திருகோணமலை ஷண்முகா இந்துக்கல்லூரியில் முஸ்லிம் ஆசிரியைகளுக்கு விதிக்கப்பட்டிருந்த அபாயா அணிந்து கடமையில் ஈடுபடுவதற்கான தடை மனித உரிமை ஆணைக்குழுவினால் நிராகரிக்கப்பட்டுள்ளது.
திருகோணமலை ஷண்முகா இந்துக் கல்லூரியில் முஸ்லிம் ஆசிரியைகள் அபாயா அணிந்து கடமையாற்றுவது அவர்களது அடிப்படை உரிமை என்றும் அதற்குத் தடை விதித்ததன் மூலம் பாடசாலையின் அதிபர், குறித்த ஆசிரியைகளின் அரசியலமைப்பில் உறுதிப்படுத்தப்பட்டுள்ள அடிப்படை உரிமையை மீறியுள்ளதாகவும் இலங்கை மனித உரிமைகள் ஆணைக்குழு சுட்டிக்காட்டியுள்ளது. அத்துடன் இவ் ஆசிரியைகள் அபாயா அணிந்து மீண்டும் அதே பாடசாலையில் கற்பிப்பதற்கு அனுமதிக்கப்பட வேண்டும் என்றும் ஆணைக்குழு பரிந்துரைத்துள்ளது. மேலும் முறையான இடமாற்ற ஒழுங்குகளைப் பின்பற்றாமல் குறித்த ஆசிரியைகளை இடமாற்றியதன் மூலம் அவர்களது அடிப்படை உரிமைகள் மீறப்பட்டுள்ளதாகவும் ஆணைக்குழு தெரிவித்துள்ளது.
18.02.2019 திகதியிடப்பட்டு, மனித உரிமை ஆணையாளர்கள் இருவரினால் கையெழுத்திடப்பட்டு வெளியிடப்பட்டுள்ள 9 பக்கங்கள் கொண்ட குறித்த அறிக்கையில் மேலும் குறிப்பிடப்பட்டுள்ளதாவது,
மனித உரிமை ஆணைக்குழுவின் கண்டறிதல்கள்
- 1923 ஆம் ஆண்டு தங்கம்மா ஷண்முகப்பிள்ளை என்ற பெண்மணியால் உருவாக்கப்பட்ட ஷண்முகா இந்து மகளிர் கல்லூரி 1961ஆம் ஆண்டு இலங்கை அரசாங்கத்தால் உள்வாங்கப்பட்டது. அன்று முதல் இன்று வரை அக்கல்லூரியில் கற்பிக்கும் ஆசிரியைகள் இந்துக்களின் கலாசார ஆடையான சேலையை அணிந்து கொண்டு வர வேண்டும் என்ற எழுதப்படாத விதியிருப்பதாக அதிபர் குறிப்பிடுகிறார். பாடசாலையின் வரலாறு எப்படி இருப்பினும் இது ஒரு தேசிய பாடசாலையாக இருப்பதாலும், நிர்வாக நிதியை அரசாங்கத்திடமிருந்து பெறுவதனாலும் இக்கல்லூரி தேசிய சட்ட வரையறைகள், ஒழுங்குகளுக்கும் முக்கியமாக அரசியல் யாப்பிற்கும் உட்பட்டதாகும்.
- அரசியல் யாப்பு உறுப்புரை 12(2) ஒரு பிரஜை சமயத்தின் பெயரால் துஷ்பிரயோகப்படுத்தப்படக் கூடாது என்றும் உறுப்புரை 10 ஒருவர் தாம் விரும்பிய மதத்தைத் தெரிவு செய்யும் உரிமையையும், உறுப்புரை 14(1) (ஈ) ஒவ்வொரு பிரஜைக்கும் தனியாகவும், கூட்டாகவும், தனிமையிலும் பொது இடத்திலும் அவருடைய மதத்தை பின்பற்றுவதற்கும், பிரசாரம் செய்வதற்குமான உரிமைகளை வழங்கியிருக்கிறது.
