இஸ்ரேலிய மாணவியொருவரைக் கொன்றதாக சந்தேகிக்கப்படும் நபரின் விளக்கமறியலை எதிர்வரும் ஜூன் மாதம் வரை அவுஸ்திரேலிய நீதிமன்றமொன்று கடந்த திங்கட்கிழமையன்று நீடித்துள்ளது. மேலும் சந்தேக நபரினால் பிணை தொடர்பில் எவ்வித கோரிக்கையும் முன்வைக்கப்படவில்லையென நீதிமன்ற பெண் பேச்சாளர் ஒருவர் தெரிவித்தார்.
அவுஸ்திரேலியாவின் இரண்டாவது பெரிய நகரமான மெல்பேர்னில் நண்பர்களுடன் இரவைக் கழித்துவிட்டு வீட்டை நோக்கி நடந்து வந்துகொண்டிருந்த போது 21 வயதான ஐயியா மாசர்வே கொல்லப்பட்டார். இதனையடுத்து முக்கிய நகரங்களில் பெண்களுக்கு பாதுகாப்பு வழங்கக் கோரி ஆர்ப்பாட்டங்கள் இடம்பெற்றன.
எழுச்சிப் பாடல்களை எழுதும் பாடலாசிரியரென ஊடகங்களால் வர்ணிக்கப்படும் 20 வயதான கோடி ஹேர்மன் கடந்த வாரம் இக்கொலை தொடர்பில் குற்றம்சாட்டப்பட்டு நீதிமன்றத்தில் ஆஜர்படுத்தப்பட்டதாக மெல்பேர்ன் நீதிவான் நீதிமன்ற பெண் பேச்சாளர் மேலும் தெரிவித்தார்.
பிணை தொடர்பில் எவ்வித கோரிக்கைகளும் முன்வைக்கப்படவில்லை. விசாரணை எதிர்வரும் ஜூன் மாதம் வரை ஒத்தி வைக்கப்படவுள்ளது எனவும் அவர் தெரிவித்தார். ஹேர்மனின் சட்டத்தரணி இது தொடர்பில் உடனடியாக எந்தக் கருத்தினையும் வெளியிடவில்லை என்பது குறிப்பிடத்தக்கது.
-Vidivelli