போதைப் பொருள் குற்றவாளிகளுக்கு இரு மாதங்களுள் மரணதண்டை
யார் எதிர்த்தாலும் நிறைவேற்றியே தீருவேன்; பாராளுமன்றத்தில் ஜனாதிபதி மைத்திரி சூளுரைப்பு
பாரிய அளவிலான போதைப்பொருள் கடத்தல் குற்றவாளிகளுக்கு மரண தண்டனை வழங்க நான் நடவடிக்கை எடுக்கும் போது எமது மனித உரிமை அமைப்புகளே எனக்கு தடையாக உள்ளன. எனினும் இந்த விடயத்தில் யார் தடுத்தாலும் எந்த நெருக்கடி வந்தாலும் அடுத்த இரண்டு மாதத்தில் மரணதண்டனைச் சட்டத்தை நிறைவேற்றி குற்றவாளிகளை தண்டித்தே தீருவேன் என ஜனாதிபதி மைத்திரிபால சிறிசேன தெரிவித்தார். சுமார் மூன்று மாதங்களுக்கு பின்னர் பாராளுமன்றத்திற்கு வருகை தந்த ஜனாதிபதி நேற்று பிற்பகல் சபையில் உரை நிகழ்த்தினார். இந்த உரையின் போதே அவர் இவற்றைச் சுட்டிக்காட்டினார். அவர் மேலும் கூறுகையில்,
இன்று தவறிழைத்தோரை ஒப்படைத்தல் திருத்த சட்ட விவாதம் இடம்பெற்று வருகின்றது. இதன்போது மரணதண்டனை கைதிகள் குறித்தும் பேசவேண்டும். போதைப்பொருள் கடத்தல், பாரிய குற்றங்கள் தொடர்பில் சிறையில் உள்ள மரணதண்டனை கைதிகள் அனைவருக்கும் மரண தண்டனை நிறைவேற்றப்பட வேண்டும் என்ற கருத்தினை நான் நெடு நாட்களாக முன்வைத்து வருகின்றேன். அந்த நிலைப்பாட்டில் மாற்றமில்லை. பாரிய குற்றவாளிகளுக்கு மரண தண்டனை வழங்கப்படும் முறைமை பல நாடுகளில் நடைமுறையில் உள்ளது. மின்சாரக் கதிரை மூலமாக, தூக்கு தண்டனை மூலமாக மரண தண்டனை நிறைவேற்றப்படும் முறைமை பல நாடுகளில் உள்ளன. நாட்டின் குற்றங்களை தடுக்கவும் நாட்டினை ஒழுக்கமாக கொண்டு நடத்தவும் சமூகத்தை சரியான பாதையில் வழிநடத்தவும் கடுமையான சட்டங்களை கையாள வேண்டும். சமூகத்தை சரியான பாதையில் வழிநடத்த சகல மத கோட்பாடுகளும் வழிகாட்டியாக உள்ளது. அறவழியை போதிக்கின்றது. ஆனால் அவை மட்டுமே போதுமானதல்ல. சட்டங்களும் கடுமையானதாக மாற்றப்பட வேண்டும்.
மரண தண்டனை கைதிகளின் விபரங்களை நான் நீதி அமைச்சிடம் கேட்ட போது உரிய நேரத்தில் அவை எனக்குக் கிடைக்கவில்லை. அவை பிற்போடப்பட்டது. போதைப்பொருள் கடத்தல் குற்றவாளிகளை காப்பாற்றுவதில் கடத்தல்கார கும்பல்களின் தலையீடுகள் இருந்திருக்க வேண்டும். அறிக்கை எனக்கு ஜனவரி மாதம் கிடைத்தது. ஆனால் அந்த அறிக்கையில் பல முரண்பாடுகள் உள்ளன. நீதிமன்ற தீர்ப்பு வழங்கப்பட்ட குற்றவாளிகளை போல நீதிமன்றத்திற்கு அனுப்பாத கைதிகளின் பெயர்களும் உள்ளன. அதுவே கால தாமதத்திற்கு காரணமாக இருக்கும். இன்று இலங்கையில் போதைப்பொருள் கடத்தல் குறித்த சகல வியூகங்களும் வகுக்கப்படும் கேந்திரமாக வெலிக்கடை சிறைச்சாலையே காணப்படுகின்றது. ஆகவே வெலிக்கடை சிறையில் உள்ள பாரிய போதைப்பொருள் குற்றவாளிகளை பூசா சிறைக்கு கொண்டுசெல்ல இப்போது நீதி அமைச்சும் நானும் இணைந்து நடவடிக்கை எடுத்து வருகின்றோம்.
எனினும் மரண தண்டனை நிறைவேற்றம் பற்றி பேசும் போது மனித உரிமை அமைப்புகள் அதற்கு தடையாக அமைகின்றன. அவர்கள் தலையிட்டு குற்றவாளிகளை தடுக்கும் நடவடிக்கைகளை முன்னெடுத்து வருகின்றனர். நாட்டினை சரியாக வழிநடத்த சமூகத்தை ஒழுக்கமாக மாற்ற நாம் எடுக்கும் முயற்சிகளின் போது அவற்றை குழப்புவதே மனித உரிமைகள் அமைப்புகளின் வேலையாக மாறியுள்ளது.
வெலிக்கடை சிறையில் உள்ள பாரிய போதைப்பொருள் குற்றவாளிகளை அங்குணகொலபெலஸ்ஸ சிறைக்கு மாற்றி அங்கு விசேட அதிரடிப்படை பாதுகாப்பை வழங்கியபோது எமது நாட்டின் நான் நியமித்த மனித உரிமைகள் அமைப்பே அதனை எதிர்த்து கேள்வி கேட்கும் நிலைமை உருவாகியுள்ளது. எம்மை பாதுகாக்க வேண்டிய, எமக்காக குரல் கொடுக்க வேண்டிய மனித உரிமை அமைப்பே எம்மை எதிர்க்கும் நிலைமை ஏற்பட்டுள்ளது.
எமது சமூகம் நாசமாவது, நாடு நாசமாவது இவர்களுக்கு விளங்கவில்லை. குற்றவாளிகளை தண்டிப்பதே இவர்களுக்கு பிரச்சினையாக உள்ளது. மரண தண்டனையை நிறைவேற்ற எமது மனித உரிமை அமைப்புகள் தடையாக உள்ளன. எவ்வாறு இருப்பினும் நாட்டினை நாசமாக்கும் குற்றவாளிகளை காப்பாற்ற யார் முன்வந்தாலும், மரண தண்டனைக்கு எதிராக யார் குரல் எழுப்பினாலும் இந்த பாரிய போதைப்பொருள் குற்றவாளிகளை தண்டிப்பதில் நான் எடுத்துள்ள தீர்மானத்தை மாற்றிகொள்ளப் போவதில்லை. இரண்டு மாதங்களில் மரண தண்டனை கைதிகளை தண்டித்தே தீருவேன். இரண்டு மாதங்களில் மரண தண்டனை சட்டம் நடைமுறைக்கு வரும் என்றார்.