிவுசெய்ய வேண்டும். தேர்தல் முறையிலுள்ள வாய்ப்புக்களை நாங்கள் பயன்படுத்திக்கொள்ள வேண்டும் எனவும் அவர் குறிப்பிட்டார்.
-Vidivelli