சவூதி அரேபியாவின் பட்டத்திற்குரிய இளவரசர் மொஹமட் பின் சல்மான் முதன் முறையாக பாகிஸ்தானுக்கு விஜயம் செய்துள்ளார். 100 பேர் கொண்ட உயர்மட்டத் தூதுக்குழுவினருடன் இஸ்லாமாபாத்தில் அமைந்துள்ள நூர்கான் விமான நிலையத்தை அவர் வந்தடைந்தார்.
அவருக்கு செங்கம்பள வரவேற்பு வழங்கப்பட்டதோடு, பிரதமர் இம்ரான் கான், இராணுவத் தளபதி ஜெனரல் கமர் பஜ்வா மற்றும் சிரேஷ்ட அமைச்சர்கள் இளவரசரை வரவேற்றனர்.
பட்டத்திற்குரிய இளவரசர் பயணித்த விஷேட விமானம் பாகிஸ்தான் வான்பரப்பிற்குள் நுழைந்தவுடன் பாகிஸ்தான் விமானப்படை ஜெட் விமானங்கள் வழித்துணை வழங்கியதாகவும், மரியாதையின் நிமித்தமாக 21 பீரங்கி வேட்டுக்கள் தீர்க்கப் பட்டதாகவும் அரச தொலைக்காட்சி தெரிவித்தது.
தூதுக்குழுவில் அங்கம் வகிக்கும் சவூதி அரேபியாவின் வெளிநாட்டமைச்சர் அடெல் பின் அஹ்மட் அல்-ஜுபெயிர் பட்டத்திற்குரிய இளவரசர் இஸ்லாமாபாத்திற்கு வந்தடைவதற்கு ஒரு மணித்தியாலத்துக்கு முன்னர் வந்து சேர்ந்தார். அவரை பாகிஸ்தான் வெளிநாட்டமைச்சர் ஷாஹ் மெஹ்மூட் குரைஷி வரவேற்றதாகவும் அரச தொலைக்காட்சி தெரிவித்தது.
மிகவும் பிரபலமாக்கப்பட்ட இந்த இரண்டு நாள் விஜயத்தின் போது 20 பில்லியன் அமெரிக்க டொலர் பெறுமதியான வியாபார மற்றும் முதலீட்டு உடன்படிக்கைகளில் இரு நாடுகளும் கையொப்பமிடும் என எதிர்பார்க்கப் படுகின்றது.
நிதிப் பற்றாக்குறையால் திணறிக் கொண்டிருக்கின்ற இஸ்லாமாபாத்திற்கு றியாதினால் கடந்த ஒக்டோபர் மாதம் அறிவிக்கப்பட்ட 6 பில்லியன் அமெரிக்க டொலர் நிதியுதவி வழங்கப்பட்டது.
இதற்கு மேலதிகமாக, சவூதி அரேபியாவின் அக்வா சர்வதேச மின்சக்தித் திட்டம் பாகிஸ்தானின் சக்தி வளத்துறையில் 4 பில்லியன் அமெரிக்க டொலர் வரையான முதலீட்டைச் செய்யவுள்ளதாக கடந்த ஞாயிற்றுக்கிழமை இஸ்லாமாபாத்தில் பாகிஸ்தான் நிதியமைச்சர் ஆசாத் உமருடனான பேச்சுவார்த்தையின் போது சவூதி அரேபியாவின் சக்திவள அமைச்சர் காலித் அல்-பாலிஹ் அறிவித்தாரென அறிக்கையொன்றில் உத்தியோகபூர்வமாக தெரிவிக்கப்பட்டுள்ளது.
பாகிஸ்தானின் எதிர்காலம் பிரகாசமாக இருக்கின்றது. இம்ரான் கானின் தலைமத்துவத்தின் கீழ் பாகிஸ்தான் மேலும் முன்னேற்றமடையும் எனவும் வரவேற்பு நிகழ்வில் உரையாற்றிய பின் சல்மான் தெரிவித்தார்.
ஆரம்ப கட்டமாகவே சவூதி அரேபியா 20 பில்லியன் அமெரிக்க டொலர் முதலீட்டினை பாகிஸ்தானில் மேற்கொள்கின்றது. எதிர்காலத்தில் இது மேலும் அதிகரிக்கும் எனவும் அவர் தெரிவித்தார்.
-Vidivelli