இஸ்லாத்தை தழுவியதிலிருந்து கடந்த ஏழு மாதங்களாக சுவீடனைச் சேர்ந்த பதின்மவயதுப் பெண்ணொருவர் அச்சுறுத்தல் மற்றும் ஏளனங்களை எதிர்கொண்டு வருகின்றார்.
சுவீடனில் 19 வயதிற்குக் கீழ்ப்பட்ட தேசிய பெண்கள் அணியின் பந்துக் காப்பாளராக விளையாடும் ரொன்ஜா அண்டர்ஸன் கடந்த திங்கட்கிழமை இரவு ட்ரோல் ஹண்டர் என அழைக்கப்படும் தொலைக்காட்சி நிகழ்ச்சியில் தோன்றினார்.
அந்த நிகழ்ச்சியின் போது ரொன்ஜா அண்டர்ஸனின் வீட்டுக்கு இனவாத வெறுப்புணர்வுக் கடிதமொன்றை அனுப்பிவைத்த நபர் ஒருவர் அடையாளம் காணப்பட்டார். அவ்வாறு அடையாளம் காணப்பட்ட நபர் குறித்த நிகழ்ச்சியில் தோன்றி அண்டர்ஸனிடம் மன்னிப்புக் கோரினார்.
தான் எவ்வாறு இஸ்லாத்தின் பால் ஈர்க்கப்பட்டேன் என்பது தொடர்பில் குறித்த தொலைக்காட்சி நிகழ்ச்சியில் விளக்கிய 19 வயதான அண்டர்ஸன் ‘எனக்கு 15 வயதாக இருக்கும் போது எனக்கு துருக்கிய ஆண் நண்பர் ஒருவர் இருந்தார். அவரது குடும்பத்தினரிடமிருந்தே நான் இஸ்லாத்தைக் கற்றுக்கொண்டேன்’ எனத் தெரிவித்தார்.
நான் அவரது குடும்பத்தினருடன் துருக்கிக்குச் சென்றபோது அங்கிருந்த பள்ளிவாசல்களால் மிகவும் கவரப்பட்டேன். நான் துருக்கிய குடும்பத்தினருடன் இஸ்லாமிய கடமைகளை நிறைவேற்றினேன். அதன்போது நானும் முஸ்லிமாக மாற வேண்டும் எனத் தீர்மானித்தேன் எனவும் அவர் தெரிவித்தார்.
இஸ்லாத்தை ஏற்றதன் பின்னர் நான் மிகவும் அமைதியான வாழ்க்கையை வாழ்கின்றேன். நான் குர்ஆனை ஓதுகின்றேன், தொழுகின்றேன் மற்றும் நோன்பும் பிடிக்கின்றேன். நான் முஸ்லிமாக இருப்பதில் பெருமையடைகின்றேன் எனவும் அவர் தெரிவித்தார்.
கடந்த 2018 ஆம் ஆண்டு அண்டர்ஸன் இஸ்லாத்தை ஏற்ற போது சுவீடனில் அதிகம் பேசப்படும் ஒருவராக மாறினார்.
-Vidivelli