பாகிஸ்தானில் இவ்வாண்டின் முதலாவது போலியோ பாதிப்புக்குள்ளான குழந்தை ஆப்கானிஸ்தானுடனான எல்லைக்கருகில் அமைந்துள்ள பஜாஉர் பழங்குடி மக்கள் வாழும் ஹைபர் பாக்ஹ்துங்ஹ்வா மாவட்டத்தில் அடையாளம் காணப்பட்டுள்ளதாக அதிகாரிகள் தெரிவித்துள்ளனர். இதில் 11 மாதக் குழந்தையொன்றின் உடல் இயக்கம் ஸ்தம்பிதமடைந்துள் ளதாக பாகிஸ்தானின் போலியோ ஒழிப்பு நிகழ்ச்சித் திட்டத்தின் தலைவர் பாபர் அத்தாவின் தெரிவித்தார். பஜாஉர் மாவட்டத்திலிருந்து கடந்த மூன்று மாதங்களில் ஆறு போலியோ பாதிப்புக்கள் பதிவாகியுள்ளன. கராச்சி, குயெட்டா, லாஹூர், பெசாவார் மற்றும் பைஸலாபாத் உள்ளிட்ட பல பெரிய நகரங்களில் வீரியமிக்க போலியோ வைரஸ் சுழற்சி காணப்படுவதாகவும், அது எமது சிறுவர்களுக்கு ஆபத்தானது எனவும் அத்தா தெரிவித்தார்.
உலகில் போலியோ வைரஸ் தாக்கம் காணப்படுகின்ற மூன்று நாடுகளுள் ஒன்றாக பாகிஸ்தான் காணப்படுகின்றது. ஏனைய இரு நாடுகள் ஆப்கானிஸ்தானும் கென்யாவுமாகும். பாகிஸ்தானுக்காக உலக சுகாதார நிறுவனத்தினால் விதிக்கப்பட்டுள்ள இந் நோய்த்தடுப்புக்கான பயணக்கட்டுப்பாடுகள் தொடர்ந்தும் செயற்படுத்தப்படுகின்றன.
2014 ஆம் ஆண்டு பாகிஸ்தானுக்கு பயணிக்கும் அனைவரும் போலியோ தடுப்பு மருந்து ஏற்றியமைக்கான சான்றிதழை வைத்திருக்கவேண்டியது கட்டாயம் என உலக சுகாதார நிறுவனம் அறிவித்திருந்தது.
பாகிஸ்தானின் பல பகுதிகளில் போலியோ தடுப்பு மருந்தளிக்கும் அதிகாரிகள் கிளர்ச்சிக்குழுக்களைச் சேர்ந்த ஆயுததாரிகளால் அடிக்கடி இலக்கு வைக்கப்படுகின்றனர். போலியோவுக்கு எதிரான பிரசாரம் முஸ்லிம்களுக்கு எதிரான மேற்கு நாடுகளின் சூழ்ச்சி எனவும் காண்பிக்கப்படுகின்றது. பல சந்தர்ப்பங்களில் போலியோ தடுப்பு மருந்தேற்றம் செய்யும் பணியாளர்கள் குறிப்பாகப் பெண்களுக்கு மரண அச்சுறுத்தல் விடுக்கப்பட்டுள்ளது. கடந்த 2016 ஏப்ரல் மாதம் கராச்சியில் போலியோ தடுப்பு மருந்தேற்றும் நடவடிக்கைகளுக்கு பாதுகாப்பு வழங்கிக் கொண்டிருந்த ஆறு பொலிஸார் துப்பாக்கிதாரிகளால் சுட்டுக் கொல்லப்பட்டனர்.
கடந்த 2012 டிசம்பர் மாதம் தொடக்கம் தடுப்பு மருந்தேற்றும் பணியில் ஈடுபட்டிருந்த 88 அதிகாரிகள் பாகிஸ்தானில் கொல்லப்பட்டுள்ளமை குறிப்பிடத்தக்கது.
-Vidivelli