9 மாகாணங்களுக்கும் ஒரே தினத்தில் தேர்தல்
மாகாண சபைகள் உள்ளூராட்சி இராஜாங்க அமைச்சர் அலவதுவல தெரிவிப்பு
மக்களுக்கு பெற்றுக்கொடுத்த வாக்குறுதிக்கு அமைவாக, ஒன்பது மாகாண சபைகளுக்குமான தேர்தல் ஒரே தினத்தில் இடம்பெறும். ஆனால் மாகாண சபை தேர்தலை புதிய கலப்பு முறையில் நடத்துவதா அல்லது விகிதாசார முறையில் நடத்துவதா என்பது குறித்து இன்னும் இறுதித் தீர்மானம் எதுவும் எடுக்கப்படவில்லை என மாகாண சபைகள், உள்ளூராட்சி மற்றும் உள்ளூராட்சி அலுவல்கள் இராஜாங்க அமைச்சர் ஜே.சி. அலவதுவல தெரிவித்தார். இது தொடர்பில் கட்சித் தலைவர்களுடன் பேச்சுவார்த்தைகள் எதுவும் இடம்பெறவில்லை. அனைத்துக் கட்சிகளும் பெரும்பான்மையினை பெற்றுகொடுத்தால் மாத்திரமே பழைய முறையில் நடத்துவதற்கான சட்டமூலத்தை நிறைவேற்றி கொள்ள முடியும் என்றும் அவர் குறிப்பிட்டார்.
மீண்டும் விகிதாசார முறையில் மாகாண சபைகளுக்கான தேர்தலை நடத்துவதற்கு அனைத்து கட்சிகளும் இணக்கம் தெரிவித்துள்ள நிலையில், விகிதாசார முறையில் மாகாண சபை தேர்தலை நடத்துவதற்கான சட்டமூலத்தை பாராளுமன்றத்தில் சமர்ப்பிப்பது தொடர்பில் வினவியபோதே அவர் இதனை தெரிவித்தார்.
அவர் மேலும் கூறுகையில், 2015ஆம் ஆண்டு ஆட்சியைப் பொறுப்பேற்கும் போது ஒரே சந்தர்ப்பத்தில் ஒன்பது மாகாண சபைகளுக்கான தேர்தலையும் நடத்துவதாகக் குறிப்பிட்டிருந்தோம். ஆனால் மாகாண சபை தேர்தல் தொடர்பில் இன்னும் அரசாங்க தரப்பில் எவ்வித பேச்சுவார்த்தைகளும் மேற்கொள்ளவில்லை. விகிதாசார முறையில் நடத்துவதா அல்லது கலப்பு முறையில் நடத்துவதா என்பதிலும் சிக்கல் நிலையே காணப்படுகின்றது. தேர்தலை நடத்தும் முறைதொடர்பில் இறுதித் தீர்மானங்கள் எதுவும் எட்டப்படவில்லை. இது தொடர்பில் கட்சித் தலைவர்களை சந்தித்துக் கலந்துரையாடலொன்றை மேற்கொள்ளவதற்கான அனுமதியினையும் கோரியிருந்தோம். ஆனால் அதற்கான அனுமதியும் இன்னும் கிட்டவில்லை. இருப்பினும் பழைய விகிதாசார முறையில் தேர்தலை நடத்துவதற்கு கட்சிகள் தனிப்பட்ட ரீதியில் இணங்கியிருந்த போதிலும் அது தொடர்பில் உத்தியோகபூர்வ அறிவிப்புக்கள் எதுவும் கிடைக்கவில்லை.
அவ்வாறு, மீண்டும் பழைய முறையில் மாகாண சபை தேர்தல் நடத்துவதற்கு உத்தியோகபூர்வமான அனுமதியினை பெற்றுகொள்ள வேண்டுமானால் அனைத்துக் கட்சிகளும் பாராளுமன்றத்தில் பெரும்பான்மையினை பெற்றுக்கொடுக்க வேண்டும். ஐக்கிய தேசிய கட்சியால் மாத்திரம் தனித்து இதனை நிறைவேற்றிக்கொள்ள முடியாது. பாராளுமன்றத்தில் அனைத்து கட்சிகளினதும் பங்களிப்பு இருந்தால் மாத்திரமே சட்டமூலத்தை நிறைவேற்றிகொள்ள முடியும்.
இருப்பினும், ஜனாதிபதி தேர்தலை முதலில் நடத்தும் நிலைப்பாட்டிலேயே ஐக்கிய தேசியக் கட்சி உள்ளது. ஒருசிலர் ஜனாதிபதி தேர்தலுடன் இணைத்து மாகாண சபை தேர்தலையும் நடத்துமாறு கூறி வருகின்றனர். அது தொடர்பிலும் கவனம் செலுத்தப்படும் என்றார்.
-Vidivelli