புத்தளம் , வனாத்தவில்லு பொலிஸ் பிரிவுக்கு உட்பட்ட மங்களபுர- லெக்டோ வத்த பகுதியில் மறைத்து வைக்கப்பட்டிருந்த வெடி பொருட்கள் மற்றும் வெடிபொருள் தயாரிப்புக்கு பயன்படும் இரசாயனங்களுடனும் மேலும் பல உபகரணங்களுடனும் நால்வர் கைதான சம்பவம் தொடர்பில் முன்னெடுக்கப்படும் சிறப்பு விசாரணைகளில் அடிப்படைவாத வலையமைப்புக்கள் தொடர்பில் சி.ஐ.டி. தகவல் சேகரித்துள்ளது. அதன்படி அடிப்படைவாத நிலைப்பாடுகளில் உள்ள சுமார் 50 பேர் தொடர்பில் கண்காணிக்கப்பட்டு வருவதுடன் விசாரணைகளும் தீவிரப்படுத்தப்பட்டுள்ளதாக குற்றப் புலனாய்வுப் பிரிவின் உயர் மட்ட தகவல்கள் தெரிவிக்கின்றன.
மாவனெல்லை, கண்டி மற்றும் பொதுஹர சிலை உடைப்பு விவகாரங்கள், புத்தளம் வெடிபொருள் மீட்பு சம்பவம் ஆகியவற்றுக்கிடையே நெருங்கிய தொடர்பிருப்பதாக கருதும் சி.ஐ.டி., இந்த சம்பவங்கள் அனைத்தும் அடிப்படைவாத நிலைப்பாட்டில் பயிற்சி முகாம் மற்றும் வகுப்புக்கள் நடாத்தப்பட்டுள்ளமை தொடர்பில் தகவல்களை வெளிப்படுத்தியுள்ளதாகவும் அவை தொடர்பில் தீவிர கவனம் செலுத்தி விசாரணைகள் தொடர்வதாகவும் சுட்டிக்காட்டியுள்ளது.
குறிப்பாக வெடி குண்டுகளை தயாரிப்பது, அவற்றை பயன்படுத்தி நாசகார செயல்களை அரங்கேற்றுவது தொடர்பில் குறித்த வகுப்புக்களில் பாடம் எடுக்கப்பட்டதா என்பது குறித்தும் அதில் கலந்துகொண்டவர்கள் தொடர்பிலும் அவதானம் செலுத்தப்பட்டுள்ளதுடன், சிலை உடைப்பு, வெடி பொருள் மீட்பு தொடர்பில் தேடப்படும் இரு முக்கிய சந்தேக நபர்களான சகோதரர்களை கைது செய்ய சிறப்பு திட்டமும் வகுக்கப்பட்டுள்ளது.
இந் நிலையில் இந்த விவகாரம் தொடர்பில் சி.ஐ.டி. க்கு பொறுப்பான சிரேஷ்ட பிரதிப் பொலிஸ் மா அதிபர் ரவி செனவிரத்னவின் நேரடி மேற்பார்வையில் அதன் பணிப்பளர் சிரேஷ்ட பொலிஸ் அத்தியட்சர் ஷானி அபேசேகரவின் ஆலோசனையின் பிரகாரம் உதவி பொலிஸ் அத்தியட்சர் விக்ரமசேகரவின் விஷேட விசாரணைப் பிரிவு இலக்கம் இரண்டின் பொறுப்பதிகாரி பொலிஸ் பரிசோதகர் ஜானக மாரசிங்கவின் கீழ் மூன்று சிறப்பு தனிப் படைகள் விசாரணைகளை ஆரம்பித்துள்ளன.
வெடி பொருட்களுடன் கைது செய்யப்பட்ட நான்கு பேரிடமும் 90 நாள் தடுப்புக் காவலின் கீழ் நான்காம் மாடியில் விசாரணைகள் தொடர்வதாகவும், புத்தர் சிலை விவகாரத்தில் கைது செய்யப்பட்டுள்ள 7 பேரிடம் இந்த வணாத்துவில்லு தோட்டம் மற்றும் வெடி பொருட்கள் தொடர்பில் விசாரணைகளை தொடர எதிர்பார்ப்பதாகவும் பாதுகாப்பு தரப்பின் உயர் மட்ட தகவல்கள் ஊடாக அறிய முடிகின்றது
மாவனெல்லை, கண்டி மற்றும் பொத்துஹர சிலை உடைப்பு விவகாரங்கள் தொடர்பில் சி.ஐ.டி.யின் சிறப்புக் குழு முன்னெடுத்துள்ள விசாரணைகளில், அவசியமான இரு சந்தேக நபர்களைத் தேடி நடாத்தப்பட்ட தேடுதலின் போதே இந்த வெடிபொருட்கள் சிக்கியிருந்தன. தேடப்படும் சந்தேக நபர்கள் வணாத்தவில்லு பகுதியில் வில்பத்து வனத்துடன் ஒட்டியுள்ள 80 ஏக்கர் தென்னத்தோட்டத்தில் மறைந்திருப்பதாக சி.ஐ.டி.க்கு தகவல் கிடைத்துள்ள நிலையில் அவர்களைத் தேடியே அங்கு சி.ஐ.டி. குழுவினர் சென்றுள்ளனர். எனினும் அங்கு எதிர்பாராதவிதமாக வேறு நால்வர் இருந்துள்ளதுடன் வெடி பொருட்களும் சிக்கியுள்ளமை குறிப்பிடத்தக்கது.
-Vidivelli