பொலிஸ் கான்ஸ்டபிள் மீது தாக்குதல்: சமிந்த விஜேசிறி எம்.பி.யை கைதுசெய்ய நடவடிக்கை
வீடு, அலுவலகத்திலும் சோதனை
பண்டாரவளை தபால் நிலையம் முன்பாக வைத்து, போதைப் பொருள் தடுப்புப் பிரிவின் பொலிஸ் கான்ஸ்டபிள் ஒருவர் மீது தாக்குதல் நடாத்திய குற்றச்சாட்டில் சந்தேகத்தின் பேரில் பதுளை மாவட்ட ஐ.தே.க. பாராளுமன்ற உறுப்பினர் சமிந்த விஜேசிரியைக் கைது செய்ய விசேட நடவடிக்கைகளை ஆரம்பித்துள்ளதாக பண்டாரவளை பொலிஸார் தெரிவித்தனர்.அதன்படி நேற்று குறித்த பாராளுமன்ற உறுப்பினரின் வீடு மற்றும் அலுவலகத்தை சோதனைக்குட்படுத்தியதாகவும் எனினும் அவர் அப்போது அங்கிருக்கவில்லை எனவும் பொலிசார் கூறினர்.
இந்நிலையில் குறித்த பாராளுமன்ற உறுப்பினர் பொலிஸ் நிலையத்தில் சரணடையலாம் என நம்புவதாகவும் பொலிசார் கூறினர்.
அரச ஊழியர் ஒருவருக்கு தடையை ஏற்படுத்தல், தாக்குதல் நடாத்தி காயம் ஏற்படுத்தல் உள்ளிட்ட குற்றச்சாட்டுக்கள் சமிந்த விஜேசிரி மீது சுமத்தப்பட்டுள்ளன.
நேற்று முன்தினம் மாலை, பொலிஸ் போதைப்பொருள் தடுப்புப் பிரிவின் கான்ஸ்டபிள் செலுத்திய ஜீப் வண்டி குறித்த பாராளுமன்ற உறுப்பினரின் வாகனத்தை முந்திச் சென்றதால், எம்.பி.யின் வாகனம் குறித்த ஜீப்பை வழி மறித்து நிறுத்தியிருந்தது. இதனையடுத்து குறித்த பொலிஸ் கான்ஸ்டபிள் மீது தாக்குதலும் நடாத்தப்பட்டதாக முறைப்பாட்டில் குறிப்பிடப்பட்டுள்ளது. இதுதொடர்பில் சமிந்த விஜேசிரி எம்.பி.யின் சாரதி கைது செய்யப்பட்டு விளக்கமறியலில் வைக்கப்பட்டுள்ள நிலையில், குறித்த பாராளுமன்ற உறுப்பினரையும் அவரது மெய் பாதுகாவலரையும் கைது செய்ய பொலிசார் தேடி வருகின்றனர்.
-Vidivelli