மாகாணசபை தேர்தலை விரைவாக நடத்த கோரி கடும் அழுத்தங்களை பிரயோகிப்போம்
ஸ்ரீலங்கா பொதுஜன பெரமுன
மாகாண சபை தேர்தல்கள் விரைவாக நடத்தப்பட வேண்டும் என்ற அழுத்தத்தை பிரயோகிப்பதனை இலக்காக கொண்டு, அதற்கு அவசியமான நடவடிக்கைகளை இனிவரும் காலங்களில் முன்னெடுக்கவுள்ளதாக ஸ்ரீலங்கா பொதுஜன பெரமுன தெரிவித்துள்ளது.
நெலும் மாவத்தையில் உள்ள ஸ்ரீலங்கா பொதுஜன பெரமுன கட்சித் தலைமையகத்தில் நேற்று திங்கட்கிழமை நடைபெற்ற ஊடகவியலாளர் சந்திப்பில் கலந்துகொண்டு உரையாற்றிய பாராளுமன்ற உறுப்பினர் ஜீ.எல்.பீரிஸ் மேற்கண்ட கருத்தை வெளியிட்டார்.
கடந்த தேர்தல்களில் வட மாகாணத்தில் தமிழ் தேசியக் கூட்டமைப்பிற்கான வாக்கு வங்கியில் பாரியதொரு வீழ்ச்சி ஏற்பட்டது. எனவே, அதனை சீர்செய்து தமக்குரிய வாக்குகளை சாதகமானதொரு மட்டத்திற்கு கொண்டு வருவதே தமிழ் தேசியக் கூட்டமைப்பின் நோக்கமாக உள்ளது.
புதிய அரசியலமைப்பு போன்ற விடயங்களின் ஊடாக தமக்குரிய வாக்குகளை உறுதிசெய்யும் வரையில் வடக்கில் மாகாணசபைத் தேர்தலை நடத்துவதற்கு அனுமதிக்க மாட்டார்கள். மாகாண சபைத் தேர்தலைக் காலந்தாழ்த்தும் அவர்களின் முயற்சிகளுக்கு உதவாமல் பழைய முறையிலேயே விரைவில் தேர்தலை நடத்த வேண்டும் எனவும் குறிப்பிட்டார்.அவர் தொடர்ந்து கூறுகையில், நாட்டிலுள்ள மூன்று மாகாண சபைகளின் பதவிக்காலம் முடிவடைந்து ஒன்றரை வருடங்கள் நிறைவடைந்துள்ளன. எதிர்வரும் ஏப்ரல் மாதத்துடன் ஒன்பது மாகாணங்களில் எட்டு மாகாணங்களில் பதவிக்காலம் முடிவடைந்த நிலையொன்று உருவாகும்.
இந்நிலையில் மாகாணசபை தேர்தல்கள் விரைவாக நடத்தப்பட வேண்டும் என்ற அழுத்தத்தை பிரயோகிப்பதனை இலக்காக கொண்டே எமது அனைத்து செயற்பாடுகளையும் முன்னெடுக்கவுள்ளோம். பதவிக்காலம் நிறைவடைந்த மாகாண சபைகளுக்கு உரிய பாதீடு இல்லாமலேயே அவற்றுக்கான செலவுகள் மேற்கொள்ளப்பட்டு வருகின்றன. இது அரசியலமைப்பு மற்றும் நாட்டின் சட்டம் என்பவற்றுக்கு முரணான செயற்பாடாகும்.
கடந்த தேர்தல்களில் வட மாகாணத்தில் தமிழ் தேசியக் கூட்டமைப்பிற்கான வாக்கு வங்கியில் பாரியதொரு வீழ்ச்சி ஏற்பட்டது.
எனவே அதனை சீர்செய்து தமக்குரிய வாக்குகளை சாதகமானதொரு மட்டத்திற்கு கொண்டுவருவதே தமிழ் தேசியக் கூட்டமைப்பின் நோக்கமாக உள்ளது. புதிய அரசியலமைப்பு போன்ற விடயங்களின் ஊடாக தமக்குரிய வாக்குகளை உறுதிசெய்யும் வரையில் வடக்கில் மாகாணசபைத் தேர்தலை நடத்துவதற்கு அனுமதிக்க மாட்டார்கள்.
மாகாண சபைத் தேர்தலைக் காலந்தாழ்த்தும் அவர்களின் முயற்சிகளுக்கு உதவாமல் பழைய முறையிலேயே விரைவில் தேர்தலை நடத்த வேண்டும்.
இந்நிலையில் சுயாதீன தேர்தல்கள் ஆணைக்குழு விரைந்து தேர்தலை நடத்துவதில் முனைப்புடன் செயற்பட வேண்டும். அதற்கான அழுத்தங்களை அரசாங்கத்திற்கு வழங்குவதற்கு எதிரணி என்ற ரீதியில் நாங்கள் தயாராகவே இருக்கின்றோம்.
மேலும் தேர்தலை புதிய முறையில் நடத்த வேண்டும் என அரசாங்கம் யோசனையைக் கொண்டு வந்தது. அதுவும் தேர்தலை காலந்தாழ்த்துவதற்கான ஒரு சதிமுயற்சி என்றே தோன்றுகின்றது. தற்போது புதிய முறையா? அல்லது பழைய முறையா? என்ற இறுதித் தீர்மானம் எட்டப்படாத நிலையில், பழைய முறையில் தேர்தலை நடத்துவதற்கான ஆலோசனையை பாராளுமன்றத்தில் முன்வைத்து, அதன்படி விரைந்து தேர்தலை நடத்த முன்வர வேண்டும் என வலியுறுத்துகின்றோம்.அதுமாத்திரமன்றி தற்போது தம்முடைய அனுசரணை இன்றி அரசாங்கத்தினால் புதிய சட்டங்கள், யோசனைகள் எவற்றையும் நிறைவேற்ற முடியாது என கூட்டமைப்பின் சுமந்திரன் கூறிவருகின்றார்.
அமைச்சரவையை விடவும் பலம்வாய்ந்த சக்தியாக தமிழ் தேசியக் கூட்டமைப்பு அரசாங்கத்தில் ஆதிக்கம் செலுத்தி வருகின்றது என்பதையே இக்கருத்து புலப்படுத்துகின்றது.
அத்தோடு தற்போது ஒன்பது மாகாண சபைகளுக்கும் ஒரே தடவையில் தேர்தலை நடத்துவதாக ஒரு யோசனையை அரசாங்கம் முன்கொண்டு வருகின்றது. அவ்வாறெனின் ஊவா மாகாணசபையின் ஆயுட்காலம் நிறைவடையும் வரை ஏனைய மாகாண சபைகளுக்கு தேர்தலை நடத்தாமல் காத்திருக்க முடியாது.
எனவே, ஊவா மாகாண சபையை முன்கூட்டியே கலைத்துவிட்டு, ஒன்பது மாகாணங்களுக்கும் ஒன்றாகத் தேர்தலை நடத்துவதற்கு எதிரணி ஆதரவு தெரிவிக்கும். அதனைவிடுத்து இவ்வருடம் டிசம்பர் மாதத்தில் பேசப்பட வேண்டிய ஜனாதிபதி தேர்தல் குறித்தோ, நான்கரை வருடங்களுக்கு முன்னர் கலைக்க முடியாது என உயர்நீதிமன்றம் தீர்ப்பளித்த பாராளுமன்றத் தேர்தல் குறித்தோ பேச வேண்டிய அவசியம் இல்லை என்றார்.
-Vidivelli