- ஆசிரியைகள் முன்னர் சேலைதான் அணிந்து வந்தார்கள் என்ற வாதம் ஏற்றுக் கொள்ளமுடியாது. ஏனெனில் அரசியல் யாப்பின் உறுப்புரை 10 ஒரு மதத்தைப் பின்பற்றுவதற்கு ஒரு பிரஜைக்கு இருக்கும் சுதந்திரத்தில் கால எல்லையை நிர்ணயிக்கவில்லை. அதனால் அவ்வாசிரியைகள் முன்னர் சேலை அணிந்து கொண்டு வந்தார்கள் என்று கூறுவது அவர்கள் இப்பொழுது அபாயா அணிந்து கொண்டு வர விரும்புவதைத் தடுக்காது.
- ஆசிரியைகள் அபாயா அணிந்து கொண்டு வருவது அவர்களை ஏனையை ஆசிரியைகளில் இருந்து பிரித்துக் காட்டும் மற்றும் மாணவர்கள் அச்சமடைகிறார்கள் போன்ற வாதங்கள் இனப்பல்வகைமை கொண்ட சமூகத்திற்குப் பொருத்தமானவை அல்ல.
- உச்ச நீதிமன்றத்தின் தீர்ப்பு 688/12 ஐத் தொடர்ந்து கல்வி அமைச்சினால் வெளியிடப்பட்ட சுற்று நிருப இலக்கம் 37/95ன் அடிப்படையிலும், மற்றும் உச்ச நீதிமன்றத்தின் FR 97/14 வழக்கின் தீர்ப்பின் அடிப்படையிலும் முஸ்லிம்களின் கலாசார ஆடை என்பது இலங்கையின் கலாசாரத்திற்குள் உட்பட்டது என்பதோடு அவ்வாறான ஆடைகளை அணியும் உரிமை முஸ்லிம்களுக்கு இருக்கிறது.
- ஆசிரியைகள் 01.01.2019 ஆம் திகதி மீண்டும் ஷண்முகா கல்லூரிக்குள் உள்வாங்கப்பட்ட பின்னரும் அவர்களுக்கு கற்பிப்பதற்காக நேரசூசிகள் வழங்கப்படவில்லை என்பதோடு விஷேட தேவை கொண்ட மாணவர்களுக்காகப் பயிற்சி பெற்ற ஆசிரியை ஒருவர் பாதிக்கப்பட்ட ஆசிரியைகளில் ஒருவராக இருப்பதனால் விஷேட தேவைகள் கொண்ட மாணவர்களின் கல்வி கற்பதற்கான உரிமை மீறப்பட்டுள்ளது.
- ஆசிரியைகள் இடமாற்றப்பட்டமை ‘தேசிய இடமாற்றக் கொள்கைகள்’ இலக்கம் 2007/20க்கு முற்றிலும் முரணானது. அவ்வாசிரியைகள் தான் தோன்றித்தனமாகவும் வலுக்கட்டாயமாகவும் பிரதிவாதிகளால் இடமாற்றம் செய்யப்பட்டுள்ளனர்.
- அரசியல் யாப்பின் சரத்து 10 மற்றும் 14 (ஈ) அத்தோடு முஸ்லிம் பெண்களின் ஆடை சம்பந்தமான கல்வி அமைச்சின் சுற்று நிருபம் 37/95க்கு முரணாக திருகோணமலை ஷண்முகா இந்துக் கல்லூரியும் அதன் நிர்வாகமும் ஒரு குறிப்பிட்ட வகையான ஆடையை அணிந்து வரக் கூடாது என்றும் ஒரு குறிப்பிட்ட வகையான ஆடையைத்தான் அணிந்து கொண்டு வர வேண்டும் என்றும் பணிக்க முடியாது.
- ஆசிரியைகளின் வலுக்கட்டாயமான இடமாற்றமும், அவர்களின் கலாசார ஆடைகளை அணிந்து வருவதற்கான தடையும் அரசியல் யாப்பில் சரத்துக்கள் 12(1),12(2) என்பவற்றில் உறுதி செய்யப்பட்ட அடிப்படை உரிமைகளை மீறுகின்றன.
