நாட்டை மீட்டெடுக்கவே தேசிய அரசு அவசியம்
தேசிய நோக்கத்திற்காக அனைத்துக் கட்சிகளும் எம்முடன் இணையலாம் என ஐ.தே.க. அழைப்பு
நாட்டினை மீட்டெடுக்கவும், இன ஐக்கியத்தை காப்பாற்றவும் கூட்டணியாக இணைந்து செயற்படக்கூடிய அனைவரையும் ஒன்றிணைக்கும் நோக்கத்திலேயே தேசிய அரசாங்கத்தை அமைத்து அதன் மூலமாக அமைச்சரவையை அதிகரிக்கும் யோசனையை முன்வைத்தோம் என ஐக்கிய தேசியக் கட்சி தெரிவித்துள்ளது.
அரசியலமைப்பிற்கு முரணாக நாம் செயற்படவில்லை எனவும் தெரிவிக் கப்பட்டுள்ளது. ஐக்கிய தேசியக் கட்சியின் சிரேஷ்ட உறுப்பினரும் அமைச்சருமான
லக்ஷ்மன் கிரியெல்ல நேற்றைய தினம் வெளிட்ட விசேட அறிக்கையிலேயே இவ்வாறு தெரிவிக்கப்பட்டுள்ளது.
குறித்த அறிக்கையில் தேசிய அரசாங்கத்தில் இணைய சகல கட்சிகளுக்கும் அழைப்பும் விடுக்கப்பட்டுள்ளது.
அவ்வறிக்கையில் மேலும் தெரிவிக்கப்பட்டுள்ளதாவது,
அபிவிருத்தி வேலைத்திட்டங்களை விரைவுபடுத்தவும், ஜனநாயகத்தை உறுதிப்படுத்தவும், மக்கள் ஆணையை காக்கவும், இனவாத அரசியல் செயற்பாடுகளை இல்லாதொழித்து சகல சமூகங்களையும் ஒன்றிணைக்கும் வகையில் ஆரோக்கியமானதும் புத்திசாலித்தனமான ஆட்சியொன்றினை உருவாக்கவேண்டும் என்ற நோக்கத்தில்தான் தேசிய அரசாங்கத்தை அமைத்து அதன் மூலமாக அமைச்சரவையை அதிகரிக்கும் கோரிக்கையை நான் முன்வைத்தேன். எமது இந்த உண்மையான நோக்கத்தினை விளங்கிக்கொண்ட, ஏற்றுக்கொள்ளும் சகல கட்சிகளும் எம்முடன் இணைய முடியும்.
தேசிய அரசாங்கத்தை அமைத்து அதனூடாக அமைச்சுப்பதவிகளை அதிகரிக்க வேண்டுமென்ற யோசனையை பாராளுமன்றதில் முன்வைத்தமை எந்தவித சட்டவிரோத செயற்பாடுமல்ல. இவை அரசியலமைப்பின் பிரகாரமே முன்வைக்கப்பட்டுள்ளன. எனினும், முன்னாள் ஜனாதிபதி மஹிந்த ராஜபக் ஷ தான் நினைத்த நேரத்தில் தனது அமைச்சரவையை 60 ஆக அதிகரித்துக்கொண்டமை அரசியலமைப்பின் பிரகாரமல்ல. அது அவரது தனிப்பட்ட அதிகாரத்தை கொண்டே முன்னெடுக்கப்பட்டது. அது ஒரு அரசியலமைப்பு விரோத செயற்பாடாகும். அவ்வாறான சர்வாதிகார செயற்பாட்டினை அரசியலமைப்பின் 19 ஆம் திருத்தத்தின் மூலமாக நாம் இல்லாதொழிக்க செய்தோம். அதற்கமைய அமைச்சரவை எண்ணிக்கையை அதிகரிக்க வேண்டும் என்றால் அதற்கு பாராளுமன்றத்தின் அங்கீகாரத்தை பெற வேண்டும்.
அவ்வாறு அரசியலமைப்புக்கு அமைவாக நாம் முன்னெடுத்துவரும் நடவடிக்கைகளை கண்டு குழப்பமடையும் எதிர்க்கட்சி உறுப்பினர்கள், அன்று மஹிந்த ராஜபக் ஷ ஆட்சியில் எவ்வாறு அமைச்சரவை அதிகரிக்கப்பட்டது என்பது குறித்து சிந்தித்துப்பார்க்க வேண்டும் எனவும் அவர் குறிப்பிட்டுள்ளார்.
-Vidivelli