ஈராக்கின் மேற்கு நகரான பலூஜாவில் கடந்த செவ்வாய்க் கிழமையன்று இடம்பெற்ற வீதியோர குண்டு வெடிப்பில் மூன்று ஈராக்கியப் பணியாளர்கள் கொல்லப்பட்டதாக உள்ளூர் பொலிஸ் அதிகாரியொருவர் தெரிவித்தார்.
பலூஜாவுக்கு மேற்கே நைமியா மாவட்டத்தில் பணியாளர்களை ஏற்றிக்கொண்டு வாகனமொன்று வந்து கொண்டிருந்த போது இக்குண்டு வெடித்துள்ளது. இதன்போது மூன்று பணியாளர்கள் கொல்லப்பட்டதோடு மேலும் மூவர் காயமடைந்தனர் என பொலிஸ் தலைமையதிகாரி அஹ்மட் அல்-துலைமி தெரிவித்தார்.
ஐ.எஸ். கிளர்ச்சி அமைப்பினர் இங்கு செயற்பட்டு வருகின்றனர். அவர்கள் அவ்வப்போது பொதுமக்கள் மீதும் பாதுகாப்புப் படையினர் மீதும் தாக்குதல்களை நடத்தி வருகின்றனர் எனவும் அல்-துலைமி தெரிவித்தார்.
ஐ.எஸ். அமைப்பின் இறுதியான பெரிய கட்டுப்பாட்டுப் பிரதேசமாக இருந்த மௌசூல் வீழ்ச்சியடைந்ததோடு மூன்று வருட யுத்தம் முடிவுக்கு வந்ததையடுத்து பயங்கரவாத ஐ.எஸ். அமைப்பு தோற்கடிக்கப்பட்டதாக 2017 ஆம் அண்டின் பிற்பகுதியில் பக்தாத் பிரகடனம் செய்தது.
எனினும், ஈராக்கிய இராணுவத்தினர் ஐ.எஸ். அமைப்பின் எஞ்சிய பிரிவினரை இலக்கு வைத்து தாக்குதல்களை தொடர்ந்து நடத்தி வரும் அதேவேளை நாட்டின் சில பகுதிகளில் ஐ.எஸ். அமைப்பினர் வீரியததோடு காணப்படுவதாக சில அதிகாரிகள் தெரிவிக்கின்றனர்.
-Vidivelli