இம்மாத ஆரம்பத்தில் எகிப்தில் 15 பேருக்கு மரண தண்டனை நிறைவேற்றப்பட்டமை தொடர்பில் ஐக்கிய நாடுகள் சபையின் மனித உரிமைகள் பிரிவு கடந்த வெள்ளிக்கிழமை கவலை வெளியிட்டது.
சித்திரவதைகள் தொடர்பில் முன்வைக்கப்படுகின்ற குற்றச்சாட்டுக்கள் சம்பந்தமாக எகிப்திய அதிகாரிகள் உரிய நடவடிக்கை எடுக்க வேண்டுமெனத் தெரிவித்த ஐக்கிய நாடுகள் சபையின் மனித உரிமைகள் அலுவலகத்தின் பேச்சாளர் ரோபேட் கொல்விலி, அனைத்து மரண தண்டனைகளையும் உடனடியாக நிறுத்துமாறு நாம் எகிப்திய அதிகாரிகளைக் கோருகின்றோம் எனவும் தெரிவித்துள்ளார்.
எகிப்திய சட்டமா அதிபரான ஹிசாம் பரகத் கொல்லப்பட்டமையுடன் தொடர்புபட்ட ஒன்பது பேருக்கு கடந்த பெப்ரவரி 20 ஆம் திகதி மரண தண்டனை நிறைவேற்றப்பட்டது.
ஒரு வாரம் முன்னதாக பொலிஸ் உத்தியோகத்தர் ஒருவரைக் கொன்ற குற்றச்சாட்டில் மேலும் மூவருக்கு கடந்த பெப்ரவரி 7 ஆம் திகதி மரண தண்டனை நிறைவேற்றப்பட்டது. மேலும் மூவருக்கு நீதிபதியொருவரின் மகனைக் கொன்றமைக்காக தூக்குத் தண்டனை நிறைவேற்றப்பட்டது.
அனைவரும் தாம் குற்றத்தை ஒப்புக்கொள்ளச் செய்வதற்காக சித்திரவதை செய்யப்பட்டதாக நீதிமன்றத்தில் தெரிவித்திருந்தனர்.
வழக்கு விசாரணைகளின் போது மேற்கொள்ளப்படும் முரண்பாட்டு செயற்பாடுகள் தொடர்பில் ஐக்கிய நாடுகள் சபை மிகக் கவலை கொண்டுள்ளதாகவும் சித்திரவதை தொடர்பான குற்றச்சாட்டுக்களை உரிய முறையில் எகிப்து விசாரிக்க வேண்டும் எனவும் தாம் கோருவதாகவும் கொல்விலி தெரிவித்தார்.
சில நாடுகள் தொடர்ந்தும் மரண தண்டனையை நிறைவேற்றி வருகின்றன. மரண தண்டனைக்கான விசாரணை என்பது அதியுச்ச நடுநிலைத் தராதரத்தைக் கொண்டவையாக இருக்க வேண்டியது அவசியமாகும் எனவும் அவர் தெரிவித்தார்.
-Vidivelli