பரிந்துரைகள்
- இலங்கையின் அரசியல் யாப்பில் உறுதி செய்யப்பட்டுள்ள உறுப்புரைகள் 10,12(1),12(2),14(ஈ)ன் பிரகாரம் ஆசிரியைகளின் அடிப்படை உரிமைகளை முதலாவது பிரதிவாதியாகிய ஷண்முகா இந்துக் கல்லூரியின் அதிபர் மீறியிருக்கிறார். ஆசிரியைகள் அவர்களின் கலாசார ஆடையான அபாயாவை அணிந்து கொண்டு மீண்டும் ஷண்முகா இந்துக் கல்லூரிக்குள் உள்வாங்கப்பட வேண்டும் என ஆணையகம் பரிந்துரைக்கிறது.
- மூன்றாம் மற்றும் நான்காம் பிரதிவாதிகளான மாகாணக் கல்விப் பணிப்பாளரும், கல்வி அமைச்சின் செயலாளரும் முறையான இடமாற்ற ஒழுங்குகளைப் பின்பற்றாமல் ஆசிரியைகளை இடமாற்றியதன் மூலம் அரசியல் யாப்பின் உறுப்புரைகள் 12 (1),(2) இல் கூறப்பட்டுள்ள ஆசிரியைகளின் அடிப்படை உரிமைகளை மீறியுள்ளனர்.
3.மேற்பார்வையாளர்கள் என்ற தகுதியில் இருக்கும் வலயக் கல்விப் பணிப் பாளர், மாகாணக் கல்விப் பணிப்பாளர், கல்வி அமைச்சின் செயலாளர் ஆகியோர் முறைப்பாட்டாளர்களின் முறைப்பாட்டுக்கான தீர்வுகளைக் கொடுக்காமல் அரசியல் யாப்பின் உறுப்புரைகள் 10, 14(ஈ) என்பவற்றில் கூறப்பட்டுள்ள ஆசிரியைகளின் அடிப்படை உரிமைகளை மீறியுள்ளனர்.
- பாதிக்கப்பட்ட ஆசிரியைகள் தங்களது கலாசார ஆடையான அபாயாவை அணிந்து கொண்டு எந்தவிதமான தடையோ துஷ்பிரயோகமோ இன்றி ஷண்முகா இந்துக் கல்லூரிக்கு செல்வதை வலயக் கல்விப் பணிப்பாளர், மாகாணக் கல்விப் பணிப்பாளர், கல்வி அமைச்சின் செயலாளர் ஆகியோர் உறுதி செய்ய வேண்டும்.
05.வலயக் கல்விப் பணிப்பாளர் சமுகப் பல்வகைமை தொடர்பாக பாடசாலை அதிபர்கள்,ஆசிரியர்கள்,மாணவர்கள், பெற்றோர் ஆகியோருக்கு விழிப்புணர்வு நிகழ்ச்சிகளை நடாத்த வேண்டும் என்றும் அறிக்கையில் மேலும் குறிப்பிடப்பட்டுள்ளது.
இந்த விவகாரத்தில் பாதிக்கப்பட்ட ஆசிரியைகளுக்கான சட்ட உதவிகள் மற்றும் ஆலோசனைகளை ‘குரல்கள் இயக்கம்’ வழங்கியிருந்தது.
திருகோணமலை ஷண்முகா இந்துக்கல்லூரியில் கடமையாற்றிய 4 முஸ்லிம் ஆசிரியைகள் அபாயா அணிந்து பாடசாலைக்குச் சென்றபோது அதிபர் அபாயா அணிந்து கற்பித்தல் நடவடிக்கையில் ஈடுபடத் தடைவிதித்தார். பாடசாலையில் அபாயாவுக்கு நிலவிய எதிர்ப்பினையடுத்து கல்வியமைச்சு அவர்களுக்கு தற்காலிக இடமாற்றத்தினை வழங்கியது. கடந்த வருடம் ஏப்ரல் மாதம் முதல் 9 மாதகாலமாக தற்காலிக இடமாற்றத்தின் கீழ் வேறு பாடசாலைகளில் கடமையாற்றிய ஆசிரியைகள் மீண்டும் ஷண்முகா இந்துக்கல்லூரிக்கு கடந்த ஜனவரி மாதம் 1 ஆம் திகதி முதல் இடமாற்றம் செய்யப்பட்டனர்.
