சுதந்திர கட்சியுடன் இணைந்து தேசிய அரசாங்கத்தை அமைத்திருந்த போது செயற்பட்ட அமைச்சுக்கள் சில தற்போது நீக்கப்பட்டுள்ளமையால் அவற்றினால் முன்னெடுக்கப்பட்ட வேலைத்திட்டங்களும் தடைப்பட்டுள்ளன. அவ்வாறு அவற்றைக் கைவிட முடியாது. எனவே தான் தேசிய அரசாங்கத்தை அமைத்து அமைச்சரவையின் எண்ணிக்கையை அதிகரிக்க தீர்மானித்துள்ளோம் என ஐக்கிய தேசிய கட்சியின் பொதுச் செயலாளர் கல்வி அமைச்சர் அகிலவிராஜ் காரியவசம் தெரிவித்தார்.
இது தொடர்பில் அவர் தொடர்ந்தும் ஊடகங்களுக்கு தெரிவிக்கையில், அரசாங்கத்தை பலமானதாக்கி நாட்டை முன்னோக்கி கொண்டு செல்வதற்கு பாராளுமன்றத்தில் 113 பெரும்பான்மையுடன் நாம் செயற்பட்டுக் கொண்டிருக்கின்றோம். அபிவிருத்தி தொடர்பாகவும் ஏனைய விடயங்கள் தொடர்பாகவும் நடவடிக்கைகளை முன்னெடுப்பதற்கு அந்தப் பலம் மேலும் அவசியமாகின்றது. எனினும் நாம் பழைய தேசிய அரசாங்கத்தைப் போன்று தற்போதைய தேசிய அரசாங்கத்தை அமைக்கப்போவதில்லை.
ஸ்ரீ லங்கா சுதந்திரக் கட்சியின் உறுப்பினர்கள் சிலர் எம்முடன் இணைந்துள்ளனர். அதே வேளை அமைச்சரவை எண்ணிக்கையானது 48 இலிருந்து 30 ஆக மட்டுப்படுத்தப்பட்டுள்ளது. இவர்களில் கடந்த முறை அமைச்சுக்களினூடாக பல்வேறு நடவடிக்கைகளை முன்னெடுத்திருந்தவர்களுக்கு தற்போது அமைச்சு பதவி கிடைக்கப் பெறாமலுள்ளது.
தேசிய அரசாங்கத்தை அரசியலமைப்பிற்கூடாகவே அமைக்க வேண்டும். குறிப்பாக கடந்த நான்கு வருட காலமாக ஜனாதிபதி மைத்திரிபால சிறிசேன தலைமையிலான ஸ்ரீலங்கா சுதந்திர கட்சியுடன் ஐக்கிய தேசிய கட்சி இணைந்து தேசிய அரசாங்கத்தை அமைத்திருந்தது. எனினும் அதனைத் தொடர்ந்து கொண்டு செல்ல முடியாத நிலைமை ஏற்பட்டது.
அத்தோடு முன்னர் இருந்த சில அமைச்சுக்கள் தற்போது நீக்கப்பட்டுள்ளன. இதன் காரணமாக அவ்வாறு நீக்கப்பட்டுள்ள சில அமைச்சுக்களின் மூலம் முன்னெடுக்கப்பட்ட அபிவிருத்தி நடவடிக்கைகள் தடைப்பட்டுள்ளன. கடந்த நான்கு வருட காலமாக முன்னெடுக்கப்பட்டு வந்த வேலைத்திட்டங்களை சில மாதங்களே எஞ்சியுள்ளதெனக் கூறி கைவிட முடியாது. எனவே தான் இவ்வாறான அமைச்சுக்களை மீண்டும் உள்வாங்குவதற்கு அமைச்சரவையின் எண்ணிக்கையை அதிகரிக்க தீர்மானித்துள்ளோம்.
-Vidivelli