இந்நிலையில் தொடர்ந்தும் ஷண்முகா கல்லூரியின் அதிபர் தனது நிலைப்பாட்டில் உறுதியாக இருந்தார். இடமாற்றம் பெற்று அபாயா அணிந்து சென்ற ஆசிரியைகளுக்கு கற்பித்தல் நடவடிக்கைகளில் ஈடுபட அனுமதி வழங்கப்படவில்லை. பாட நேரசூசியும் வழங்கப்படவில்லை. ஷண்முகா கல்லூரி அதிபரின் இந்த நடவடிக்கைகளையடுத்து 4 ஆசிரியைகளுக்கு நிரந்தர இடமாற்றம் வழங்கப்பட்டது. அவர்கள் ஷண்முகா கல்லூரியிலிருந்தும் வெளியேறினர். மனித உரிமைகள் ஆணைக்குழுவிலும் முறையிட்டிருந்தனர். இதனைத் தொடர்ந்தே ஆணைக்குழுவின் விசாரணை அறிக்கை வெளியிடப்பட்டுள்ளது.
ஷண்முகா இந்துக் கல்லூரியின் அதிபர் மனித உரிமைகள் ஆணைக்குழுவின் அறிக்கையையும் பரிந்துரைகளையும் வாசித்து தெளிவு பெறவேண்டும். இனங்களுக்கிடையில் ஓர் உறவுப்பாலமாக தன்னை அமைத்துக்கொள்ள வேண்டும். பாதிக்கப்பட்டுள்ள ஆசிரியைகள் தங்களது கலாசார ஆடை அபாயாவுடன் எந்தவித தடையோ, அச்சுறுத்தல்களோ இன்றி ஷண்முகா இந்துக்கல்லூரியில் கடமையாற்றுவதற்கு அதிபர் வழிவகை செய்யவேண்டும். நான்கு ஆசிரியைகளும் தமது கலாசார உடையுடன் ஷண்முகா இந்துக்கல்லூரியில் மீண்டும் கடமையாற்ற கல்வி அமைச்சின் அதிகாரிகள் நடவடிக்கை எடுக்க வேண்டும்.
அதேபோன்று இந்தத் தீர்ப்பானது ஆசிரியைகளோ மாணவர்களோ இஸ்லாமியய கலாசார ஆடை அணிந்து பாடசாலைகளுக்குச் செல்ல முடியும் எனும் முன்னைய நீதிமன்றத் தீர்ப்புகளையும் உறுதிப்படுத்துவதாக அமைந்துள்ளது. யட்டியாந்தோட்டை சிறிவர்தன மகா வித்தியாலயத்தில் கல்வி பயிலும் முஸ்லிம் மாணவி ஒருவர் ஹிஜாப் அணிவதற்கு அப்பாடசாலை அதிபர் தடை விதித்தமைக்கு எதிராக உயர் நீதிமன்றம் வழங்கிய தீர்ப்பும் ஜனாதிபதி பாலிகா வித்தியாலய அதிபருக்கு எதிராக உயர் நீதிமன்றம் வழங்கிய தீர்ப்பும் இந்த இடத்தில் கவனிக்கத்தக்கதாகும். அந்த வகையில் ஷண்முகா விவகாரத்தில் இலங்கை மனித உரிமைகள் ஆணைக்குழு வழங்கியுள்ள பரிந்துரைகளும் முஸ்லிம் ஆசிரியைகளும் மாணவிகளும் தமது இஸ்லாமிய கலாசாரத்தைப் பிரதிபலிக்கும் ஆடைகளை அணிந்து பாடசாலைகளுக்குச் செல்வதற்கான அடிப்படை உரிமையை உறுதிப்படுத்தியுள்ளமை பாராட்டுக்குரியதாகும்.